47
Uyikpi u Babila
<<Cipa̱ ka̱ta̱ vu da̱sa̱ngu a iɗika
avu Babila,
da̱sa̱ngu a kayala babu kakuba,
avu Babila.
O kudoku e ɗeke wu
meleshushe ko vuza babu utsura ba.
Ɗika kutalikukiya ka̱ta̱ vi yaꞋan kiya,
foɗo ka̱ka̱la̱bi ka̱ nu.
Va̱ga̱lukpa̱ fatari vu nu, vu ka̱sukpa̱ ene pulai,
ka̱ta̱ vu wala vu pasamgbanai o nɗolu.
Ciyanpu tsu nu ci ta̱ a̱ kuta̱ pulai,
ka̱ta̱ wono u nu wo okpo e keteshe.
Mpa n kutsupa ta̱,
mi kpamu a kubuwaka vuza n wuma ba.>>
Ka̱shibi ka̱ tsu, Vuzavaguɗu MalaꞋimili ɗa kula ku ni,
a̱yi ɗa vuza ciɗa vi Isaraila.
 
<<Desa̱ngu ɗe n ka̱bini a̱ ka̱yimbi,
avu Babila,
a buwa e kuɗeke wu
mogono ma vuka mo tsugono ba.
N yaꞋan ta̱ wupa n uma a̱ va̱ aza a Isaraila,
m bonokoi le ukuna u gbani,
n nekei le e ekiye a̱ nu,
ɗa vu kpa̱ɗa̱i kupana asuvayali e le.
Ko a tsukutsa ci le,
ɗa vu ka̱na̱i kuneke le atakaci.
Ɗa vu danai, <Mpa mi ta̱ a kulyaꞋa kelime
n kulyaꞋa tsugono tsa̱ a̱ma̱ci ali a kubana uteku n uteku.
Ama vu kpa̱ɗa̱i kindana ili i nampa ya,
ko vi ciɓa n ili i na i ɗa i kutuka̱.
 
<<Gogo na, pana kakuna ka nampa,
avu na vi ci ciga kupana ku uyoꞋo, avu na vu tsu yongo ukanji mayin,
avu na vu tsu dana n ka̱ci ka̱ nu,
<Mpa ɗa biꞋi, babu kpamu vuza yoku sai mpa.
Mpa mo kokpo kagapa ba
ko n namba maku a̱ ka̱tsuma̱ ka̱ muku n va̱ ba.>
Ukuna u re u nampa dem wi ta̱ a kucina wu babu megeshe,
a kanna ke te,
unambi u muku n tsugapa
ci ta̱ a̱ kuta̱wa̱ wa̱ nu m makara,
ko n ukuna u ka̱bunda̱i
ko oboci a̱ nu koɓolo n tsuboci le dem.
10 Vi neke ta̱ katsura n kawuya ka̱ nu
ali ɗa vu danai, <Babu vuza na we enei mu.>
Ugboji u nu n kuyeve ku nu ku nu ku vakangi nu
ana vu danai ka̱ci ka̱ nu,
<Mpa ɗa, babu kpamu vuza yoku tsu va̱.>
11 Mayu atakaci a̱ kuta̱wa̱ ta̱ wa̱ nu,
va kufuɗa kutere a ɗa n alaꞋwin ta na ba.
Kawuya ki ta̱ a̱ kuta̱wa̱ wa̱ nu,
vi ta na a kufuɗa kisa ka̱ci ka̱ nu ba,
ili i wuya i na vi uyevi n i ɗa ba,
yi ta̱ a kucinaka wu.
 
12 <<Gogo na yaꞋan ulinga n alaꞋwin o tsuboci a̱ nu,
yaꞋan ulinga n uye u na vu tonoi ali n ayin a ɗe.
U gaꞋan ba u ɗa wi ta̱ a kuyaꞋanka wu kasingai,
ko u ɗa u zuwa vuza yoku kupana wovon u nu.
13 Kadanshi ko odoki ka na vi isai dem ko oꞋuso wu ta̱
Te ɗai aza a tsusaki ku ukuna a̱ nu i ra̱ka̱,
eyevi a azangata a ele na a tsu dana i na yi lo a̱ kuta̱wa̱ o wotoi dem,
yaꞋan a isa wu a̱ ubuta̱ wi ili i na yi lo a̱ kuta̱wa̱ wu.
14 Mayu i ta̱ tsu mita̱ ma̱ ciꞋiwa̱, ma na mi a kukula̱ akina.
A kina i ta̱ o kusongu le ra̱ka̱. A kufuɗa ki isa ka̱ci ke le, a̱ ubuta̱ wu utsura wa akina ba.
Cikina ci lo tsu na vuza u kunyashika ba,
babu kpamu akina a na vuza u kutasuku.
15 I nampa i ɗa koci a kufuɗa kuyaꞋanka ɗa̱
ele vu na vu soꞋi atakaci adama e le, ele vu na i yongoi koɓolo ali n ayin a na yi muku.
Yaba dem u tsu tono ta̱ uye u ni,
babu vuza te vu na wa kisa wu.