1 Ana o kotsoi kudansa nu nkoshi ma aza Isaraila, ɗa Musa n Haruna a banai u Firi'auna ɗa a danai ni, <<Ili i na Vuzavaguɗu Ka̱shile ka aza a Isaraila u danai i ɗa na, <Ka̱sukpa̱ uma a̱ va̱ a bana a ya'anka mu ka̱ɗiva̱ ɗe e meremune.> >>

2 Ɗa Firi'auna we ecei <<Yayi Vuzavaguɗu vu nanlo, vuza na n kupana kadanshi ka̱ ni ali ka̱ta̱ n ka̱sukpa̱ aza a Isaraila a laza? Mpa n yeve Vuzavaguɗu vu nanlo ba. Ma̱ a̱ kuka̱sukpa̱ ɗa̱ i laza ba.>>

3 Ama ɗa Musa n Haruna a̱ ushuki a danai, <<Ka̱shile ka aza Ibirahi u yotsongu ta̱ ka̱ci ka̱ ni wa̱ tsu. Tsu folono wu ta̱ ya'an ci ya'an nwalu ali ayin a tatsu a kakamba adama a na tsu bana ci ya'anka Ka̱shile Vuzavaguɗu vu tsu alyuka. Ci ya'an baci nannai ba, wi ta̱ a kuna tsu m ma̱dukpa̱ ko n kotokobi.>>

4 Ama ɗa mogono ma Masar me ecei Musa n Haruna, <<Adama a̱ yiɗa̱i yi a̱ kusa̱nka̱ uma kuya'an ulinga u le? Kai! Bonoi ubuta̱ wu ulinga!>> 5 Ɗa Firi'auna u lya'i kelime n kadanshi, <<Gogo na aza a Isaraila a yimkpa ta̱ ali a la'i aza a Masar n ka̱bunda̱i, ɗa yi a kuciga kusa̱nka̱ le ulinga.>>

6 A kanna ka nanlo ka, ɗa Firi'auna u danai aza e kelime a kinda agbashi a Masar, n aza kinda ulinga u tsugbashi wi Isaraila. 7 <<Ka̱sukpa̱i kuneke uma a nampa ci'iwa̱ adama a na a ya'anka iputa̱ tsu na a kiwanai. Ka̱sukpa̱i le a bana a̱ la̱nsa̱ n ka̱ci ke le. 8 Zuwai le a ya'an ka̱bunda̱i ki iputa̱ ka tsu na a kiwanai, ka̱ta̱ i jebeke le ka̱bunda̱i ki iputa̱ ka ba. Wonvoli u ɗa le, i ɗaɗa i zuwai ɗa i a kuya'anka mu ma̱shi n ka̱sukpa̱ le a bana a kakamba a ya'anka Ka̱shile ke le alyuka. 9 Nekei le ulinga wa atakaci ka̱ta̱ a lya'a kelime n kuya'an, nannai wi ta̱ a kuzuwa le a̱ kpa̱ɗa̱ kuciya̱ kofon ka na a kupana a'uwa a nampa.>>

10 Ɗa aza a kinda ulinga u tsugbashi n aza a kinda agbashi a banai ɗa a danai uma ili i na Firi'auna u danai. <<Mi o kudoku me neke ɗa̱ ci'iwa̱ ba. 11 Banai i la̱nsa̱ tsu ɗa n ka̱ci ka̱ ɗa̱ a̱ ubuta̱ u na baci de dem i kuciya̱ tsu ɗa. Ama i lya'a kelime n kuya'an ka̱bunda̱i ki iputa̱ tsu na cau yi ishi a kuya'ansa.>> 12 Ɗa uma a a wacuwai a kubana a̱ ubuta̱ dem punu a iɗika i Masar a̱ kula̱nsa̱ ili i na a ci ya'anka ci'iwa̱. 13 Ama aza a kinda ulinga u tsugbashi wa o doku a gbarai le ka̱u, ɗa a̱ ka̱na̱i kudana le. <<Kanna de dem i ya'an iputa̱ tsu ka̱bunda̱i ka na yi ishi i ciya'ansa tsu ayin a na e ci neke ɗa̱ ci'iwa̱.>> 14 Ɗa aza e kelime a kinda agbashi a Masar a fabai aza Isaraila aza a na i a kinda aza ulinga u tsugbashi wa, ɗa e ecei. <<Yiɗa̱i i zuwai ɗa i kpa̱ɗa̱i kuzuwa agbashi a a ya'an iputa̱ na̱yin ko anana a shatangu tsu na ishi a kuya'ansa?>>

15 Ɗa aza a kinda ulinga u tsugbashi a Isaraila a banai u Firi'auna ɗa a̱ sa̱la̱ka̱i ni. <<Yiɗa̱i i zuwai ɗa vi ya'ankai agbashi a̱ nu nannai? 16 Babu vuza na u nekei tsu ci'iwa̱, ɗa kpamu a danai tsu <Ya'in iputa̱ tsu na cau yi ishi a kuya'ansa.> A̱ ka̱na̱i kulapasa tsu gbani na lo ta na unushi u tsu u ɗa ba, unushi u uma a̱ nu a ɗa.>>

17 Ɗa Firi'auna wu ushuki, <<Na lo dem i yoku i ɗa ba, wonvoli u ɗa. Ɗaɗa yi a kudanasa, <Ya'an tsu bana ci ya'anka Vuzavaguɗu alyuka.> 18 Walai i bono a̱ ubuta̱ wu ulinga. Babu vuza na u kuneke ɗa̱ ci'iwa̱, ama mayun ɗa sai i ya'an ka̱bunda̱i ki iputa̱ tsu na yi ishi i ci ya'ansa.>>

19 Aza a kinda aza ugbashi a Isaraila e yeve ta̱ gogo na a uwa ta̱ a̱ ka̱tsuma̱ ka atakaci a gbayin, ana a danai le, <<Ka̱ta̱ i jebe ka̱bunda̱i ki iputa̱, i kpa̱ɗa̱ kuyawa tsu na cau yi ishi i ci ya'ansa a kanna dem ba.>> 20 Ana a̱ uta̱i a̱ ka̱sukpa̱i Firi'auna, ɗa a gasai m Musa n Haruna aza a na ishi ɗe a kuvana le. 21 Ɗa a danai Musa n Haruna va, <<Ya'an Vuzavaguɗu we ene ili i na i ya'in ka̱ta̱ u ya'anka ɗa̱ afada. I zuwai tso okpoi nu mpasa m gbani-gbani u Firi'auna nu nkoshi m gba̱ra̱-gba̱ra̱ n ni feu. Gogo na i ɗikai kotokobi ɗa i nekei le e ekiye adama a na a una tsu.>>

22 Ɗa Musa u bonoi u Vuzavaguɗu ɗa u danai, <<Vuzavaguɗu, yiɗa̱i i zuwai ɗa vi nekei uma a̱ nu atakakaci nannai? Yiɗa̱i i zuwai ɗa vu suki mu? 23 Ali n ayin a na m banai u Firi'auna n kula ku nu adama a na n ya'anka yi kadanshi, u doku ta̱ u zuwaka uma a̱ nu atakaci n a̱bunda̱i. Ko ili vi keɓece adama a na vi isa le ba.>>