11
Ucigi u Ka̱shile wa aza a Isaraila
1 A makyan ma na Isaraila wi maku me kenu, n ciga yi ta̱,
ɗe a Masar n ɗekushei ni maku ma̱va̱.
2 A makyan ma na mi a kudoku kuɗekushe le,
ta feu kpamu i a kulyaꞋa kelime n kuyaꞋan kugoyi nannai.
ɗa i a kuneke Balu alyuka,
i a kusongu ku yi ili i ma̱gula̱ni.
3 Ko a na wo okpoi mpa ɗa n piꞋisakai Ifirayimu nwalu.
N ɗikai le ekiye a̱ va̱,
ama e yeve a na mpa ɗa n la̱na̱i le ba.
4 N ronoi le n tuka̱i wa̱ a̱ va̱ n awin a usuɓi,
n shiyai le n ucigi,
ba n awin atakaci tsu irala i ɗa̱ ba.
mo okpoi le tsu vuza vu kuɗika kogboro eɗeku e le.
ɗa n kuɗa̱ngi n lyaꞋatangi le.
5 Tsu na wo okpoi uma a̱ va̱ a iwain kubono a ubuta̱ u va̱,
i ta̱ o kubono a iɗika i masar,
mogono ma Asiriya tana wi ta̱ a kulyaꞋaka le tsugono.
6 Kotokobi ko kuvon ki ta̱ a la̱nga̱sa̱ likuci i le,
kuvon ki ta̱ a ku una anan ganu va̱ a̱ma̱li e le,
adama odoki a gbani-gbani e le.
7 Uma e sheshe ta̱ ɗa a̱ ka̱sukpa̱i mu,
ko tsu na wo okpoi e ɗekushe mu Vuzavaguɗu,
babu vuza na u cikpai ni.
8 Nini ɗai n kusabaꞋa ɗa̱, a̱ɗa̱ aza a Ifiraimu?
Nini ɗai n ku ka̱sukpa̱ ɗa̱, a̱ɗa̱ aza a Isaraila?
Nini ɗai n kubonoko ɗa̱ tsu Aduma? Nini ɗai n kuyaꞋan n avu tsu Zeboyim?
Ka̱ɗu ka̱ va̱ ki ta̱ izumgbi a̱ ka̱tsuma̱ ka̱ va̱,
asuvayali a̱ va̱ wa̱ nu i ta̱ o kudokusu.
9 Mi a kutakacika wu a wupa wu usuɗukpi ba,
mi kpamu a kudoku ku una aza a Isaraila a uɓon u gaɗi ba
adama a na mpa Ka̱shile kaꞋa, mpa vuma ɗa ba,
mpa ɗa vuza ciɗa na mi a̱ ka̱tsuma̱ ka̱ ɗa̱.
mi a̱ kuta̱wa̱ ɗa̱ n ka̱ɗu ka̱ usuɗukpi ba.
10 Uma a̱ va̱ i ta̱ o kutono Vuzavaguɗu,
Mpa Vuzavaguɗu vuza na u kuyaꞋan yura̱ tsu kawu.
muku n va̱ ra̱ka̱ mi ta̱ a̱ kuta̱wa̱ n kujeꞋeke ki ikyamba,
i ta̱ a̱ kuta̱wa̱ a iɗika i ka̱livi.
11 I ta̱ a̱ kuta̱wa̱ n kujeꞋe ki ikyamba a Masar,
tsu moɗoi kpamu a iɗika i Asiriya,
mi ta̱ kpamu o kubono ko le a iꞋuwa i le.
Mpa vuza Vuzavaguɗu n dansai.
Unushi wa aza a Isaraila
12 Aza a Ifiraimu a kanza mu ta̱ n aꞋuwa,
ɗa kpamu kpaꞋa ka aza a Isaraila ku kanzai mu kula̱nga̱su.
Ama aza a Yahuda a vadalukpakai mu kucina̱,
mpa na mi Ka̱shile ka ciɗa.