1 Abusalom maku ma Dawuda wi ta̱ n taku vu na wi n tsuloboi vuza na e ci ɗeke Tamaru, ɗa Amunon maku ma Dawuda ma̱ ka̱na̱i kuciga Tamaru va. 2 Ɗa Amunon u ucigi ni gbani-gbani ali u ka̱na̱i mɓa̱la̱ adama taku vu ni Tamaru, we ne ta̱ adanshi wi a̱ kuciya̱ kuya'an tsugbani n a̱yi ba, adama a na a̱yi Tamaru va ka̱ta̱ u yeve mavali ba. 3 Ama Amunon va wi ta̱ n ka̱ja̱'a̱ ka̱ ni vuza kula Jonadabu maku ma Shimeya toku vu Dawuda. Jonadabu va wi ta̱ n ugboji ka̱u. 4 Ɗa we ecei Amunon u danai, <<Yiɗa̱i i zuwai usana lakam vu yongo ka̱tsuma̱ una̱mgbi? Avu maku mo mogono ma ba? Dana mu.>>

Ɗa Amunon wu ushuki, u danai, <<Mi ta̱ a kuciga Tamaru taku vu mokoshi ma̱ va̱ Abusalom.>>

5 Ɗa Jonadabu u danai ni, <<Bana vu vaku ka̱ta̱ vu dana vu pana uyo'o wi ikyamba i nu ba. Ɗa baci esheku a̱ nu a̱ ta̱wa̱i ku ene wu, ka̱ta̱ vu danai, <Ya'an taku vu va̱ Tamaru u ta̱wa̱ u ne'eshe mu ilikulya'a. Ka̱ta̱ kpamu u ta̱wa̱ u ya'anka mu ilikulya'a ya a̱ a̱shi a̱ va̱, ali n lya'a i na u ya'in n ekiye a̱ ni.> >>

6 Ɗa Amunon u vaki a danshi uga'in ba. Ana mogono Dawuda u ta̱wa̱i kene yi, ɗa Amunon u danai mogono ma, <<Mi ta̱ ufolu u nu danaka mu taku vu va̱ Tamaru u ta̱wa̱. Mi ta̱ a kuciga u ya'anka mu emeshe mpa e kene ka̱ta̱ u ne'eshe mu.>> 7 Ɗa Dawuda u suki a kpa'a a dana Tamaru, <<Bana a kpa'a ku taku vu nu Amunon vu ya'anka yi ilikulya'a.>> 8 Ɗa Tamaru u banai a kpa'a ku taku vu ni Amunon, a̱ ubuta̱ u na wi iva'in. Ɗa u kenuki kiya ɗa u zuɓuki, ɗa u ya'ankai ni emeshe a̱yi e kene. 9 Ɗa u ɗikai kapara ɗa u kenuku ni emeshe a, ama ɗa u iwain kulya'a. Ɗa Amunon u danai aza kuya'anka yi ulinga a̱ uta̱ ra̱ka̱, ɗa ra̱ka̱ vu le a̱ uta̱i. 10 Ɗa Amunon u danai Tamaru, <<Tuka̱ mu n ilikulya'a a̱ kunu ki iva'in ku va̱. Ka̱ta̱ vu ne'eshe mu n kukiye ku nu n lya'a.>> Ɗa Tamaru u ɗikai emeshe a na u ya'in va ɗa u banai n a ɗa a̱ kunu ki iva'in ku taku vu ni Amunon. 11 Ama ana u yawai ɗevu n a̱yi adama a na u ne'eshe yi, ɗa u ka̱na̱i ni u danai, <<Taku vu va̱, ta̱wa̱ vu vaku nu mpa.>>

12 Ɗa wu ushuki ni u danai, <<A̱'a̱, taku vu va̱! Nannai va wi a kuya'an ba, ka̱ta̱ kpamu vu zuwa mu n ya'an nannai n utsura ba. Adama a na a ci ya'an nannai a Isaraila ba, ka̱ta̱ vu ya'an ili i gbani-gbani i wono i nanlo ba. 13 N ya'an ba ci nannai, teɗai n ku'uwa adama o wono? Avu feu i ta̱ o kubonoko wu vuza gbani-gbani a̱ ka̱tsuma̱ ka aza a Isaraila. Ama gogo na mi ta̱ ufolu u nu ya'an kadanshi m mogono, wi a̱ kusa̱nka̱ mu ku olo wu ba.>> 14 Ama Amunon u panaka yi ba. Ana wo okpoi u la'a yi ta̱ utsura, ɗa u lya'i ni utsura u ya'in tsugbani n a̱yi.

15 Ɗa Amunon u iwain Tamaru ka̱u, ali ɗa u la'i tsu na wi ishi a kuciga yi. Ɗa Amunon u danai ni, <<Ɗa̱nga̱ vu wala.>>

16 Ɗa Tamaru u danai ni, <<A̱'a̱ taku vu va̱, kuloko ku na vi a kuciga kuloko mu na wi ta̱ a kula'a ili i na vu ya'ankai mu ɗe n gbani-gbani.>>

Ama Amuno u panaka yi ba. 17 Ɗa u ɗekeshei maku mu ulinga ma̱ ni u danai ni, <<Utuka̱ vuka vu nampa va pulai, ka̱ta̱ vu ɓa̱ya̱ngu utsutsu wa.>> 18 Ɗa maku mu ulinga ma̱ ni mu utukai ni pulai ɗa u ɓa̱ya̱ngi utsutsu wa. Tamaru va tana wi ta̱ u uki m motogu me ekiye a ugaɗi, adama a na ta nkere m kpa'a ku mogono, aza a na ka̱ta̱ e yevei ali ba a tsu uka. 19 Ɗa Tamaru u tsungi kokomo a kaci ka̱ ni adama o wono, ɗa kpamu u ka̱na̱i motogu ma̱ ni u karai. Ɗa u kiyangi ekiye a̱ ni a kaci u walai n u lapasai una̱. 20 Ana taku vu ni Abusalom we enei ni ɗa we ecei ni u danai, <<Amuno taku vu nu ɗa u vaki n avu? Gogo na paɗa bini taku vu va̱ ka̱ta̱ vu dana vuza ba. Ka̱ta̱ kpamu wo okpo wu ili i yoku ba, taku vu nu ɗa feu, ka̱ta̱ vu ka̱sukpa̱ i ɗa i la̱nga̱sa̱ wu ka̱ɗu ka̱u ba.>> Ɗa Tamaru u da̱sa̱ngi a kpa'a ku taku vu ni Abusalom ende'en.

21 Ana mogono Dawuda u panai ukuna wa ra̱ka̱, ɗa ka̱ɗu ka̱ ni ka̱ na̱mgba̱i ka̱u. 22 Ama Abusalom u keɓece Amuno kakuna ba, u iwan ta̱ Amuno adama a na u la̱nga̱sa̱ ta̱ taku vu ni Tamaru.

23 Ana a̱ya̱ ere a lazai, ɗa Abusalom u danai a puna nlala n ni cileme ɗe a Ba'alu Hazo likuci i na yi ɗevu n likuci i Ifirayimu. Ɗa Abusalom u banuki olobo o ngono ra̱ka̱. 24 Ɗa Abusalom u banai u mogono u danai ni, <<Wuma u nu u geshe, aza a na a kupuna ka mu cileme tsu nlala tsa a̱ ta̱wa̱ ta̱ kuya'anka mu ulinga. Ko vi ta̱ a̱ kuta̱wa̱ koɓolo n abara a̱ nu ci ya'an ka̱ɗiva̱ ka koɓolo?>>

25 Ɗa mogono ma danai Abusalom, <<A̱'a̱ maku ma̱ va̱, tsa kubana ra̱ka̱ vu tsu ba, ci ta̱ a kuya'an a̱bunda̱i.>> Ɗa Abusalom u gutsai ni, ama u iwain kubana ɗa u zuwakai ni una̱singai.

26 Ɗa Abusalom u danai, <<Vi baci a kubana ba, sai vu ka̱sukpa̱ Amuno vuza va̱ u bana koɓolo n a̱tsu.>>

Ɗa mogono me ecei ni, <<Yiɗa̱i i zuwai ɗa vi a kuciga u bana koɓolo n a̱ɗa̱?>> 27 Ɗa Abusalom u gutsai ni, ali ɗa wu ushuki Amuno u bana koɓolo n a̱yi n olobo a̱ ni a na a buwai, ɗa a banai ra̱ka̱ n a̱yi.

28 Ɗa Abusalom u danai agbashi a̱ ni, <<Zukai, a makyan ma na baci ye enei Amuno ma̱ra̱ ma makai ni, ɗa baci i panai n danai ɗa̱, unai ni, ka̱ta̱ yu una yi, i pana wovon ba. Mpa ɗa vuza na n danai ɗa̱ i ya'an. Tsurukpai ka̱ta̱ i gbama asuvu.>> 29 Ɗa agbashi a Abusalom a unai Amuno uteku tsu na Abusalom u danai le a ya'an. Ɗa olobo o mogono a na a buwai ra̱ka̱ a̱ ɗa̱nga̱i, a kumbai mkparagi n le a sumai.

30 Ele a uye o kubono, ɗa kadanshi ka yawai u Dawuda a danai ni, <<Abusalom wu una ta̱ olobo o mogono ra̱ka̱, babu vuza na u buwai n wuma.>> 31 Ɗa mogono Dawuda u ɗa̱ngai u karai motogu ma̱ ni ɗa u vaki a iɗika adama a una̱mgbuka̱tsuma̱. Ɗa kpamu agbashi a̱ ni a na i kashani n a̱yi ra̱ka̱ vu le feu a karai ntogu n le.

32 Ama ɗa Jonadabu maku ma Shimeya, toku vu Dawuda, u danai, <<Vuzagbayin, ka̱ta̱ vu sheshe a una ta̱ olobo a̱ nu ra̱ka̱ ba, Amuno ɗa koci a unai. Abusalom va u foɓuso ta̱ ka nampa ka, ali a kanna ka na Amuno u ya'in tsugbani n taku vu ni Tamaru. 33 Vuzagbayin mogono ka̱ta̱ vu dana a una ta̱ olobo a̱ nu ra̱ka̱ ba, Amuno ɗa koci u kuwa̱i.>>

34 Ɗa Abusalom u sumai.

Ɗa vuza kindi u ɗa̱ngushi a̱shi a̱ ni ɗa we enei uma n a̱bunda̱i a̱ kuta̱wa̱ n uɓon u ɗakai u kusan. 35 Ɗa Jonadabu u danai mogono, <<La̱na̱, olobo a̱ nu a ɗa lo o kubono uteku tsu na n danai nu>> 36 A̱yi o kukotso kuya'an kadanshi, ɗa olobo o mogono a yawai, ɗa a̱ ka̱na̱i ma̱shi. Ɗa Dawuda koɓolo n agbashi a̱ ni ra̱ka̱ a̱ shika̱i ka̱u. 37 Ɗa Abusalom u sumai a kubana u Talamayi maku ma Amihudu, mogono ma Geshuru. Ɗa Dawuda u na̱mgba̱i ka̱tsuma kanna n kayin adama a ukpa̱ u maku ma̱ ni Amunon. 38 Ana Abusalom u sumai a kubana a Geshuru, u yongoi ɗe ali a̱ya̱ a tatsu. 39 Ana mogono Dawuda ma cinukpai n ukpa̱ u maku ma̱ ni Amuno, ɗa u ka̱na̱i ma̱za̱nga̱ ma na we ene Abusalom.