1 Mogono n Hama a banai kulya'a n o so'i koɓolo n Esta, 2 Ana i lo o kuso'o ma̱kya̱n a kanna ke ire ka nanlo, ɗa mogono me ecei kpamu, <<Egbere Esta, yiɗa̱i vi a kuciga? I ta̱ e kuneke wu i ɗa. Yiɗa̱i ufolu u nu? Ko kagimi ku ukuna u tsugono ka'a baci vi ta̱ a̱ kuciya̱.>>

3 Egbere Esta wu ushuki, <<Mi baci a̱ kuciya̱ mapasa ma singai wa̱ nu, avu mogono, ɗa baci feu u yokpoi nu, ka̱sukpa̱ mu n wuma ka̱ta̱ vu ka̱sukpa̱ uma a̱ va̱ feu o yongo n wuma. Ɗaɗa ufolu u va̱. 4 Adama a na mpa n uma a̱ va̱, ci ta̱ udengi adama a kugbasha, n kukiɗa n kuna, ishi baci adama a ukuna wu tsugbashi u ɗa e dengei tsu koci, mi ishi ta̱ a kupaɗa bini, ko kutakacika mi ishi a kutakacika gbani ba. Adama a na babu ili i na a kugisangu n i na mogono ma kunamba.>> 5 Mogono ma Ahasuru me ecei egbere Esta, <<Yayi tamkpamu? Te ɗai a̱ kuciya̱ vuma vu na u kuya'an ili tsu nanlo?>>

6 Ɗa Esta u danai, vuza va odoki n vurala vu tsu a̱yi ɗa Hama vuma vu gbani-gbani vu tsu. Ɗa Hama u panai wovon e mere mo mogono n egbere Esta. 7 Ɗa mogono ma̱ ɗa̱nga̱i n wupa, u ka̱sukpa̱i ma̱kya̱n ma̱ ni ɗa wu uta̱i pulai e kefeku ka̱ ni. Ama Hama u yeve ta̱ ili i na mogono me sheshekei ka̱ci ka̱ ni, shamgba lo ɗevu adama a na vu folono egbere Esta adama a wuma u ni. 8 Ana mogono mo bonoi e kefeku ka̱ ni, a̱ kunu ku kuyongo ku ni. Ɗa Hama u yikpa̱i e kelime ke Esta a uɓon u na Esta wi ida̱shi. Mogono ma danai, u kushika ta̱ egbere e kelime ka̱ va̱ a kpa'a ku va̱, mpa e kene? Ana mogono ma dansai nannai, ɗa e remei Hama. 9 Ɗa Harubona, a̱ ka̱tsuma̱ ka ndari n na mi a kuya'anka mogono a̱ga̱nda̱ u danai, <<Hama u ya'an ta̱ kaburakpatsu ka kusaɓatangu uma ka na kashani ka̱ ni ka yawai udashi amangatatsunkupa n u tawun punu a kpa'a ku ni. U ya'an ta̱ kaburakpatsu ka adama a na u saku Modikaya vuza na wi isai wuma u mogono.>> Ɗa mogono ma danai, <<Saɓangi ni ɗe.>> 10 Ɗaɗa a saɓangi Hama a maɗanga ma ɗe ma na u foɓusoi adama a Modikaya a. Ɗa ta na wupa u mogono u cipa̱i.