1 A̱ ka̱ya̱ ka kamanga n ke cindere ko tsugono tsu Jerobuwam mogono mi Isaraila, Azariya maku ma Amaziya u gita̱i tsugono a Yahuda. 2 A̱yi n a̱ya̱ gendu n kete a na u gita̱i tsugono, ɗa u lya'i tsugono a Urushelima a̱ya̱ amangerenkupa n e re. Kula ka̱ a̱na̱ku a̱ ni ku ɗa Jekoliya a Urushelima. 3 U ya'in ili i na yi mejege a̱ a̱shi a Vuzavaguɗu, tsu na esheku a̱ ni Amaziya u ya'in. 4 N nannai dem, u takpa a̱'isa̱ a̱ma̱li ba, ɗa uma a lya'i kelime n kubana n a ya'in kune'e ka alyuka n osongi ili ma̱gula̱ni ɗe.

5 Ɗa Vuzavaguɗu u lapai mogono nu mɓa̱la̱ ma̱ ukutu, ali u kuwa̱i. Ɗa u yongoi a kpa'a ku ni kau. Jotan maku mo mogono ɗa a zuwai u la̱na̱ kpa'a ka, n uma a iɗika ya.

6 Ulinga u na u buwai u tsugono tsu Azariya n ili i na u ya'in ra̱ka̱ yi ta̱ uɗani a katagarda ka arabali ko ngono n Yahuda. 7 Ana Azariya u bankai anan koko a̱ ni n kiya, ɗa a̱ ciɗa̱ngu ni n ikaya i ni a̱ likuci i Dawuda. Ɗa Jotan maku ma̱ ni wo okpoi mogono.

8 A̱ ka̱ya̱ ka kamangankupa n kula̱i ko tsugono Azariya mogono ma Yahuda, Zakariya maku ma Jerobuwam u gita̱i tsugono ci Isaraila. U lya'i tsugono a Samariya wotoi u ta̱li. 9 Zakariya u ya'in kagbanigbani u Vuzavaguɗu, tsu na ikaya i ni i ya'in. U ka̱sukpa̱ unushi u na Jerobuwam maku ma Nebatu u ya'in ba a na u zuwai aza a Isaraila kuya'an unushi.

10 Shalum maku ma Jabeshi u ya'in nsata adama a na a una Zakariya mogono, wu unai ni e kelime ka uma, ɗa wo okpoi mogono. 11 Ulinga u na u buwai u tsugono tsu Zakariya wi ta̱ uɗani a katagarda ka arabali ngono mi Isaraila. 12 Ɗa kadanshi ka Vuzavaguɗu ka shanai ka na u ya'in a kubana u Jehu u danai, <<Kpa'a ku nu ki ta̱ a̱ kuda̱sa̱ngu a kakuba ko tsugono ali tsukaya tsu na̱shi.>>

13 Shalum maku ma Jabeshi u gita̱i tsugono a iɗika yi Isaraila a̱ ka̱ya̱ ka kamangankupa n kuci ka tsugono tsu Uziya mogono ma Yahuda, u lya'i tsugono wotoi u te a Samariya. 14 Ɗa Menahem maku ma Gadi wu uta̱i a Tiza u banai a Samariya, wu unai Shalum mogono. Ɗa wo okpoi mogono.

15 Ulinga u na u buwai u tsugono tsu Shalum, koɓolon nu nsata n na u ya'in, yi ta̱ uɗani a katagarda ka arabali ko ngono mi Isaraila.

16 Makyan ma nanlo ɗa Menahem wu unai likuci i Tifasa n likuci i wawa i na yi uka̱ra̱'i n a̱yi, adama a na uma a a iwan ta̱ kuneke utan. Ɗa wu unai a̱ma̱ci aza a̱ tsuma̱ u ka̱rukpa̱i a ɗa.

17 A̱ ka̱ya̱ ka kamangankupa n kuci ko tsugono tsu Azariya mogono ma Yahuda. Menahem maku ma Gadi u gita̱i tsugono ci Isaraila, U lya'i tsugono a̱ likuci i Samariya a̱ya̱ kupa. 18 Ɗa Menahem u ya'in kagbanigbani a̱ a̱shi a Vuzavaguɗu. A makyan mo tsugono tsu ni ra̱ka̱, u iwain kuka̱sukpa̱ unushi u Jerobuwam maku ma Nebatu, a na u zuwai aza a Isaraila kuya'an unushi. 19 Ɗa Pulu mogono ma Asiriya u banai kuvon a iɗika yi Isaraila. Ɗa Menahem u nekei ni azurufa a̱kpa̱n kamangankupa n e cindere (37,000) adama a na u ɓa̱nka̱ yi tsu na tsugono ci ni tsa kushamgba n utsura. 20 Menahem mogono u ciya̱i ikebe ya a̱ ubuta̱ wa aza ikebe i Isaraila, u zuwai le utafu vuma dem u tuka̱ n azurufa amangerenkupa u mogono ma Asiriya. Ɗa mogono ma Asiriya ma kucikpa ma̱ kpa̱ɗa̱i kubanka aza a Isaraila n kuvon kpamu u da̱sa̱ngu a iɗika ya ba.

21 Ulinga u na u buwai u tsugono tsu Menahem n ili i na u ya'in yi ta̱ uɗani a katagarda ka arabali ko ngono mi Isaraila. 22 Ana Menahem u bankai ukpisa̱, ɗa Pekahiya maku ma̱ ni wo okpoi mogono a̱ una̱ u ni. 23 A̱ ka̱ya̱ ke gendu ko tsugono tsu Azariya mogono ma Yahuda, Pekahiya maku ma Menahem u gita̱i tsugono ci Isaraila a Samariya, ɗa u ya'in a̱ya̱ e re. 24 Ɗa u ya'in kagbanigbani a̱ a̱shi a Vuzavaguɗu. U iwain ku ka̱sukpa̱ unushi u na Jerobuwam maku ma Nebatu ma zuwai aza Isaraila kuya'an. 25 Ɗa vuzagbayin vo osoji Peka maku ma Ramaliya, u ya'in nsata adama a na una yi. Koɓolo m uma amangerenkupa a Giliyadu. Peka wu unai mogono, koɓolo n Agobu n Ariya. E kefeku ka̱ ni a Samariya. Ɗa Peka wu unai Pekahiya ɗa wo okpoi mogono a̱ una̱ u ni.

26 Ulinga u na u buwai u tsugono tsu Pekahiya n ili i na u ya'in yi ta̱ uɗani a katagarda ko ngono mi Isaraila.

27 A̱ ka̱ya̱ ka amangerenkupa n ere o tsugono tsu Azariya mogono ma Yahuda. Peka maku ma Ramaliya wo okpoi mogono mi Isaraila a̱ likuci i Samariya, ɗa u lya'i tsugono a̱ya̱ kamanga. 28 Ɗa Peka u ya'in kagbanigbani a̱ a̱shi a Vuzavaguɗu. U iwain kuka̱sukpa̱ unushi u na Jerobuwam maku ma Nebatu ma zuwai aza a Isaraila kuya'an.

29 Ayin a Peka mogono mi Isaraila, Tigilatu-piliza mogono ma Asiriya u ta̱wa̱i u ɗikai Ijonu, Ebelu-betu-maka, Janowa, Kedeshi n Hazoru. U ɗikai Giliyadu n Ga̱lili, koɓolon n iɗika i Nafutali, ɗa u bonokoi uma a, a Asiriya. 30 Ɗa Hosiya maku ma Ila ma ya'ankai Peka maku ma Ramaliya nsata ɗa a una ni. Ɗa wo okpoi mogono a̱ una̱ u ni a̱ ka̱ya̱ ka kamanga ko tsugono tsu Jotan maku ma Uziya.

31 Ulinga u na u buwai u tsugono tsu Peka n ili i na u ya'in yi ta̱ uɗani a katagarda ka arabali ko ngono mi Isaraila.

32 A̱ ka̱ya̱ ka̱ ire ko tsugono tsu Peka maku ma Ramaliya mogono mi Isaraila, Jotan maku ma Uziya mogono ma Yahuda u gita̱i tsugono. 33 A̱yi n a̱ya̱ kamanga na tawun a na wo okpoi mogono, ɗa u lya'i tsugono a Urushelima a̱ya̱ gendu n kete. Jerusha ɗa kula ka̱ a̱na̱ku a̱ ni mekere ma Zadoku. 34 Jotan u ya'in ili i na yi mejege a̱ a̱shi a Vuzavaguɗu. U ya'in tsu na esheku a̱ ni Uziya a ya'in. 35 Ama u la̱nga̱sa̱ nva̱li ma̱ a̱ma̱li a ba, ɗa uma a lya'i kelime ku bana ɗe n a ya'in kune'e ku kusongu. Jotan u ma'asakai utsutsu ugaɗi wa̱ a̱'isa̱ a Vuzavaguɗu.

36 Ulinga u na u buwai u tsugono tsu Jotan n ili i na u ya'in yi ta̱ uɗani a katagarda ka arabali ko ngono n Yahuda. 37 Ayin a nanlo Vuzavaguɗu u gita̱i kusuku Rezin mogono ma Siriya n Peka maku ma Ramaliya a banka aza a Yahuda n kuvon. 38 Ana Jotan u bankai ukpisa̱, ɗa a̱ ciɗa̱ngini koɓolo na anan koko a̱ni a̱ likuci i Dawuda esheku. Ɗa maku ma̱ni Ahazu wokpoi mogono.