1 Yakubu we enei Isuwa a̱ kuta̱wa̱ n uma amangatawun a̱ na̱shi. Ɗa u pecekei Liyatu n Rahila muku ma koɓolo n agbashi e nkere e re a. 2 U zuwai agbashi e nkere e re a koɓolo m muku n le kelime, ɗa o tonoi n Liyatu m muku n ni, ɗa yevei Rahila n Isufu o kotsosoi. 3 Yakubu u lazai kelime ke le ɗa u kuɗa̱ngi u lya'akai mokoshi ma̱ ni kayala a̱yi a kuyawa ɗevu n a̱yi ali kucindere.

4 Ama ɗa Isuwa u sumai u banai u gasai n a̱yi, u ba̱ra̱kpa̱i ekiye a̱ ni ɗa wo oɓongi ni, ɗa a̱ shika̱i gbende vi le. 5 Ana Isuwa u la̱na̱ki ɗa we enei a̱ma̱ci m muku, ɗa we ecei, <<Ana yayi koɓolo n avu na?>>

Ɗa Yakubu wu ushuki, <<Ele na, ele ɗa muku n na Ka̱shile ke nekei mu.>>

6 Ɗa muku usuki n le a yawai ɗevu ɗa a̱ kuɗa̱ngi a lya'i kayala feu; 7 Ɗa Liyatu m muku n ni a̱ ta̱wa̱i a̱ kuɗa̱ngi a lya'i kayala, ɗa kpamu Isufu n Rahila o kotsosoi kuta̱wa̱ kukuɗa̱ngu kulya'a kayala feu.

8 Isuwa u danai, <<Yiɗa̱i ugboku-ugboku u uma u na me enei na wi a kudansa?>> Ɗa Yakubu wu ushuki u danai, <<Adama a na n ciya̱ kasingai wa̱ nu.>>

9 Ɗa Isuwa u danai, <<Ili i na mi n i ɗa i yawa mu ta̱, vuza za̱; wala n ili i na vi n i ɗa.>>

10 Yakubu u danai, <<A̱'a̱, n ciya̱ baci mapasa ma singai wa̱ nu, isa kune'e ku va̱ ku na n tuka̱i. We ene u na me enei nu wi ta̱ adanshi Ka̱shile ka'a me enei, an vi isai mu tsu ka̱ja̱'a̱ ka̱ nu. 11 Adama a̱ Ka̱shile isa kune'e ku na n tuka̱i nu na, Ka̱shile ka ciga mu ta̱ ɗa ki e kunekeshe mu ili i na n cigai dem.>> Yakubu u lya'i kelime n kugutsuka yi ali u ta̱wa̱i wi isai.

12 Ɗa Isuwa u danai, <<Tsu foɓusoi tsu walai. Mi ta̱ a kuwala kelime ka̱ ɗa̱.>>

13 Yakubu u danai ni, <<Vi yeve ta̱ muku ma, n kuzuwa nu nlala dem ali m muku n le o o'o ta̱. A̱ ka̱na̱ baci kuloko le ali kanna ke te, i ta̱ a̱ kukuwa̱ ra̱ka̱. 14 Wala kelime ka̱ va̱, ka̱ta̱ mpa n tono sawu, ali n dakaka tsu na n kufuɗa koɓolo n kuzuwa ka m muku ali a kubana a̱ ubuta̱ u na n kucina wu a Edom.>>

15 Ɗa Isuwa u danai, <<Ya'an n ka̱sukpa̱ka̱ wu uma a̱ va̱ o yoku.>>

Ama ɗa Yakubu wu ushuki, <<Na lo wi n kakuna ba, mpa de n ciga ta̱ n ciya̱ kasingai wa̱ nu, wi ta̱ a kuyawa mu.>>

16 A kanna ka nanlo Isuwa u gosoi o kubono a Edom. 17 Ama Yakubu u banai o Sukotu, a̱ ubuta̱ u na u ma'akai ka̱ci ka̱ ni kpa'a koɓolo n ubuta̱ u kuzuwa u ni. I ɗaɗa i zuwai ɗa e ne'i ubuta̱ wa kula Sukotu.

18 Ana Yakubu wu uta̱i Fada'aram ɗa u yawai Shekem m ma̱ta̱na̱ a iɗika i Kana'ana, ɗa u shikpa̱i ka̱pa̱m ka̱ ni lo ɗevu n likuci ya. 19 A̱ muku n Hamo, esheku e Shekem, Yakubu u tsulai ubuta̱ u na u zuwai kpa'a ku ni ali Azurufa amangatawun. 20 Ta ɗe u ma'i katalikalyuka ɗa u ne'i ka'a kula El-elohe vi Isaraila, ɗaɗa Ka̱shile ki Isaraila.