62
Kula ku savu ku Sihiyona
1 Adama a Sihiyona mpa ma kupaɗa bini ba,
adama a Urushelima kpamu mpa mo kokpo bini feu ba,
sai ayin a na kasingai ka̱ ni ka akanai tsu kutashi,
wishi u ni kpamu tsu ma̱kuni ma na mi utasiki.
2 Aduniyan i ta̱ e kene kasingai ka̱ nu,
ka̱ta̱ ngono dem me ene tsugbayin tsu nu,
i ta̱ kpamu e kuɗeke wu n kula ku savu
kula ku na Vuzavaguɗu n ka̱ci ka̱ ni u kune'e wu.
3 Vi ta̱ o kokpo oroliko o tsuloboi a̱ ubuta̱ we ekiye a Vuzavaguɗu,
koɓolo m ma̱kun mo tsugono e ekiye a̱ Ka̱shile ka̱ nu.
4 O kudoku e ɗeke wu Kagali ba ko iɗika i na i na̱mgba̱i ba,
Ama kula ku savu ku nu ku ɗaɗa iɗika i ma̱za̱nga̱ i Ka̱shile
n vuka vu savu vu Ka̱shile
adama a na Vuzavaguɗu wi ta̱ a kupana uyo n avu,
ka̱ta̱ u bonoko wu,
vuka vu savu vu Ka̱shile.
5 Tsu na maku ma vali ma tsu zuwa ka̱ɗu ka̱ ni a̱ ubuta̱ u vuka vu savu vi ni,
tsu nanlo tsu ɗa muku n nu n kutono wu,
tsu na vuza vu vuka vu savu u ci ya'an ma̱za̱nga̱ adama a vuka vu savu vu ni,
nannai ɗa Ka̱shile ka̱ ɗa̱ ka kuya'an ma̱za̱nga̱ n avu.
6 N zuwa ta̱ aza a kindi a nshilya n ɗa̱, avu Urushelima,
a kupaɗa bini n kanna ko n kayi ba.
A̱ɗa̱ vu na i zuwai Vuzavaguɗu wi a kuciɓasa n a̱ɗa̱,
ka̱ta̱ yu uvuka ba,
7 ka̱ta̱ i neke Vuzavaguɗu wuvuki ba, sai ayin a na u zuwai Urushelima u shamgbai,
ali u zuwa wo okpo ubuta̱ u kucikpa punu a aduniyan dem.
8 Vuzavaguɗu u kucina ta̱ n kukiye ku usingai ku ni
koɓolo n kubolu ku gbayin ku ni,
<<Mi o kudoku me neke ili i kashina
wa aza na i a tsurala n a̱ɗa̱ ba,
omoci o kudoku kuso'o ma̱ra̱
ma na a̱ɗa̱ i ya'in ba,
9 ama aza a na a kya'i va i ta̱ a a kulya'a i ɗa
ka̱ta̱ a cikpa Vuzavaguɗu,
aza na kpamu o ɓolongi umaci wu nɗanga u na u ge'wei va i ta̱ a kulya'a u ɗa,
punu a ulanga u ma̱va̱li ma̱ va̱.>>
10 Walai punu, walai punu n utsutsu wa,
lapulakai uma uye.
Zamai, zamai uye u gbayin,
takpai atali a.
Zuwai akashi a urotu adama a na aduniyan ra̱ka̱ e ene.
11 Vuzavaguɗu u dansa ta̱ ɗe
a̱ ubuta̱ wa aduniyan ra̱ka̱.
<<Dana uma a Sihiyona,
<Indanai, Kishi ka̱ ɗa̱ ki ta̱ lo a̱ kuta̱wa̱,
wi ta̱ koɓolo n katsupu ka̱ ni a̱ kuta̱wa̱.> >>
12 I ta̱ e kuɗeke le uma a ciɗa,
aza a na Vuzavaguɗu u shiba̱i,
i ta̱ e kuɗeke Urushelima, ubuta̱ u mali
likuci i na a iwain ba.