1 Ayin o yoku ɗe ɗa vuza kelime vi kuneke mogono ili i kuso'o n vuza na u tsu kangala boroji a ya'ankai vuza kpa'a vi le mogono ma Masar unushi. 2 Ɗa mogono Firi'auna u ya'in wupa n ele ka̱u. 3 U ɓa̱ya̱ngi le a kpa'a ku vuza kelime vu kinda mogono ma, a ubuta̱ wu ugbashi u na a̱ ɓa̱ya̱ngi Isufu. 4 Vuza kelime vi kinda agbashi va u zuwai Isufu kelime ke le, u vanai le; ɗa o yongoi ɗe ali sai ayin o yoku kenu.

5 Kayin ko yoku ɗe a̱ kunu ku ugbashi ka, vuza na u ci neke mogono ili i kuso'o n vuza na u tsu kangala boroji vu mogono ma aza a Masar va a ya'in alatani, alatani a ta na a kudansa ili kakau. 6 Ana Isufu u ta̱wa̱i we le n usana, ɗa we enei i punu m ma̱za̱nga̱ ba. 7 We ecei aza a ulinga u gbagba'in a Firi'auna, aza a na i koɓolo n a̱yi a kpa'a ku vuzagbayin vi ni, <<Yiɗa̱i i la̱nga̱sa̱i a̱shi anana nannai?>> 8 A danai ni, <<Ci ya'an ta̱ alatani, babu vuza na u kudana tsu ili i na i a kudana.>> Ɗa Isufu u danai le, <<Kuyeve ili i na alatani i a kudansa ta ki a̱ ubuta̱ u Ka̱shile ba? Danai mu a ɗa.>>

9 Ɗa vuzagbayin vu kuneke mogono ili i kuso'o u danai Isufu alatani a̱ ni, u danai, <<A̱ ubuta̱ wa alatani u va̱ me enei ma̱ɗimbi ma Ayahudawa, 10 A̱ ma̱ɗimbi ma acaka a tatsu i ta̱ ɗe. Ana o kotsoi kutopo, a̱pa̱lu a ya'in a kubana megeshe kenu ɗa u gita̱i kumatsa. 11 Matan ma Firi'auna punu e ekiye a̱ va̱, ɗa n ta'ai umaci u mambulu n ka̱na̱i kupisha punu a matan ma Firi'auna ma, ɗa n nekei matan ma e ekiye a Firi'auna.>> 12 Isufu u danai, <<Ili i na ili i nampa yi a kudana i ɗa na: acaka a tatsu a nanlo i ta̱ a kadanshi ka ayin a tatsu. 13 A̱ ka̱tsuma̱ ka ayin a tatsu Firi'auna wi ta̱ kudengusa wu ka̱ta̱ u bonoko wu a̱ ubuta̱ u vuzagbayin vu nu; ka̱ta̱ avu vi neke Firi'auna matan ma̱ ni e ekiye, tsu na vi ishi vi ci ya'an ayin a na vi ci neke yi ili i kuso'o. 14 Ama ayin a na baci ukuna u ga'in nu vi ciɓa nu mpa; ya'anka mu kasingai ka̱ta̱ vu dansa ukuna u va̱ a̱ ubuta̱ u Firi'auna, adama a na a̱ uta̱ka̱ mu punu a̱ ubuta̱ u nampa. 15 Adama a na o boko mu ta̱ a iɗika ya aza a Ibirahi; ko punu na a Masar n ya'an ili i na i yawai a zuwa mu a ugbashi ba.>>

16 Ana vuza kelime vu kukangala boroji we enei ili i na alatani a i a kudansa i ga'an ta̱, u danai Isufu, <<Mpa feu n ya'an ta̱ alatani: me enei mbana ma akala n tatsu a kaci ka̱ va̱, 17 punu a mabana ma gaɗi ili yi ukangali yi ta̱ ɗe kakau i singai-singai i na a ya'ankai Firi'auna, ama nnu a kulya'a i ɗa a gaɗi vu kaci ka̱ va̱ ka ɗe.>> 18 Isufu wu ushuki u danai, <<Ili i na i a kudana i ɗa na: mbana n tatsu ma ayin a tatsu a ɗa. 19 A̱ ka̱tsuma̱ ka ayin a tatsu a nanlo Firi'auna wi ta̱ a kugbatya kaci ka̱ nu, ka̱ta̱ u saku keven ki ikyamba ka̱ nu a maɗanga; nnu n takuma keven ki ikyamba ka̱ nu ka.>>

20 A kanna ka tatsu, ɗa kpamu kanna ka na a matsai Firi'auna, u ya'in ka̱ɗiva̱ adama a agbashi a̱ ni ra̱ka̱, ɗa u ɗengusa̱i vuza na u ci neke yi ili i kuso'o koɓolo n ka vuza na u tsu kangalaka yi boroji e mere ma agbashi a̱ ni. 21 U bonokoi vuza kelime vu na u ci neke mogono ili i kuso'o a̱ ubuta̱ u na wi ishi, ɗa u nekei Firi'auna matan e ekiye, 22 ama ɗa u saki vuza kelime vu kukangala boroji, derere tsu na Isufu u danai le. 23 Ama vuza kelime vu kuneke mogono ili i kuso'o u ciɓa bi'i n Isufu ba, u cinukpai n a̱yi.