1 Ɗa Ibirahi u zuwai vuka vi yoku kula ku ni ku ɗa Ketura. 2 Ɗa u matsakai ni Zimiran n Jokashan m Medan m Medan n Ishibaku koɓolo n Shuwa. 3 Jokashan a̱yi ɗa esheku e Sheba n Dedanu. Muku n Dedanu ele ɗa aza a Ashurim n aza a Letushim n aza a Le'umim. 4 Muku m Midiya ele ɗa anan Efa n Eferu n Hanoku, n Abida n Eleda. Dem vi le ntsukaya n Ketura n ɗa.

5 Ibirahi u nekei Ishaku ili yu uka̱ni i ni i na wi n i ɗa dem. 6 Ama muku n ali ma̱ a̱ma̱ci a na u zuwasai, ɗa u nekei le kune'e, ali a̱yi bi'i n wuma adama a na a̱ ka̱sukpa̱ Ishaku, ɗa o tonoi a kubana a iɗika i kasana.

7 Ibirahi u ya'an ta̱ a̱ya̱ amangatawun n amangatatsunkupa n a tawun (175). Ɗa u kuwa̱i. 8 Ibirahi u yinvikai ayinviki a ukocishi ɗa u kuwa̱i a̱ ka̱tsuma̱ ka̱ a̱ya̱ a singai. A̱ya̱ a̱ ni a yimkpa ta̱ ɗa u yongoi kpamu gbaga tsu na u ga'in. Ɗa u banai u cinai ikaya i ni. 9 Muku n ni Ishaku n Isuma'ilu a̱ ciɗa̱ngi ni a kaɓatsu ka Makapele kasana m Mamure a̱ ubuta̱ u Iforono maku ma Zoharu vuza va aza Hitiya. 10 Ubuta̱ u na Ibirahi u tsulai wa aza a Hitiya, ta punu a̱ ciɗa̱ngi ni ubuta̱ u te n vuka vi ni. 11 Ana Ibirahi u kuwa̱i, ɗa Ka̱shile ka zuwakai maku ma̱ ni Ishaku una̱singai. Vuza na u yongoi ɗevu m Biya-lahi-royi.

12 Na va ɗaɗa arabali a̱ muku mi Isuma'ilu, maku ma na maku mu usuki ma Saratu Hajara vuza va aza a Masar u matsakai Ibirahi.

13 Na va ɗaɗa ula a̱ muku mi Isuma'ilu, a ɗanai a ɗa uteku u na a matsai le, Nebatu a̱yi ɗa maku ma iyain ma Isuma'ilu n Kedaru n Adabelu, m Mibisam kpamu, 14 m Mishima n Duma koɓolo m Masa, 15 n Hadadu koɓolo n Tema, n Jeturu, Nafishi n Kedema. 16 Na va ɗaɗa muku mi Isuma'ilu n ula e le, yaba dem n likuci n ka̱tsura̱ ka na wi a kulya'a tsugono, ele ngono kupa ni n re n ɗa tsu na umaci u le wi. 17 A̱yi Isuma'ilu u ya'an ta̱ a̱ya̱ amangatawun n kamangankupa n e cindere (137) ɗa kpamu u ya'in ayinviki a ukocishi a̱ ni, ɗa wu uvukai n ikaya i ni. 18 Ntsukaya n ni a̱ da̱sa̱ngi ta̱ a uɓon u Havila a kubana a Shuru a uɓon wu uteku m Masar, vu tono baci a kubana Asiriya. Ɗa o yongoi a tsurala n otoku i le.

19 Na va ɗaɗa arabali a Ishaku maku mi Ibirahi.

Ibirahi ɗa esheku a Ishaku. 20 Ayin a na Ishaku u yawai a̱ya̱ a amangere, ɗa a ya'in yolo n Rebeka, mekere ma Betuwe (vuza va aza a Aramiyan vu na wu uta̱i a Fada-aram). Rebeka kpamu taku vu Laban vuza va Aram ɗa.

21 Ama Rebeka madari ma'a, ɗa Ishaku u ya'ankai ni kavasa. Vuzavaguɗu wi isai avasa a nanlo, ɗa Rebeka u ciya̱i ka̱tsuma̱. 22 Muku n gita̱i punu kunekenei atakaci punu a̱ ka̱tsuma̱ ka uteku u le, ɗa u danai, <<Yiɗa̱i nannai a̱ kuciya̱ mu?>> U banai u Vuzavaguɗu n avasa adama a na u ciya̱ wu ushuki.

23 Ɗa Vuzavaguɗu u danai ni, <<Iɗika i re yi ta̱ punu a̱ ka̱tsuma̱ ka̱ nu, mpeshe n na mi punu wa̱ nu va i ta̱ a kuya'an tsurala. Vuza te u kula'a ta̱ vuza ni, vuzagbayin va u kubono ta̱ o kutono vangu.>>

24 Ana ayin a kumatsa a yawai, ɗa u matsai mpeshe olobo koci. 25 Vuza na u gita̱i kuta̱ wu uta̱i ushili, ikyamba i ni adanshi motogu me cileme ma'a u ukai. Ɗa e ne'i ni kula Isuwa.*25:25 Aza a Yahuda a matsa baci mpeshe, vuza na u gita̱i kuta̱, a̱yi ɗa vuzagbayin. N kadanshi ka aza a Yahuda, kula ku <<Isuwa>> ɗaɗa <<Cileme.>> 26 Ɗaɗa yeve vuza ni u tonoi, n kukiye ku ni uka̱ni a̱ ka̱civa̱ ka Isuwa. Ɗa e ne'i ni kula Yakubu.†25:26 N kadanshi ka aza a Yahuda kula Yakubu izumgbi i te i ɗa n <<Ka̱civa̱>> n <<Kodori>> (vuza na u ci lya'a uma). La̱na̱ 27:36. Ishaku wi ta̱ n a̱ya̱ amangatatsu ayin a na a matsai muku n nanlo.

27 Ana olobo a o gbonguroi, ɗa Isuwa wo okpoi katain ku utsura, vuma vu ucigi u kakamba. Ama, Yakubu vuma vu ka̱bini ɗa n ucigi u kpa'a kpamu. 28 Ishaku u la'a ta̱ n kuciga Isuwa, adama a inyama i na u tsu una ka̱ta̱ u bonoko a kpa'a. Ama, Rebeka u la'a ta̱ n kuciga Yakubu.

29 Kanna ke te, ana Yakubu wi a ku su'wan kpayan, ɗa Isuwa u yawai wana ɗai wu uta̱ a kutambu. Wi ta̱ ta na a kupana kambulu. 30 Ɗa u danai Yakubu, <<Ne'e mu ilikulya'a m kpayan ku shili, n lya'a mi ta̱ a kupana kambulu.>> (Ɗaɗa i zuwai ɗa e ɗekei ni Edom.)‡25:30 N kadanshi ka aza a Yahuda kula ku <<Edom>> ɗaɗa feu <<Ushili.>>

31 Ɗa Yakubu wu ushuki, <<Mi ta̱ e kuneke wu, vi denke mu baci tsugbayin tsu nu, mo okpo vuza kelime vu nu.>>

32 Isuwa u danai, <<U ga'an ta̱! Mi ta̱ ɗevu n ukpa̱, yi ɗa̱i tsugbayin tsa kuya'anka mu?>>

33 Ɗa Yakubu u danai, <<Kucina bi'i, ve kudenke mu baci tsugbayin tsa.>>

Ɗa Isuwa u kucinai, ɗa u denke vangu va tsugbayin tsa.

34 Ɗa Yakubu u nekei Isuwa boroji m kpayan. U lya'i ɗa u so'i, yeve u ɗa̱nga̱i u lazai. Ta Isuwa u ya'in nannai ɗa u goyoi tsugbayin ci ni.