1 Manasa wi ta̱ n a̱ya̱ kupa n e re a na u gita̱i kulya'a tsugono, ɗa u lya'i tsugono tsu Urushelima a̱ya̱ amangerenkupa n tawun kula ka̱ a̱na̱ku a̱ ni ku ɗa Hafiziba. 2 Ɗa u ya'ankai Vuzavaguɗu kagbanigbani, o kutono uye wu unata wu uduniyan u na Vuzavaguɗu u lokoi e kelime ka aza a Isaraila. 3 Adama a na u doku ta̱ u ma'asaka ubuta̱ wa̱ a̱'isa̱ u na Hezekaya esheku a̱ ni o ɓosoi, ɗa kpamu u ma'akai ka̱ma̱li ka Balu katalikalyuka, ɗa u ya'in kululu ku Ashera tsu na Ahabu mogono mi Isaraila ma ya'in. Ɗa kpamu u kuɗa̱nki wotoi n azangata u ya'ankai le tsugbashi. 4 Ɗa u ma'in atalikalyuka a̱'isa̱ a Vuzavaguɗu a̱ ubuta̱ u na Ka̱shile kadanai, <<A Urushelima ɗa n kuzuwa kula kuva̱.>> 5 Ɗa u ma'akai wotoi n azangata a gaɗi atalialyuka a ulanga u re e wa a̱'isa̱ a Vuzavaguɗu. 6 Ɗa u lyukai maku ma̱ ni akina. Ɗa u ka̱na̱i kuya'an tsuboci n kapalan ka̱shi. U ka̱na̱i kutono aza a na a gbaɓai kaci n a̱kpisa̱. Ɗa u ya'in kagbanigbani ka̱u u Vuzavaguɗu, ka na ka zuwai Vuzavaguɗu wupa n a̱bunda̱i. 7 Ɗa u she'wei kululu ku ka̱ma̱li ka Ashera ɗa u shikpa̱i kuɗa a̱'isa̱ a̱ Ka̱shile, a̱ ubuta̱ u na Ka̱shile kadanai Dawuda koɓolo n Sulemanu kolobo ka̱ ni, <<Punu a kpa'a ku nampa n Urushelima ɗa n zagbai a̱ ka̱tsuma̱ ka kumaci ka aza a Isaraila ra̱ka̱, n kuzuwa kula ku va̱ ayin babu uteku. 8 Mpa n kudoku kuzuwa ene a aza a Isaraila uta̱ kpamu a iɗika i na n nekei ikaya i le ba, ɗa baci o tonoi wila̱ u va̱, n wila̱ u na kagbashi ka̱ va̱ Musa u nekei le.>> 9 Ama ɗa uma a̱ kpa̱ɗa̱i kupana, ɗa tana Manasa u variki le, ɗa a ya'in kagbanigbani ka na ka la'i uduniya u na Vuzavaguɗu wu unai kafu a aza Isaraila.

10 Ɗa Vuzavaguɗu u ya'in kadanshi a̱ ubuta̱ wa agbashi a̱ ni eneki, u danai. 11 <<Adama ili yu unata i nampa, i na Manasa mogono ma a Yahuda u ya'in, ɗa kpamu u ya'in u nushi u gbayin u na u la'i wa aza Amoriya, e le na ishi punu n ida̱shi kafu a̱yi, ɗa kpamu u zuwai aza a Yahuda u nushi a̱ ubuta̱ u kutono ka a̱ma̱li a̱ ni, 12 adama nannai, Vuzavaguɗu Ka̱shile ki Isaraila ka dana ta̱. La̱na̱, mi ta̱ a̱ kutuka̱ n atakaci a ili i nampa a Urushelima n Yahuda, ka̱ta̱ yaba dem na u panai u je'eke ikyamba. 13 Ka̱ta̱, n gisangu Israila n vicu'u vu kawin ka na n gisanki Samariya n vicu'u vu kawin ka na kpamu n gisanki kpa'a ku Ahabu, ka̱ta̱ n tene'en Urushelima ra̱ka̱-ra̱ka̱ tsu na vuza u tsu tene'en mevene, ka̱ta̱ u kimba̱ ma'a. 14 Ka̱ta̱ n vakangu kagimi ka kumaci ku uma a̱ va̱, ka̱ta̱ n neke le ekiye a i rala i le aza a na e ku reme ka̱ta̱ isa le u canuku u kuvon. 15 Adama na a ya'an ta̱ kagbanigbani a̱ a̱shi a̱ va̱, ɗa kpamu a zuwai mu wupa, a kanna ka na ikaya i le yi uta̱i a iɗika i Masar, ali a̱ ku ta̱wa̱ anana.>>

16 Manasa kpamu wu una ta̱ aza babu unushi n a̱bunda̱i, ali Urushelima u shanai nu mpasa ma aza babu unushi a uteku u nampa a kubana uteku u nan ɗe, babu bi'i n unushi u na u zuwai aza a Yahuda a ya'ankai Vuzavaguɗu.

17 Kagimi ku ulinga ka Manasa n ili i na u ya'in a ayin tsugono ci ni, koɓolo n unushi u na u ya'in dem, yi ta̱ uɗani a katagarda ka tsumani tsu ngono ma Yahuda. 18 Ɗa Manasa u bankai ukpisa̱ ɗa a ciɗa̱ngi ni a kashina ka kpa'a ka̱ ni, kashina ka Uza. Ɗa Amon kolobo ka̱ ni ko okpoi mogono a una̱ u ni.

19 Amon wi ta̱ n a̱ya̱ kamanga n e re ana u gita̱i tsugono, ɗa u lyai tsugono tsu Urushelima a̱ya̱ e re. Kula ka a̱na̱ku ni ku ɗa Meshulemetu mekere ma Haruza vuza va aza a Jotuba. 20 Ɗa u ya'in kagbanigbani u Vuzavaguɗu tsu na esheku a̱ ni Manasa u ya'in. 21 U tonoi ili na esheku a̱ ni u ya'in ra̱ka̱, ɗa u tonoi a̱ma̱li a na esheku a̱ ni u tonoi ɗa u cikpai le. 22 U ka̱sukpa̱i Vuzavaguɗu, Ka̱shile ki ikaya i ni, u kpa̱ɗa̱i kutono uye u Vuzavaguɗu. 23 Ɗa nkoshi m gba̱ra̱-gba̱ra̱ mu ulinga n Amon mogono a gbaɓai kaci ke le ɗa unai ni a suvu e kefeku ko tsugono ci ni. 24 Ama ɗa uma a̱ likuci a unai aza a na a ya'in nsata ɗa unai Amon mogono ma, ɗa aza a̱ likuci a, a zuwai Josaya kolobo ka̱ ni tsugono a̱ una̱ u ni.

25 Ulinga u na u buwai u tsugono tsu Amon n ili i na u ya'in, yi ta̱ uɗani a katagarda ka tsumani tsu ngono n Yahuda. 26 Ɗa a̱ ciɗa̱ngi ni a kasaun ka̱ ni a kashina ka Uza. Ɗa Josaya kolobo ka̱ ni ko okpoi mogono a̱ una̱ u ni.