1 Ana Ibirahi u ka̱sukpa̱i uɓon u nanlo ɗa u lazai a kubana a uɓon u ɗaka vu Kana'ana ɗa u yongoi e mere me Kadeshi n Shuru. U yongoi ɗe ali ayin ukeci an komoci a Gera, 2 ɗa Ibirahi u danai le ukuna u vuka vi ni Saratu, <<Taku vu va̱ ɗa.>> Ɗa Abimeleki mogono ma Gera u danai a banka yi n Saratu.

3 Ama n kayin ko yoku, Vuzavaguɗu u yotsongi ka̱ci ka̱ ni u mogono Abimeleki tsa alatani ɗa u danai ni, <<Vi ta̱ a̱ kukuwa̱ adama a na vi ɗika ta̱ vuka vu nampa, vu na vi ya'in ɗe yolo.>>

4 Ama a̱yi Abimeleki ka̱ta̱ u sa'wa kuyawa ɗevu n Saratu ba. Ɗa u danai, <<Vuzavaguɗu mi n unushi punu na ba! Vi ta̱ a kuna mu n uma a̱ va̱ dem? 5 Ibirahi n ka̱ci ka̱ ni u danai, na va taku vi ni ɗa. Ɗa vuka va feu vu danai nannai. N ya'an ta̱ ili i nampa ya n ka̱ɗu ke te mpa n nusa ba.>>

6 Ɗa Vuzavaguɗu u danai ni punu a̱ ubuta̱ wa alatani wa, <<E n yeve ta̱ vi ya'an ta̱ nannai n ka̱ɗu ke te, n sa̱nka̱ wu ta̱ kuya'an unushi a kubana wa̱ va̱, n ka̱sukpa̱ wu vu sa'wa yi ba. 7 Ama gogo na bonoko n vuka va u vali vi ni. A̱yi keneki ka'a, wi ta̱ a kuya'anka wu avasa adama a na vi yongo n wuma. Ama mi ta̱ a kudana wu vu bonoko yi baci ba, vi ta̱ a̱ kukuwa̱ avu n uma a̱ nu.>>

8 Ana kayin kasai ɗa Abimeleki u ɗekei aza gbagba'in a̱ ni dem a bana, ɗa u danai le ili i na i ya'in dem ɗa ra̱ka̱ vi le ɗa a panai wovon. 9 Ɗa Abimeleki u ɗekei Ibirahi ɗa we ecei ni, <<Yiɗa̱i i zuwai ɗa vi ya'ankai tsu nahannai? Unushi we ne u ɗai n ya'ankai nu ɗa vi a kuya'anka mu atakaci a nampa, mpa n ubuta̱ u tsugono u va̱ dem? Vi ya'anka mu ta̱ ili i na i kpa̱ɗa̱i kuga'an vi ya'anka mu.>> 10 Ɗa Abimeleki we ecei ni, <<Yiɗa̱i i zuwai ɗa vi ya'in nannai?>>

11 Ɗa Ibirahi wu ushuki u danai, <<N ya'an ta̱ nannai adama a na n zuwa ta̱ uma a nampa a i n wovon u Ka̱shile ba, ta lo a kuna mu ka̱ta̱ a isa mu Saratu vuka vu va̱. 12 Ko n nannai taku vu va̱ ɗa mayun, adama a na mekere me esheku a̱ va̱ ma'a mma ɗa de vi tsu vi te ba, ɗa n ɗikai ni yolo. 13 A ayin a na Ka̱shile ka zuwai mu n ka̱sukpa̱ kpa'a ke esheku a̱ va̱ a kubana a iɗika i yoku, ɗa n danai ni, <Uteku u na vo kuyotsongu ucigi u nu a kubana wa̱ va̱ u ɗaɗa na, ubuta̱ u na baci tsu banai dem, vu dana, <<A̱yi taku vu va̱ ɗa.>> > >>

14 Ɗa Abimeleki u bonokoi Ibirahi n vuka vi ni Saratu, ɗa u nekei ni anaka, nlala koɓolo n agbashi a ali n a̱ma̱ci. 15 Ɗa Abimeleki u danai ni, <<La̱na̱ na iɗika i va̱ i ɗa ra̱ka̱ zagba ubuta̱ u na u ga'in nu kuyongo ka̱ta̱ vi yongo ɗe.>>

16 Ɗa Abimeleki u danai Saratu, <<Mi ta̱ e kuneke tavu Ibirahi Azurufa ka̱kpa̱n adama a na wo okpo urotu mpa n ya'an ili n avu ba, e kelime ka uma dem. Babu vuza na kpamu u kinda wu adanshi vi ya'an ta̱ unushi.>>

17 Ɗa Ibirahi u ya'ankai Abimeleki kavasa ɗa Ka̱shile ko potsokpoi ni n a̱ma̱ci a̱ ni n agbashi a̱ a̱ma̱ci a̱ ni dem adama a na a matsa muku kpamu. 18 Adama a na Vuzavaguɗu u ɓa̱ya̱ngu ta̱ amatsatsu dem a kpa'a ku Abimeleki adama a vuka vi Ibirahi Saratu.