1 A ayin a na Ishaku u kutsai ali ɗa a̱shi a̱ ni a̱ gita̱i kuyimba̱na̱. U ɗekei maku ma̱ ni ma gbayin Isuwa, u danai, <<Maku ma̱ va̱.>>

Ɗa wu ushuki, <<Mpa ɗa na.>>

2 Ishaku u danai, <<Ye ene ta̱ n kutsa ta̱, ukpa̱ kpamu u buwa mu m megeshe ba. 3 Ɗika ucanuku u kutambu u nu, utan m majiki ma̱ nu, ka̱ta̱ vu bana a kakamba, vu una ka mu manama. 4 Ya'an ilikulya'a i na n cigai ka̱u, ka̱ta̱ vu tuka̱ mu. Ayin a na baci n lya'i i ɗa, mi ta̱ a kuzuwaka wu una̱singai u va̱, kafu n kuwa̱.>>

5 Ayin a na Ishaku wi a kadanshi n Isuwa, Rebeka lo a kupana. Ana Isuwa u banai kuya'an kutambu ka, 6 ɗa Rebeka u danai Yakubu, <<Gogo na ɗa n kotsoi kupana eshevu a kudana Isuwa, 7 <Tuka̱ mu n vinyama vu kakamba, ka̱ta̱ vu su'wanka mu kusa'an ku singai. Ayin a na baci n lya'i ka̱ta̱ n zuwaka wu una̱singai a̱ ubuta̱ u Vuzavaguɗu, kafu n kuwa̱.> >> 8 Rebeka u lya'i kelime, <<Maku ma̱ va̱, panaka mu, ka̱ta̱ kpamu vi ya'an ili i na n danai nu. 9 Bana a ushiga wu nlala, ka̱ta̱ vi ɗika muku mu nga̱ji n re n singai, adama a na n ya'anka eshevu kusa'an ku singai ku na u cigai va. 10 Ka̱ta̱ vu ɗika vu banka yi u lya'a, adama a na u zuwaka wu una̱singai, kafu u kuwa̱.>>

11 Ama ɗa Yakubu u danai a̱na̱ku a̱ ni Rebeka, <<La̱na̱ vuza va̱ wi ta̱ n cileme n a̱bunda̱i a ikyamba i ni, mpa ta na ukpan wi ikyamba u va̱ wi ta̱ molu-molu. 12 Ta̱wa̱ baci dada u papurasa mu ɗa u yevei a na mi a kuciga kudoro yi, wi ta̱ a̱ kuka̱sukpa̱ kuzuwaka mu una̱singai ka̱ta̱ u kucikpa u zuwaka mu u gbani-gbani.>>

13 Ɗa a̱na̱ku a a danai, <<Ka̱sukpa̱ una̱ wa u tono mu maku ma̱ va̱, avu de tono kadanshi ka̱ va̱ ka̱ta̱ vu bana vi ciya̱ka̱ mu i na n danai.>>

14 U banai u tuka̱i muku mu nga̱ji ma wa̱ a̱na̱ku wa, ɗa u su'wain kusa'an ku na esheku a a la'i n kuciga va. 15 Ɗa Rebeka u ɗikai motogu ma singai mo kolobo ka gbayin ka̱ ni Isuwa, ma na u la'i n kuciga ma na u zuwai a kpa'a. Ɗa u ukai ma'a kolobo ke kenu ka̱ ni Yakubu. 16 U ukai ni ukpan u malala ma e ekiye, ɗa u palai kpamu uɓon u kuɗeku u na wi babu cileme. 17 Ɗa u nekei maku ma̱ ni Yakubu ilikulya'a i na esheku a cigai va m boroji vu na u kangalai.

18 Yakubu u banai we esheku. Ɗa u danai, <<Dada.>>

Ɗa wu ushuki u danai, <<Nini ɗai maku ma̱ va̱, Avu ɗa maku ma̱ va̱ me ne?>>

19 Yakubu wu ushuki, <<Mpa ɗa maku ma̱ nu ma gbayin ma iyain, Isuwa. N ya'an ta̱ ili i na vu danai mu. Ɗenga̱ vu da̱sa̱ngu, vi lya'a ilikulya'a i na n tuka̱i nu, ka̱ta̱ vi zuwaka mu una̱singai u nu.>>

20 Ishaku we ecei maku ma̱ ni, <<Nini ɗai vi ya'in ɗa vi ciya̱i gogo'o nahannai?>> Ɗa wu ushuki, <<Adama a na Ka̱shile Vuzavaguɗu u neke mu ta̱ aga'in a singai.>> 21 Ɗa Ishaku u danai Yakubu, <<Ta̱wa̱ na adama a na n sa'wa wu, maku ma̱ va̱ adama a na n yeve ko mayun avu ɗa Isuwa vu va̱ va ko avu ɗa ba.>>

22 Yakubu u yawai ɗevu n esheku a̱ ni. Ana Ishaku u sa'wai ni ɗa u danai, <<Ka̱la̱ka̱tsu ka̱ nu ko yotso ta̱ ka Yakubu, ama ekiye a̱ nu n cileme ci Isuwa.>> 23 U yeve an Yakubu ɗa ba, adama a na ekiye a̱ ni i ta̱ n cileme ci Isuwa. Adama a nannai ɗa u zuwakai ni una̱singai. 24 Ɗa u danai, <<Avu ɗa gaji maku ma̱ va̱ ma?>> Ɗa wu ushuki u danai <<Mpa ɗa.>>

25 <<Tuka̱ mu n inyama i na vi ciya̱i va adama a na n takuma, ka̱ta̱ n zuwaka wu una̱singai.>> Ɗa u bankai ni ɗa u takumai; ɗa u bankai ni m ma̱kya̱n ɗa u so'i. 26 Ɗa Ishaku u danai ni, <<Ta̱wa̱ ɗevu vu papura mu, maku ma̱ va̱.>>

27 Ɗa Yakubu u yawai ɗevu ɗa wo oɓongi ni, Ɗa Ishaku u tsumgbai ni ɗa u tsumgbai ma̱gula̱ni mo ntogu ma̱ ni, ɗa u zuwakai ni una̱singai. U danai,

30 Ishaku u kotsoi kuzuwaka Yakubu una̱singai. Ana u lazai, ɗa mokoshi ma̱ ni Isuwa wu uta̱i a̱ ubuta̱ u kutambu u yawai. 31 A̱yi kpamu u ya'in ilikulya'a i ni, i na esheku a cigai va, ɗa u tuka̱i esheku a̱ ni. U danai ni, <<Dada, ɗa̱nga̱ vu da̱sa̱ngu, adama a na vi lya'a ilikulya'a n inyama i na n tuka̱i nu va, ka̱ta̱ vu zuwaka mu una̱singai u nu.>>

32 Ishaku we ecei ni, <<Avu ɗa ya?>>

Isuwa wu ushuki, <<Mpa ɗa maku ma̱ nu ma gbayin ma iyain, Isuwa.>>

33 Ishaku u ka̱na̱i kuya'an mereve ka̱u. Ɗa u danai, <<Yayi tamkpamu wu unai inyama ya, ɗa u tuka̱i mu va? N lya'a ta̱ gogo na, kafu vu ta̱wa̱. N zuwaka yi ta̱ ɗe una̱singai u va̱ gbende, u ɗa ta na uteku nannai.>>

34 Ana Isuwa u panai nannai, ɗa u shika̱i n utsura. U doku u danai, <<Zuwaka mu feu una̱singai u nu, Dada.>>

35 Ishaku u danai ni, <<Vangu vu nu vu ta̱wa̱ ta̱, ɗa u doroi mu. U ɗika ta̱ ɗe una̱singai u nu ra̱ka̱.>>

36 Ɗa Isuwa u danai, <<Mayun ɗa kula ku ni Yakubu, *27:36 La̱na̱ 25:26. adama a na ire ɗa na u doki kudoro mu. I iyain i ɗaɗa u ɗika ta̱ tsugbayin tsu va̱, i ire kpamu ɗa wi isai una̱singai u va̱.>>

37 Ɗa Ishaku u danai Isuwa, <<M bonokoi ta̱ ɗe vuzagbayin vu nu, aza a̱ ni kpamu o okpo aza a na o kutono yi, n neke yi ta̱ ilya n ili i kuso'o dem. Yiɗa̱i i buwai i na n kufuɗa kuya'anka wu gogo na, maku ma̱ va̱?>>

38 Ɗa Isuwa we ecei esheku, <<Dada una̱singai u te u ɗa vi n u ɗa koci?>> Ɗa Isuwa u ɗengusa̱i ka̱la̱ka̱tsu ka̱ ni ɗa u shika̱i.

39 Ɗa esheku a a dansai ɗa u danai ni

41 Ɗa Isuwa u ka̱na̱i tsurala n Yakubu adama a una̱singai u na esheku e nekei ni. Ɗa Isuwa u sheshei n ka̱ɗu ka̱ ni, ɗa u danai, <<Ayin a kpalu m ma̱shi e esheku a̱ va̱ a yawa ta̱, ya'an mu una̱ Yakubu.>>

42 Ana a danai Rebeka ili i na Isuwa u sheshei kuya'an ɗa u suki e ɗeke Yakubu, ɗa u danai ni, <<Yakubu, vuza nu wi ta̱ ɗe e kusheshe uteku u na u kuna wu. 43 Gogo na maku ma̱ va̱ pana kadanshi ka̱ va̱ ka̱ta̱ vu tono ka'a, suma vu bana u taku vu va̱ Laban na ɗe a Haran, 44 vu da̱sa̱ngu ɗe sai ayin a na ka̱ɗu ko mokoshi ma̱ nu ka vaki. 45 Ayin a na baci wupa u mokoshi ma̱ nu u kotsoi. Mi ta̱ a̱ kusuku vuza yoku u bana u dana wu vu bono. Nini ɗai n kunamba ɗa̱ aza e re dem a kanna ke te?>>

46 Ɗa Rebeka u danai Ishaku, <<Mpa mo'uta̱ n ukuna wa̱ a̱ma̱ci aza Ahitiya. Yakubu u ɗika baci vuka a̱ ka̱tsuma̱ ka uma a nampa, u kula'a ta̱ n kuga'an wuma u va̱ u laza.>>