15
Kene ku wuya adama a Muwabu
1 Na va ɗaɗa kadanshi ka na a ya'in a kubana wa aza a Muwabu,
o bonoko ta̱ likuci i Aru agali i na yi a iɗika i Muwabu,
a̱ la̱nga̱sa̱ ta̱ i ɗa a̱ ka̱tsuma̱ ka kayin ke te.
Kiru vu Muwabu vo okpo ta̱ agali,
wo okpoi agali a̱ ka̱tsuma̱ ka kayin ke te. 2 Uma a Dibon i ta̱ a kubana a̱ a̱'isa̱ e le
a na i a gaɗi va aginda adama a na a ya'an kpalu.
I ta̱ a kubana a̱ nva̱li n le ka̱ta̱, a̱ ka̱na̱ ma̱shi adama a Nebo m Medeba
n o gbonduwoi aci e le n a punai ntsa̱ka̱ dem.
3 A uka akashi a una̱mgbuka̱tsuma̱ ka̱ta̱ a̱ uta̱ a baya,
a̱ ka̱na̱ ma̱shi a gaɗi vu kukpa̱'a̱ vi le n ubuta̱ u kuyongo u uma n a̱bunda̱i
ali n a vaki a iɗika adama a̱ ma̱shi a.
4 Uma a Heshibon n Eliyali i ta̱ a̱ kushika̱
ali aza da'in a na i a Jahaza a pana ma̱shi me le.
Ali osoji a Muwabu o orukpo m ma̱shi
adama a na a̱ɗu e le a shama ta̱ n wovon.
5 N shika̱ ta̱ n ka̱ɗu adama a aza a Muwabu.
Uma a̱ ni i ta̱ a kusuma a kubana a̱ likuci i Zora koɓolo n Igila-shelishiya.
M ma̱shi ka̱ta̱ o tono n uye u Luhita,
ali ka̱ta̱ ma̱shi ma adama a munuka me le ma yawa a Haroniya.
6 Kuyene ku Nimirim
ku ɗekpe ta̱
ali m mita̱ dem me ɗekpei,
Ica̱shi dem ko ili i ta̱ku i buwa ba.
7 Adama a nannai, ɗa a̱ pura̱i uciyi wa̱ a̱bunda̱i
u na ishi o foɓoi,
ɗa kpamu a lazai a pasai
kuyene ku nɗanga ku na e ci ɗeke Wilo.
8 Ma̱shi ma atakaci me le ma yawa ta̱
a iɗika i Muwabu,
ili i na i ɗikai a uteku u nampa ali a kubana a uteku u nan ɗe,
u gita̱i a Igilamu ali a kubana a Beri-elamu.
9 Adama a na mini mo kuɗolu ma Dibon ma shana ta̱ nu mpasa,
ama ka̱ta̱ n kotso n ele ba.
Kawu wi ta̱ a kutamba aza a Muwabu a na a cigai kula'a n wuma u le,
ka̱ta̱ u kotso wu una aza a na i punu a iɗika ya.