1 Ili i na i ya'in a ayin o tsugono tsu Ahasuru i ɗa na. Mogono ma nampa ma lya'a ta̱ tsugono tsu uɓon wi iɗika amangatawun n kamanga n i cindere (127), u gita̱i a uɓon wi iɗika i Kushi a kubana a Itopiya.*1:1 Ahasuru n Atazesu kula kute ku ɗa 2 A ayin a nanlo mogono Ahasuru a̱yi a kulya'a tsugono a̱ likuci i gbayin Susa. 3 A̱ ka̱ya̱ ka tatsu ko tsugono ci ni, ɗa u foɓusoi ka̱ɗiva̱ adama aza e kelime nu nkoshi m gba̱ra̱-gba̱ra̱ a̱ ni dem. Ovonshi o osoji a Pashiya m Midiya nu ngono, n aza gba̱ra̱-gba̱ra̱ a na i uɓon u nanlo wa ɗa a o ɓolongi lo dem. 4 Ali ayin amangatawun n amanga̱na̱shi (180) a̱yi o kuyotsongu uciyi u ni n tsugbayin ci ni n tsugono ci ni dem. 5 Ana ayin a nampa a lazai ɗa mogono mo doku mo foɓusoi ka̱ɗiva̱ ko yoku ka ayin e cindere, punu e kefeku ka gbayin ka̱ ni, adama a uma a gbagba'in n aza a na a buwai ɗa i ida̱shi punu a Susa dem. 6 Ubuta̱ wa wi ta̱ n arikinla a̱ a̱ri m mini mu usuni u sakushi. A kala ta̱ ubuta̱ wa n eleje a̱ri a singai n aza a na o yotsoi mini ma̱ ma̱ɗiya̱. Ɗa a kalai ubuta̱ wa nu nkawani ma azurufa, a saɓangi le a̱ kumi'i ka atali a na i n uga'in u kinda. Akuba o yoku i ta̱ lo kpamu a na a ya'in n azurufa n azanariya. Ɗa a zuwai le lo pulai vu kpa'a ku mogono vu na kpamu a ya'in n atali a singai a na e she'wei a katali, n usumbi u mini kakau. 7 Ɗa e nekei uma ma̱kya̱n n icu'u yi nkoko ma azanariya kakau, babu mokoko ma na mi icu'u ite n vu toku, ma̱kya̱n mo mogono kpamu a̱ sa̱nka̱ vuza ba, e nekei yaba dem tsu na uciyi u mogono wi. 8 Tsu na mogono ma danai u ka̱sukpa̱ ta̱ komoci dem u so'o ili kuso'o tsu na u cigai, adama a na kpamu u dana ta̱ agbashi a̱ ni e neke yaba dem icu'u i ma̱kya̱n i na u cigai. 9 egbere Vashita u ya'ankai feu a̱ma̱ci ka̱ɗiva̱ adama a̱ a̱ma̱ci a na i e kefeku ko Mogono Ahasuru.

10 A kanna ke cindere ka̱ ka̱ɗiva̱ ka, ana mogono Ahasuru wi a̱ ka̱tsuma̱ ko kuso'o ɗa u danai ndari n ali n cindere aza a na e ci neke yi ilikulya, ele ɗa anan Mahuma, m Bizata, n Harubone, m Bigata, Abata n Zita koɓolo n Kakasu, 11 a̱ tuka̱ yi n egbere Vashita u uki n oroli, adama a na u yotsongu tsuloboi ci ni u uma a̱ ni, n aza a gbagba'in adama a na wi ta̱ n tsuloboi tsu kinda ka̱u. 12 Ana aza a na i a kinda mogono a danai ni usuki u mogono, ɗa egbere Vashita u iwain kubana usuki u mogono wa. Ɗa mogono ma ya'in wupa ɗa ka̱ɗu ka̱ ni ka̱ kula̱i ka̱u.

13 Ɗa mogono ma̱ la̱nsa̱i odoki a̱ ubuta̱ wu eyevi a kakuna n aza na i n uyevi u wila̱ n afada, tsu na u kiwanai kuya'ansa. 14 Aza a na i ɗevu m mogono ele ɗa Kashena, n Shitaru, n Adimita, n Tarishisa, m Merasu, m Marsena, m Memukan, uma a̱ gba̱ra̱-gba̱ra̱ e cindere aza a Pashiya m Midiya, aza a na i n utsura e ene mogono ka̱ta̱ a̱ da̱sa̱ngu kelime ka̱ ni. 15 Ɗaɗa mogono me ecei, <<Tsu na wila̱ wi, yiɗa̱i i ga'in a ya'anka sangina Vashita? U tono kadanshi ko mogono Ahasuru ba, ka na ndari n ali a danai ni.>>

16 Ɗa Memukan u dansai lo e kelime ko mogono n aza a̱ gba̱ra̱-gba̱ra̱ a̱ ni, <<Egbere Vashita mogono ma'a u nusakai koci ba, ali a kubana wa aza a̱ gba̱ra̱-gba̱ra̱ o mogono feu n aza a na i punu a uɓon u mogono Ahasuru feu. 17 Adama a ili i na sangina u ya'in, a̱ma̱ci a na a buwai i ta̱ a kupana, ka̱ta̱ o goyo ali e le a dana, <Mogono Ahasuru u ya'anka ta̱ sangina Vashita kadanshi a̱ tuka̱ yi na wa̱ ni, ama ɗa u iwain.> 18 A kanna ka nampa ɗa baci a̱ma̱ci aza a Pashiya n a̱ma̱ci a̱ gba̱ra̱-gba̱ra̱ a Midiya a panai i na sangina u ya'ankai mogono, n tsu nanlo i ta̱ feu a kuya'anka ali e le nannai. A̱ma̱ci a o kudoku a cikpa ali e le ba, ka̱ta̱ ali e le o yongo a kuya'an wupa n a̱ma̱ci e le. 19 Adama a nannai mogono me ene baci u ga'an yi ta̱, u neke kadanshi ku utsura ka̱ta̱ a ɗana ka'a punu a̱ wila̱ u Pashiya m Midiya, U na a kusaba'a ba, u na u kuzuwa sangina Vashita wo kudoku kubana u mogono Ahasuru ba. Ya'an mogono ma ɗika tsugbayin tsu vuka tsa u neke vuza yoku vu na u la'i ni usuɓi. 20 Ayin a na baci wila̱ u mogono u nanlo u ya'in usali, a uɓon u tsugono tsu nu dem, ta kpamu a̱ma̱ci ra̱ka̱ o kutono kadanshi ka ali e le nannai, aza a unambi n aza a̱ uciyi dem.>> 21 Ɗa mogono n aza a gbagba'in a̱ ni a panai uyo'o u odoki a Memukan. Ɗa mogono ma ya'in ulinga n i na Memuka u danai ni. 22 Ɗa u suki n akaka a uɗani a kubana a uɓon dem u na wi o tsugono tsa. Ɗa kpamu u suki ubuta̱ dem n kelentsu ka na a kufuɗa kukece, n umaci dem n tsu na e kuyeve. Vali dem wo okpo vuzagbayin vu kpa'a vi ni, wo okpo vuza na u kudansa ka̱ta̱ o tono.