1 Ɗa a ya'in katalikalyuka o kusongu m maɗanga me megele, ugaɗi u ni u yawa ta̱ udashi u cindere n kagimi, wanshi u ni udashi u cindere n kagimi. Uɗa̱ngi u ni udashi u na̱shi n kagimi, wanshi n ugaɗi u katalikalyuka ka derere ɗa. 2 Ɗa a ya'in avana a ngo n na̱shi dem, adama na avana a n katalikalyuka ka okpo umatyangbani punu ubuta̱ u te, ɗa a paɗarai katalikalyuka n vuyum vi shili. 3 A ma'i mgbodo mi iyum adama a na a̱ tsungusu punu kokomo ka katalikalyuka ka, n sheburu, n a̱mbu, n aya a̱ njuvu, n a̱mbu a̱ kupura̱ka̱ a̱ga̱ruwa̱shi. Ucanuku wu ulinga u nampa a ya'an ta̱ u ɗa n vuyum vi shili. 4 Ɗa u ya'ankai katalikalyuka ka kazatsu ka̱ viyum vi shili, ɗa a ukai ka'a e mere-mere. 5 Ɗa a ukai nkawani n na̱shi, a ngon n na̱shi n kazatsu ka na a ya'in n iyum i shili, o okpo tsa̱ a̱ka̱na̱tsu ashamkpatsu a. 6 Ɗa u ya'in a̱ka̱na̱tsu a, m maɗanga me megele. Ɗa u paɗarai le n vuyum vu shili. 7 Ɗa a ukai a̱ka̱na̱tsu a punu a nkawani n na mi a ka a akambu ka katalikalyuka ka. Katalikalyuka ka ki ta̱ n kungu, ku na a ya'ankai ni.

8 U ya'in kasasu ka gbayin n kashamkpatsu n iyum i shili, m mindatsu ma na a̱ma̱ci a na a ci ya'an ulinga a̱ utsutsu u Ma̱va̱li mo Oɓolo.

9 Ɗa u kira̱i ulanga. N tsuɗaka, a kakashi ku usaki ka, a ca'a ta̱ ka'a n tsugbere tsu singai tsu tsuzogu tsu arikinla, udashi amangatawun n amangerenkupa (150), 10 koɓolo kpamu n ashamkpatsu kamanga n anci kamanga o okpo a na a ya'in n iyum i shili, ama okoɓotsu a ashamkpatsu n awin a, o okpo a azurufa. 11 Akashi a na a saki a uɓon u gaɗi wa, washin u le u yawa ta̱ amangatawun n amangerenkupa (150), ashamkpatsu kamanga e le, n anci kamanga, a ya'an ta̱ n iyum ishili, ama okoɓotsu n ashamkpatsu, n awin e le, a ya'an le ta̱ n azurufa.

12 N uteku u ka̱livi wanshi u ni u yawa ta̱ udashi amangatatsunkupa n u tawun, n nshikpu kupa n anci e le kupa. Ikoɓotsu a nshikpu ma, n awin e le, a ya'in a ɗa n azurufa. 13 N uɓon u kelime u kasana udashi amangatatsunkupa n u tawun. 14 Akashi a̱ utsutsu a na a saki a kakambu ke te ku utsutsu ka, ugaɗi u ni udashi kamanga n u re n kagimi, koɓolo n ashamkpatsu a tatsu n anci a tatsu feu, 15 ta kpamu nannai n kakambu ka nan ɗe. A saku ɗe akashi, a ya'an ugaɗi u na u yawai udashi kamanga n u re n kagimi, koɓolo n ashamkpatsu tatsu n anci a tatsu feu. 16 Akashi a ulanga a ra̱ka̱ a ya'an ta̱ le n tsugbere tsu uca'i tsu tsuzogu tsu arikinla. 17 Anci a ashamkpatsu a, a ya'in le n iyum i shili. Ama ikoɓotsu, n ashamkpatsu, n awin a, a ya'an le ta̱ n azurufa, ɗa kpamu a paɗarai gaɗi va ashamkpatsu va n azurufa, ikoɓotsu n awin a, a ya'an le ta̱ n azurufa.

18 Ɗa u ya'in kakashi ku utsutsu ku ulanga ka, n uca'i u tsugbere tsu singai, u mini mu usuni, m mini ma̱ ma̱ɗiya̱, m mini ma garula n tsugbere tsu uca'i tsu singai tsu tsuzogu. Wanshi u ni u yawa ta̱ udashi kamangankupa, uɗa̱ngi u ni udashi u cindere n kagimi, derere n akashi a usaki a ulanga a, 19 ashamkpatsu e le a̱ na̱shi a ɗa, n anci e le a̱ na̱shi a na a ya'in n iyum i shili, ikoɓotsu i le azurufa a ɗa, ikoɓotsu n awin a, a ya'in le ta̱ n azurufa. 20 Aguta a̱ ma̱va̱li ma kuciɓa n Ka̱shile ma ra̱ka̱, koɓolo n aguta a ulanga a dem, a ya'an le ta̱ n iyum i shili.

21 Nava ɗaɗa ucanuku u na a ya'ankai ulinga u kuma'a ku Ma̱va̱li ma kuciɓa n Ka̱shile, mu uzuwakpani. Ubuta̱ u na a zuwai nshemberu ma atali n na mi n wila̱ kupa u na Musa u nekei aza e Levi kadanshi a̱ pura̱, n uyevi u Itama maku ma Haruna Ganu. 22 Bezale maku ma̱ Uri vashi vu Huru a kumaci ku Yahuda u ya'in ili derere tsu na Vuzavaguɗu u danai Musa u ya'an, 23 koɓolo n Oholiyabu maku ma Ahisamaka a kumaci ku Dan, a̱yi keyevi ka'a ku ulinga u kuya'an tsuzogu ce ekiye n igani, ka̱ta̱ u rumbuku m mini mu usuni, m ma na mo yotsoi mini ma garula, n tsu mini ma̱ ma̱ɗiya̱, n tsugbere tsu arikinla tsu singai. 24 Azanariya a na a̱ tuka̱i ra̱ka̱ adama alyuka a̱ kuɗa̱ngusa̱ a na a kuya'anka ulinga u kuma'a Ma̱va̱li mo Oɓolo ma, a yawa ta̱ a̱miki a kagisamkpatsu amangatawunkuci n amanga̱na̱shinkupa n i cindere (997) n agisamkpatsu i na a ci ya'anka ulinga a̱ ubuta̱ u ma̱va̱li ma ciɗa. 25 Zurfa a na a isai a̱ ubuta̱ u uma a na e kecei, a yawa ta̱ a a̱miki a kagisamkpatsu a̱kpa̱n a tatsu n amangatawa̱na̱shi n kamangankupa (3, 430), uteku tsu na a gisanki n kagisamkpatsu ku ubuta̱ u Ma̱va̱li ma ciɗa, 26 vuma lakam vu na e kecei, aza a na a̱ya̱'a̱ e le a yawai kamanga a kubana gaɗi, u tsupa ta̱ kagimi ka agisana ka azurufa, agisana a na i a kuya'anka ulinga a̱ ubuta̱ u Ma̱va̱li mo Oɓolo. Uma a a yawa ta̱ a̱kpa̱n amangatawa̱nta̱li n a̱kpa̱n a tatsu n amangatawantawun n amangerenkupa (603, 550). 27 A ya'an ta̱ ulinga n kilo kamangankupa n vu na̱shi va azurufa, a̱ ubuta̱ u kuma'a ku anci amangatawun a̱ Ma̱va̱li mo Oɓolo, ɗa a ya'in kpamu ulinga n azurufa kamangankupa n a̱ na̱shi a kanci dem adama a kakashi ku utsutsu ka feu. 28 A kilo kamangankupa va azurufa vu na vu buwai, vu ɗa a ya'ankai ikoɓotsu n awin a na a paɗarakai gaɗi va ashamkpatsu va.

29 Kune'e ki iyum i shili i na uma a̱ tuka̱i, ku yawa ta̱ a̱miki a kagisamkpatsu a̱kpa̱n e re n amangatawa̱na̱shi n kamanga n tawun (2, 425). 30 A ya'ankai ulinga n i ɗa, a ya'in anci a̱ utsutsu u Ma̱va̱li mo Oɓolo, n katalikalyuka kpamu n kazatsu ki iyum i shili, n ili yu ulinga i ni dem, 31 ali n anci a na a̱ ka̱ra̱ka̱i ulanga u ma̱va̱li wa, n aza na i utsutsu, koɓolo n aguta ra̱ka̱ a̱ Ma̱va̱li ma kuciɓa n Ka̱shile ma, n aza na kpamu a̱ ka̱ra̱'i ulanga wa.