1 Ayin kenu, a makyan ma vukya'a vu alkama, ɗa Somuson u banai adama a na we ene vuka vu ni, ɗa u ɗikai maku ma maraɗika a na we neke yi. Ɗa u danai akaya a̱ ni, <<N kuciga ta̱ n uwa a kunu ku vuka vu va̱.>> Ama ɗa u sa̱nka̱i ni. 2 Ɗa akaya a̱ ni a danai, <<Mpa n sheshe kudana mayun ɗa vu cigai ni ba, ɗaɗa i zuwai ɗa n ɗikai ni ɗa n nekei ka̱ja̱'a̱ ka̱ nu. Vangu ni kenu wi ta̱ lo, ashe u la'a vuka vu nu tsuloboi ba? Ɗika yi wu okpo a̱ una̱u u ni.>> 3 Ɗa Somuson u danai le, <<Gogo na mi ta̱ o kokpo vuza vu babu unushi a̱ ubuta̱ wa aza a Filisitiya adama i na ma kuya'anka le.>> 4 Ɗa Somuson u banai u ka̱na̱i nshe'e n kakamba amangatawantatsu (300). Ɗa ugbaɓi le uma e re e re, ushiyi le winja n winja, ɗa ugbaɓi winja wa n ka̱vusu ka akina. 5 Ana u dyaɓai akina a̱ ka̱vusu ka, ɗa u ka̱sukpa̱i nshe'e n kakamba ma a ku'uwa ashina aza a Filisitiya. Ɗa o songi ishina i na yi kashani ni na a kapai, koɓolo n ashina a itacishi n zaitu. 6 Ɗa aza a Filisitiya a danai, <<Yayi u ya'in ili nampa?>> Ɗa a danai le, <<Somuson kototo ka Timuna ɗa u ya'in ka'a,>> Adama a na esheku a vuka a u ɗika ta̱ vuka vu Somuson va u nekei ka̱ja̱'a̱ ka̱ ni.

Ɗa aza a Filisitiya a banai osongi vuka vu Somuson va koɓolo n kpa'a ke esheku a̱ ni n akina ra̱ka̱. 7 Ɗa Somuson u danai le, <<Nannai ɗa i ya'in, mayun n kucina ta̱ n ku ka̱sukpa̱ ba sai n tsupa.>> 8 Ɗa u kumbai le n vishili ali wu unai le n a̱bunda̱i, ɗa u sumai u banai u da̱sa̱ngi punu asuvu a kaɓatsu ka katali ka Itama.

9 Ɗa aza a Filisitiya uta̱i ɗa a zuwai a̱pa̱m e le a Yahuda, ɗa e pecekushi ka̱ci ke le a̱ ubuta̱ dem e Lehi. 10 Ɗa aza a Yahuda e ecei le, <<Adama a̱ yiɗa̱i ɗa i ta̱wa̱i kushilika̱ n a̱tsu?>>

Ɗa a danai, <<Tsu ta̱wa̱ ta̱ adama a na tsu shiya Somuson, ci ya'anka yi uteku tsu na u ya'ankai tsu.>> 11 Ɗa uma a̱kpa̱n a tatsu (3,000) aza a Yahuda a banai a kaɓatsu ka katali ka Itama, ɗa a danai Somuson, <<Vu yeve a na aza a Filisitiya a ɗa i a kulya'aka tsu tsugono ba? Yiɗa̱i i zuwai ɗa vu ya'anki tsu nannai?>>

Ɗa u danai,<<Tsu na a ya'anki mu ta feu n ya'ankai le nanai.>> 12 Ɗa a danai ni, <<Tsu ta̱wa̱ ta̱ adama a na ci shiya wu, ka̱ta̱ ci neke aza a Filisitiya.>>

Ɗa Somuson u danai, <<Kucinakai mu a na a̱ɗa̱ n ka̱ci ka̱ ɗa̱ ɗa ya ku una mu ba.>> 13 Ɗa a danai ni, <<A̱'a̱, a̱tsu tsu kucina ta̱ tsa ku una wu ba kushiya ku ɗa koci tsa ku kushiya wu ka̱ta̱ ci neke aza a Filisitiya.>> Ɗa a shiya ni n awin a savu e re ɗa a̱ uta̱ka̱i ni a punu asuvu a kaɓatsu ka katali ka.

14 Ana u yawai a Lehi, ɗa aza a Filisitiya a̱ ta̱wa̱i n yoroli adama a na a gasa n a̱yi. Ɗa ayinviki a Vuzavaguɗu a utsura a̱ cipa̱i wa̱ ni, ɗa awin a na i ushiyi ekiye a̱ ni a taɓai an tsugbere tsu na tsu ka̱na̱i akina 15 Ɗa u ɗikai ketele ka̱ ta̱ku ka magbagulu ma majaki, ɗa wu unai uma ka̱kpa̱n (1,000). 16 Ɗa Somuson u danai,

17 Ana u kotsoi kadanshi, ɗa u variki ketele ka na ki e kukiye ku ni. Ɗa e ɗekei ubuta̱ wa n kula Ramatu-lehi, ɗaɗa Kaginda ke Ketele ka Magbagulu ka Majaki.

18 Ɗa u panai kakuli ka̱u, ɗa u ɗekei Vuzavaguɗu, u danai, <<Avu ɗa vu nekei kagbashi ka̱ nu ulya'i u gbayin u nampa. Kpamu gogo na mi ta̱ a̱ kukuwa̱ adama a kakuli, ka̱ta̱ n doku n uwa ekiye a uma ofoto a nampa?>> 19 Ɗa Ka̱shile ka ya'in kpenle ku mini a iɗika i Lehi, ɗa tana mini ma̱ uta̱i punu e kpenle ka. Ana u so'i, ɗa ayinviki a̱ ni o bonoi, ɗa e ɗekei kpenle ka n kula Ene-hakore, ubuta̱ wa wi ta̱ ɗe e Lehi ali n anana. 20 Ɗa Somuson wu okpoi kaya'inkafada ka aza a Isaraila a̱ya̱ kamanga a ayin a na aza a Filisitiya i a kulya'a ka le tsugono.