1 Ilisha u dana ta̱ vuka vuna u bonokoi maku ma̱ ni n wuma, <<Ɗa̱nga̱ vu suma n muku n nu a kubana a̱ ubuta̱ u yoku, adama a na Vuzavaguɗu wi ta̱ a̱ kuta̱wa̱ka̱ n kambulu a iɗika ya ali a̱ya̱ e cindere.>> 2 Ɗa vuka va vu ɗa̱nga̱i u ya'in tsu na vuma vu Ka̱shile va u danai. Ɗa u lazai n aza a kpa'a a̱ ni a̱ da̱sa̱ngi a iɗika ya aza a Filisitiya a̱ya̱ e cindere.

3 Ana a̱ya̱ e cindere a lazai, ɗa vuka va vu uta̱i a iɗika i Filisitiya u bonoi. U banai u mogono adama a na o bonoko yi n kpa'a ku ni n kashina ka̱ ni. 4 Mogono a kadanshi n Gehazi, kagbashi ka vuma vu Ka̱shile, u danai, <<Dana mu arabali ili i gbagbain i na Ilisha u ya'in.>> 5 Ana wi a kudana mogono tsu na Ilisha u ɗengusa̱i ka̱kpisa̱, ɗa vuka vu na Ilisha u bonokoi maku ma̱ ni n wuma u uwai n ma̱shi u mogono, ufolu o bonoko yi n kpa'a ku ni n kashina ka̱ ni.

Ɗa Gehazi u danai, <<Vuka vu ɗaɗa na vuzagbayin va̱ mogono, maku ma na Ilisha u bonokoi n wuma u ni a̱yi ɗa na.>> 6 Ana mogono me ecei vuka va, ɗa tonokoi ni ukuna wa.

Ɗa mogono ma zuwai vuza vi te a̱ ka̱tsuma̱ ka nkoshi m gba̱ra̱-gba̱ra̱ n kefeku, u danai, <<Bonokoi ni n ili i na yi i ni, n kodokpotsu ki ili i na a kya'i punu a kashina ka ali a kanna ka na u ka̱sukpa̱i iɗika ya a̱ kuta̱wa̱ gogo na.>>

7 Ilisha u banai Dimaska, a makyan ma na Ben-hadadu mogono ma Siriya wi a̱ mɓa̱la̱. Ci na ɗe a dana mogono, <<Vuma vu Ka̱shile u ta̱wa̱ ta̱ a̱ likuci i nampa.>> 8 Ɗa mogono ma danai Haziyelu, <<Ɗika kune'e vu bana u vuma vu Ka̱shile. Vu dana yi we ece ke wu Vuzavaguɗu, <Mi ta̱ a̱ kuta̱na̱ a̱ mɓa̱la̱ n va̱?> >>

9 Haziyelu u banai wi Ilisha n kune'e ku canuku icu'u kakau u Dimaska, u na arakuma amangere a ɗikai. Ana u yawai ɗa u shamgbai e kelime ki Ilisha ɗa u danai, <<Maku ma̱ nu Ben-hadadu mogono ma Siriya ma a u suku mu me ece wu, <Ko wi ta̱ a̱ kuta̱na̱ a̱ mɓa̱la̱ n ni?> >>

10 Ilisha wu ushuki, <<Bana vu dana yi, <Mayun wi ta̱ a̱ kuta̱na̱,> Ama Vuzavaguɗu u yotsongu mu ta̱ wi a kula'a ba wi ta̱ a̱ kukuwa̱.>> 11 Ilisha u ka̱na̱i kinda Haziyelu, ali Haziyelu u panai wono. Ɗa vuma vu Ka̱shile va u ɓosoi n ma̱shi.

12 Haziyelu we ecei,<<Yiɗa̱i i zuwai vuzagbayin va̱ ma̱shi?>> Ilisha wu ushuki u danai,

<<Adama a na n yeve ta̱ kawuya ka na vi a kuya'anka aza a Isaraila. Vi ta̱ o ku songu likuci yi nshilya n le, ka̱ta̱ vu una muku mo olobo ele n kotokobi, vi ta̱ kpamu a kuɓasangu aci a̱ muku n le a iɗika, ka̱ta̱ kpamu vu ka̱rukpa̱sa̱ a̱ ma̱ci le aza a̱tsuma̱.>>

13 Ɗa Haziyelu u danai, <<Niniɗai kagbashi ka̱ nu ka kufuɗa kuya'an ili i gbayin i nampa, mpa meshe'e,>> Ɗa Ilisha u dana ni,

<<Vuzavaguɗu u yotsongu mu ta̱ vi ta̱ o ko okpo mogono ma Siriya.>>

14 Ana Haziyelu u bonoi ɗa Ben-hadadu we ecei ni, u danai, <<Yiɗa̱i Ilisha u danai ni nu?>> Haziyelu u danai, <<U dana mu ta̱ mayun vi ta̱ a̱ kuta̱na̱.>> 15 Ama a na kayin kasai ɗa Haziyelu u ɗikai ogbodo u yeki a̱ mini ɗa u palai a̱shi o mogono, ali u kuwa̱i. Ɗa Haziyelu wo okpoi mogono ma Siriya a̱ una̱ u Ben-hadadu,

16 A̱ ka̱ya̱ ka tawun ko tsugono tsu Joram maku ma Ahabu mogono mi Isaraila, ɗa Jehoram maku ma Johoshafatu mogono ma Yahuda u gita̱i tsugono. 17 Jehoram n a̱ya̱ kamangankupa n e re ana wo okpoi mogono, ɗa u lya'i tsugono a Urushelima a̱ya̱ kunla̱i. 18 Jehoram u tonoi uye u mogono mi Isaraila tsu na kpa'a ku Ahabu ku ya'in, adama a na u zuwa ta̱ mekere ma Ahabu. U ya'in kagbanigbani a̱ a̱shi a Vuzavaguɗu. 19 Ama Vuzavaguɗu u ciga ku una iɗika i Yahuda ba, adama a na u ya'an ta̱ uzuwakpani n Dawuda, u danai, ntsukaya n ni mi ta̱ a kulya'a kelime n kulya'a tsugono.

20 A ayin a na Jehoram wi a kulya'a tsugono a iɗika i Yahuda, ɗa aza a Edom a ya'ankai ni ugbamiwasuvu ɗa a zuwai mogono me le. 21 Ɗa Jehoram wu uta̱i n ekeke odoku a̱ ni u banai a̱ likuci i Jayiru. Ɗa aza a Edom a̱ kanza ni n akumbi ekeke odoku a̱ ni, ama ɗa Jehoram u lapai le n kayin, ɗa osoji a̱ ni a sumai o kubono a i uwa i le. 22 Ta aza a Edom i a kuya'anka aza a Yahuda ugbamiwasuvu nannai ali n anana. A makyan me te ma'a likuci i Libina feu i ya'ankai aza a Yahuda ugbamiwasuvu.

23 Ulinga u na u buwai u tsugono tsu Jehoram n ili i na u ya'in ra̱ka̱ yi ta̱ uɗani a katagarda ka arabali ko ngono n Yahuda. 24 Ɗa Jehoram u bankai ukpisa̱ ɗa a̱ ciɗa̱ngini koɓolon ni ikaya i ni a̱ likuci i Dawuda. Ɗa Ahaziya maku ma̱ ni wo okpoi mogono a̱ una̱ u ni.

25 A̱ ka̱ya̱ ka kupa n ka ire ko tsugono tsu Joram maku ma Ahabu mogono mi Isaraila, Ahaziya maku Jehoram mogono ma Yahuda u gita̱i tsugono. 26 Ahaziya wi ta̱ na̱ a̱ya̱ kamanga n e re a na wo okpoi mogono. U lya'i tsugono a Urushelima ka̱ya̱ ke te. Kula ka̱ a̱na̱ku a̱ ni ku ɗa Ataliya, a̱yi vashi vu Omiri mogono mi Isaraila ma'a. 27 Ana wo okpoi Ahaziya u zuwai mekere ma Ahabu, ɗa u tonoi uye u gbani-gbani u kpa'a ku Ahabu.U ya'in kagbanigbani a̱ a̱shi a Vuzavaguɗu.

28 Ahaziya u gbaɓai kaci n Jehoram maku ma Ahabu a banai kuya'an kuvon n Haziyelu mogono ma Siriya. A Ramotu-giliyadu, ɗa aza a Siriya a ya'ankai Joram usa̱n. 29 Ɗa mogono Joram u bonoi a̱ likuci i Jezirelu, adama a na a̱ la̱na̱ yi untsu a̱ ni a na aza a Siriya a ya'ankai ni a Ramotu, a na u banai kuya'an kuvon n mogono Haziyelu.

Ɗa mogono Ahaziya maku ma Jehoram mogono ma Yahuda u banai adama a na u kya̱sa̱ yi, a na a uka ni usa̱n.