27
Wishi wa aza a Isaraila
1 A kanna ka nanlo,
Vuzavaguɗu n ka̱ci ka̱ ni wi ta̱ a kutakaci Liviyata n kotokobi ka̱ ni,
kotokobi ka̱ ni ku utsura koɓolo n alyu,
Liviyata koko ka'a ku ugaɗi,
Liviyata koko ka'a ku uka̱ta̱li,
wi ta̱ a kuna ka̱di ka na ko ci yongo a mala kpamu.
2 A kanna ka nanlo,
Vuzavaguɗu wi ta̱ a kudana, <<Cananai vishipa adama a kashina ka nɗanga ki itacishi.
3 Mpa Vuzavaguɗu mi ta̱ a kinda ka'a
ka̱ta̱ kpamu n tsungusu ka'a mini ayin dem.
Mi inda kpamu ka'a kanna n kayin
adama a na ta lo vuza u kula̱nga̱sa̱ ka'a.
4 Mi a wupa n kashina ki itacishi ba.
Awana a ɗa baci n katsupa i ɗe koci.
Mi ta̱ a kudasa le n vishili,
ka̱ta̱ n songu le ra̱ka̱ n akina.
5 Ta baci nannai ba, ya'an a̱ ta̱wa̱ wa̱ va̱ ciya̱ mi isa le,
ya'an o tono mu m ma̱ta̱na̱,
e, o tono mu m ma̱ta̱na̱.>>
6 A kubana na kelime Yakubu wi ta̱ a̱ kuciya̱ kumi,
aza Isaraila kpamu o kutopo ta̱ ka̱ta̱ a ya'an a̱pa̱lu
ka̱ta̱ a matsa a shatangu aduniyan.
7 Vuzavaguɗu u lapa yi ta̱
tsu na u lapai aza a na i a tsurala n a̱yi?
A una yi ta̱
tsu na a unai aza na a unai ni?
8 Vuzavaguɗu u takacika ta̱ uma a̱ ni a̱ ubuta̱ u na a̱ suki le a kubana ubuta̱ wu ugbashi,
u pura̱ngi le tsu na wunla̱i u ci ya'an,
u ɗikai le n wupa tsu na wunla̱i u kasana u tsu pura̱ ili.
9 Ama Vuzavaguɗu u ya'an ta̱ nannai adama a na u cinukpaka aza a Isaraila unushi,
ka̱ta̱ nannai u zuwa u cinukpaka le n unushi u le ra̱ka̱:
Ana u ya'in atalyalyuka a̱ tali
o yotsoi katali ka̱ ka̱ɓisa̱ka̱ ka na ko kuɓoso miri-miri,
babu ka̱ma̱li ka aza a Ashatara ko ma̱va̱li ma aza a̱ ka̱yimbi
ma na ma kubuwa babu uɓoshi.
10 Likuci i na yi ukanji i bonoi tsa agali,
babu vuza na kpamu wi ida̱shi punu, wo okpoi an kakamba,
ta ɗe ndendem a ci ya'an kalina,
ta ɗe kpamu a tsu vaku,
n o gborotsoi ili i na yi punu dem babu i na i kubuwa.
11 A ayin a na baci acaka a̱ ni e ɗekpei, ɗa o koɗosoi,
a̱ma̱ci i ta̱ a̱ kuta̱wa̱ ciya̱ a zama nɗanga n kusonuko.
Adama a na uma a i n kuyeve ba,
Vuza na u ya'in le wa kupana asuvayali e le ba,
Vuza na u tuka̱i le a aduniyan wa̱ kusa̱'a̱ le ba.
12 A kanna ka nanlo Vuzavaguɗu wi ta̱ e kupece ilya n kopo. Wi ta̱ o kuɓolongu le vuza te-te o kuyene ku Yufiretu a kasana ali a kubana a̱ ka̱sha̱n ka Masar. 13 A kanna ka nanlo i ta̱ a̱ kulika̱ kavana n utsura. Aza a na i ɗe a̱ kuna̱mgba̱ a Asiriya n aza a na a banai ugbashi a Masar i ta̱ o kubono ka̱ta̱ a ya'anka Vuzavaguɗu tsugbashi a Urushelima a kusan ku ciɗa.