64
1 Vuzavaguɗu, ɓoso gaɗi ka̱ta̱ vi cipa̱ a iɗika,
adama a na vu zuwa nsasan m gba̱ɗa̱ kelime ka̱ nu.
2 Tsu na akina a tsu tasa ali a
zuwa mini ma̱ punu,
cipa̱ adama a na vu zuwa irala i nu e yeve n kula ku nu
ka̱ta̱ kpamu vu zuwa aduniyan ra̱ka̱ o voɗotso e kelime ka̱ nu.
3 Ana vi ya'in ili i mereve i na ci sheshei va kufuɗa kuya'an ba,
ɗa vu cipa̱i a iɗika, ɗa nsasan n je'i avu e kene.
4 Ali n ayin a cau babu vuza na u sa'wai kene,
babu kpamu kutsuvu ku na ku sa'wai kupana,
babu ka̱shi ka na ka sa'wai kene Ka̱shile ka na ka la'i nu,
vuza na u ci ya'anka aza na i a kuvana yi ulinga.
5 Vi isai vuza na u ci ya'an kasingai m ma̱za̱nga̱,
vuza na kpamu u tsu ciɓa n a̱ɗa̱ a uye u ni.
Ɗa kpamu tsu geshei punu a̱ ka̱tsuma̱ ku unushi,
ɗa kpamu i ya'in wupa,
Nini ɗai tsa̱ kuciya̱ wishi?
6 Ra̱ka̱ vu tsu tso okpoi an aza a na i nu nshinda̱,
ulinga wu usuɓi u tsu ra̱ka̱ wi ta̱ tsa akashi a na a karasai,
ɗa tsu lumbai ra̱ka̱ tsa̱ a̱vuku,
ɗa unushi u tsu wo okpoi tsu wunla̱i, ɗa u ɗikai tsu ra̱ka̱.
7 Babu vuza na u tsu ɗeke kula ku nu,
ko u dakaka u ciya̱ u ka̱na̱ wu,
adama a na vu sokongu ta̱ a̱shi a̱ nu a̱ tsu,
ɗa vu ka̱sukpa̱i tsu derekpei adama a̱ unushi u tsu.
8 Ama gogo na, Vuzavaguɗu, avu ɗa Esheku a̱ tsu.
A̱ tsu ɗa ci'in, avu ɗa kama'i,
a̱ tsu ra̱ka̱ dem ulinga we ekiye u nu u ɗa.
9 Ka̱ta̱ vi ya'an wupa u na u la'i kugisanku ba, Vuzavaguɗu,
ka̱ta̱ vu ciɓasa n unushi u tsu ko wannai ba.
La̱nuku, n folono wu ta̱ indana,
a̱ tsu ra̱ka̱ uma a̱ nu a ɗa ci.
10 Likuci i ciɗa i nu yo okpo ta̱ kakamba,
Sihiyona feu wo okpo ta̱ kakamba, Urushelima tamkpamu wo okpoi agali.
11 A̱'isa̱ a singai n a ciɗa a̱ tsu, ubuta̱ u na isheku i tsu i cikpai nu,
u ɗa u kula̱ ta̱ n akina,
ɗa ubuta̱ u singai u tsu ra̱ka̱ wo okpoi agali.
12 Ili i nampa ra̱ka̱ i kotso baci, Vuzavaguɗu, vi ta̱ o kubono n ka̱ca̱pa̱?
Vi ta̱ a kupaɗa bini ka̱ta̱ vu takacika tsu gbani-gbani nannai?