40
Odoki a kubana u uma a̱ Ka̱shile
1 Ka̱shile ka̱ ɗa̱ ka danai,
Ya'an odoki, ya'ankai uma a̱ ɗa̱ odoki
2 Ya'ankai Urushelima kadanshi n ka̱ɗu ida̱shi,
ka̱ta̱ vu dana yi
atakaci a̱ ni o kotso ta̱,
a cinukpaka yi ta̱ unushi u ni,
mayun Vuzavaguɗu u takacika yi ta̱
ali kure adama a unushi u ni ra̱ka̱.
3 Ka̱la̱ka̱tsu e meɗevile e meremune, <<Foɓusoi uye adama a Vuzavaguɗu, lapulai uye u gbayin a kakamba adama a̱ Ka̱shile ka̱ tsu. 4 A̱ra̱ ra̱ka̱ a ya'an uciɗa̱ngi,
ka̱ta̱ kusan koɓolo m masasan a ya'an usa̱di,
ubuta̱ u na wi n yolu u bono derere,
ka̱ta̱ ubuta̱ u gbani-gbani u bono mayin.
5 Ka̱ta̱ tsugbayin tsu Vuzavaguɗu tsu uta̱ e keteshe,
ka̱ta̱ uma ra̱ka̱ e ene u ɗa,
adama na Vuzavaguɗu ɗa u dansai.>>
6 Ka̱la̱ka̱tsu ka danai, <<Sala>>
Ɗa me ecei, <<Yiɗa̱i n kusala?>>
<<Sala vu dana uma ra̱ka̱ i ta̱ tsu mita̱,
tsuloboi ci le kpamu ci ta̱ uteku tsu a̱pa̱lu a kakamba.
7 Mita̱ me ci ɗekpe ta̱, a̱pa̱lu kpamu o tsu ɗoɗo ta̱
a ayin a na baci ayinviki a Vuzavaguɗu a̱ uvula̱i le,
mayu uma mita̱ ma a.
8 Mita̱ me ci ɗekpe ta̱,
a̱pa̱lu kpamu o tsu ɗoɗo ta̱,
ama kadanshi ka̱ Ka̱shile ka̱ tsu ki ta̱ lo ko wanai.>>
9 Avu vu na vu tsu tuka̱ n arabali a singai a Sihiyona,
Ɗa̱nga̱ vu kumba kusan ku ugaɗi,
Avu Sihiyona, avu na vu tsu tuka̱ n kadanshi ka singai.
Ɗengusa̱ ka̱la̱ka̱tsu ka̱ nu n utsura avu Urishelima,
ka̱ta̱ vu pana wovon ba,
dana likuci kakau ya aza a Yahuda,
<<Ka̱shile ka̱ ɗa̱ ka na.>>
10 La̱na̱i, Vuzavaguɗu Mala'imili wi ta̱ lo a̱ kuta̱wa̱ n utsura,
ka̱ta̱ u lya'a tsugono n kukiye ku utsura ku ni, la̱na̱i,
wi ta̱ koɓolo n katsupu ka ni
a ayin a na baci u yawai.
11 Wi ta̱ a̱ kula̱na̱ ushiga u ni tsu maguɓi,
ka̱ta̱ u ɓolongu nlala a̱ ubuta̱ u ni,
u doku u ɗika le wo oɓongu,
ka̱ta̱ u guɓa aza a na i m muku sawu.
12 Yayi u kufuɗa kugisangu mala n kataka ke kukiye ku ni,
ko ta na u gisangu a̱da̱nga̱shile n wanshi u kukiye u ni?
Yayi u sa'wai kuɓa̱na̱ kubuta̱ ka aduniyan a mabana,
ko u gisangu a̱miki a nsansa
n aginda n kagisamkpatsu?
13 Yayi u kufuɗa kuyeve kusheshe ku Vuzavaguɗu,
ko ta na u neke yi kadanshi tsu vuza va odoki a̱ ni?
14 Yayi Vuzavaguɗu u cinakai adama a na u doku yi kuyeve?
Yayi vuza na u yotsongi ni uye u singai?
Yayi vuza na kpamu u yotsongi ni kuyeve,
ɗa kpamu u yotsongi ni uye u kufuɗa?
15 Mayu aduniyan i ta̱ tsu uɗa̱kpi u mini o kogbodo ka̱ mini,
i ta̱ tsu uteku tsu kubuta̱ a kagisamkpatsu. U bonoko ta̱ otogu ra̱ka̱ adanshi kubuta̱ ku ɗa.
16 Nɗanga n Lebano n kuyawa kusongu a katalikalyuka ba,
ko ta na nnama n ni feu n yawa kuya'anka kune'e ku kusongu.
17 Uma a aduniyan dem wa̱ ni ili i ɗa i ba,
u kece le ba,
u bonoko le ili kpamu ba.
18 N yayi va kugisanku n Ka̱shile?
N iyoci ye ne i ɗai va kugisanku yi?
19 Ka̱ma̱li vuma ɗa u ya'in ni,
ɗa kawakana ka kumai ni n azanariya,
ɗa u doku u ukai ni ikani ya azurufa.
20 Vuma vu unambi vu na wi n i na u kuya'anka kune'e ba,
u tsu zagba ta̱ maɗanga ma na ma tsu shama ba.
U tsu la̱nsa̱ ta̱ vuza na u yevei kushe'we,
ka̱ta̱ u she'weke yi ka̱ma̱li ka na ka tsu wala ba.
21 Ka̱ta̱ vu yeve ba?
Ka̱ta̱ vu pana ba?
Ka̱ta̱ a sa'wa kudana wu n ayin a̱ ugiti ba?
Ka̱ta̱ vu ciya̱ kuyeve ukuna u nampa ali kafu a ya'an aduniyan ba?
22 A̱yi ɗa vuza na wi ida̱shi gaɗi vi ɗika,
uma a̱ ni i ta̱ uteku tsa akyun,
ɗa u ba̱ra̱kpa̱i gaɗi tsu kafalaka,
ɗa u ba̱ra̱kpa̱i le uteku tsu ma̱va̱li ma na o ci yongo.
23 A̱yi ɗa vuza na u bonokoi ngono ukuna u gbani,
ɗa u bonokoi tsugono tsa aduniyan ili i yoku ba.
24 I ta̱ uteku tsu mita̱ mu wuti usavu,
a makya'a mana baci a̱ ca̱'i le
ma na mu uta̱i babu aralu a̱ ma̱riki.
Ayin a na baci Vuzavaguɗu u lapai wunla̱,
e ci ɗekpe ta̱ ka̱ta̱ o tono wunla̱i an kopo.
25 Vuza ciɗa u danai,
<<N yayi a kugisanku mu, an mo kokpo uteku ci ni?>>
26 Ɗengusa̱i a̱shi a̱ ɗa̱ gaɗi ka̱ta̱ i la̱na̱.
Yayi u ya'in ili nampa ya?
U tsu uta̱ka̱ le vuza te vu te,
ka̱ta̱ u ɗeke yaba dem n kula ku ni,
adama a tsugbayin tsu utsura ci ni tsu na ci kugisanku ba,
babu vuza te vu na u nusai.
27 Avu Yakubu,
<<Adama a̱ yiɗa̱i va kudana Vuzavaguɗu we ene ta̱ atakaci a̱ nu ba?
Uye u va̱ wi ta̱ usokongi a̱ a̱shi a Vuzavaguɗu, Avu Isaraila yi ɗa̱i i zuwai ɗa va kudana Ka̱shile ka iwan ta̱ kasingai ka̱ nu?>>
28 A̱ɗa̱ i yeve ba?
Ka̱ta̱ yi ishi i pana ba?
Vuzavaguɗu Ka̱shile ka kowanai ka'a.
Vuza na u ya'in aduniyan dem.
A̱yi utsura u ni u tsu jebe ba ko wo'o,
kusheshe ku ni kpamu ki kuyeve ba.
29 U tsu neke ta̱ aza a wo'i katsura,
ka̱ta̱ u doku aza a unambi wu utsura katsura.
30 Ko a̱ɗa̱nga̱ni a ci ya'an ta̱ ulinga ka̱ta̱ o o'o,
olobo feu i ta̱ a̱ kuta̱ɗa̱tsa̱ ka̱ta̱ a̱ yikpa̱.
31 Ama aza na e nekei a̱ɗu e le u Vuzavaguɗu
i ta̱ a̱ kuciya̱ utsura u savu.
Ka̱ta̱ a imkpa gaɗi n evelyu tsu kajimba,
I ta̱ a kusuma ama o ko'o ba.
I ta̱ a kuya'an nwalu ama a̱ kulima̱ ba.