4
Modoruko n kataci
1 Ana n la̱nuki kpamu ɗa me enei modoruko ma na uma i a kuyaꞋan aduniyan.
Ɗa me enei kujilya ka aza a na o doroi,
kpamu i n ka̱ɓa̱nki ba,
utsura ra̱ka̱ wi ta̱ ekiye aza o modoruko
kpamu a̱ ciya̱ ka̱ɓa̱nki ba.
2 Ɗa n danai, a̱kpisa̱
a na a̱ kuwa̱i ɗe,
a laꞋa ta̱ aza a wuma ma̱za̱nga̱,
ele na buwai n wuma.
3 Ama a̱yi na u laꞋi dem
a̱yi ɗa vuza na ka̱ta̱ a matsai ba,
a̱yi na ka̱ta̱ wenei ka gbani-gbani
ka na i a kuyaꞋan aduniyan ba.
4 Ɗa n yevei kataci ka vuma n kuciya̱ ku ni ra̱ka̱, adama a na u ciya̱ u laꞋa toku ɗa. Nava feu gbani ɗa, kutono ku wunla̱i ku ɗa koci.
5 Kalau ko tsu oɓongu ta̱ ekiye a̱ ni
ali kambulu ka una yi.
6 U laꞋa ta̱ n kugaꞋan uciyi u kenu n ida̱shi ma̱ta̱na̱
n uciyi wa̱ a̱bunda̱i n kataci
o kutono wunla̱i.
7 Ɗa kpamu me enei, kuyongo ku gbani aduniyan.
8 Vuma yoku u yongo ta̱ endeꞋin,
wi n vuza ba wi feu m muku ba,
dem n nannai a kataci ka ulinga,
tana uciyi wa u yawa yi ba.
Ɗa we ecei ka̱ci ka̱ ni u danai, <<Yayi mi a kuyaꞋanka kataci ka,>>
<<Kpamu yiɗa̱i i zuwai mi a̱ kusa̱nka̱ ka̱ci ka̱ va̱ kupana kuyoꞋo?>>
Nava feu gbani ɗa
ili yi una̱mgbuka̱tsuma̱.
9 Uma e re a laꞋa ta̱ vuma te,
adama a na i ta̱ a kuyaꞋan ulinga mayin.
10 Vuza te u yikpa̱ baci,
toku ni wi ta̱ kuɓa̱nka̱ yi.
Ama ili ya asuvayali i ɗa vuza na u yikpa̱i
kpamu u ciya̱ vuza na u kuɗengusa̱ yi ba.
11 Kpamu uma e re a vaku baci koɓolo, a kupana ta̱ shenshen.
Ama niniɗai vuza te u kupana shenshen endeꞋin?
12 I ta̱ a kufuɗa kulyaꞋa vuma te utsura,
ama uma e re i ta̱ a ku isa ka̱ci ke le.
Tsu kawin kete ka na a caꞋi n awin a tatsu, ka tsu kasa gogoꞋo ba.
Kuciya̱ utsura u tsugono gbani ɗa
13 Ka̱ɗa̱nga̱ni vuza vu unambi, n ugboji, u laꞋa ta̱ mogono ma na ma kutsai n tsulau, vuza na u tsu ushuku n odoki ba. 14 Ka̱ɗa̱nga̱ni ki ta̱ a̱ ku uta̱ a̱ kunu kugbashi ka̱ta̱ ko okpo mogono, ko wo okpo a matsa yi ta̱ a kpaꞋa ku unambi a̱ ka̱tsuma̱ ko tsugono ci ni. 15 Me ene ta̱ uma ra̱ka̱ aza a na i n wuma ɗa a walai aduniyan, o tono ta̱ ka̱ɗa̱nga̱ni, vuzana u ku ka̱na̱ka̱ mogono tsugono. 16 Kakuna ki lo n uteku u uma na a̱ ta̱wa̱i e kelime ke le ba. Ama aza a na a̱ ta̱wa̱i ka̱ca̱pa̱ ka a yaꞋan ma̱za̱nga̱ n a̱yi ba. Nava feu gbani ɗa, kutono ku wunla̱i ku ɗa koci.