IRIMIYA
Kuɓa̱yuwa̱
Ukuna u Katagarda ka nampa
Katagarda ki Irimiya ki ta̱ a̱ Kuɓa̱yuwa̱ Keniki Irimiya u yongo ta̱ a kubana ukocishi wa̱ a̱ya̱ amangatatsunkupa a ugbashi a ugiti wa̱ a̱ya̱ kupa a ugboku u ta̱li Kafu a matsa Yesu (KY). A ayin a na u yongoi u dana ta̱ uma a̱ Ka̱shile atakaci a na i lo a̱ kuta̱wa̱ adama o kutoni ka̱ a̱ma̱li n unushi u na i a kuyaꞋansa. U yongo ta̱ ali ɗa we enei ili i nampa ya dem i shana ta̱ n uyikpi u Urushelima a ekiye o mogono ma Babila, Nebukaneza a̱yi ɗa vuza na wu unai likuci i Urushelima n a̱Ꞌisa̱ a gbayin n ukuna wu agbashi a ngono n Yahuda n uma n a̱bunda̱i. Ɗa kpamu u doku u yaꞋin kadanshi tsu na o kubono a̱ ubuta̱ wugbashi n tsu na o bonokoi iɗika i Urushelima. Katagarda ki Irimiya ki ta̱ a kufuɗa e pece kaꞋa tsu nampa. (1) Uɗeki u Irimiya. (2) Akaka a̱ Ka̱shile a kubana uma a Yahuda nu ngono n ni a ayin o tsugono a̱ ni a ayin a Josiya, Johoyakim, Johoyaki n Zedekiya. (3) Ili i na Irimiya u yaꞋankai ulinga i ɗa Baruku feu yaꞋankai ulinga a̱yi kaɗani ka Irimiya u yaꞋan ta̱ kadanshi ke kene n a̱bunda̱i n ili i gbagbaꞋin i yoku i na i kuyaꞋan punu a u Irimiya; (4) Akaka kaukau a na a̱ uta̱i u Vuzavaguɗu adama a uma a iɗika kaukau i na yi daꞋin. (5) U dansai mayin tsu na likuci i Urushelima i kuyikpa̱ n kubana ugbashi a Babila. Irimiya vuma ɗa vi cicoꞋo wi ta̱ kpamu n ucigi u uma a̱ ni, u iwan ta̱ kpamu tsu na u kudana ili ya atakaci a kubana u uma a̱ ni. Ubuta̱ n a̱bunda̱i u yaꞋan ta̱ kadanshi n asuvayali a̱ ka̱ɗu ka̱ ni n ili i na u soꞋi atakaci adama a̱ Ka̱shile kaꞋa ke ɗekei ni wo okpo keniki. Kadanshi ka̱ Ka̱shile ki ta̱ tsa akina a̱ ka̱ɗu ka̱ ni wi a kufuɗa wo foɓo kaꞋa ba. Kadanshi ka gbagbaꞋin ko yoku ka laza ta̱ ayin a Irimiya ali a kubana anana, a ayin a na a kuyaꞋan uzuwakpani u savu, u na uma a̱ Ka̱shile e kureme babu malum ma na ma kuciɓaka le, adama a na i ta̱ a kuɗana u ɗa a̱ɗu e le 31:31; 34.
1
1 Kadanshi ki Irimiya maku ma Hilikiya, Ganu vi yoku a̱ likuci i Anatotu e kureꞋe ki iɗika i Bayami. 2 A̱yi na Vuzavaguɗu u yaꞋin kadanshi n a̱yi. A ayin o tsugono tsu Josiya kolobo ka Amuno, mogono ma Yahuda, a̱ ka̱ya̱ ka kupa n ka tatsu ko tsugono tsu ni. 3 Ɗa kpamu u doku u yaꞋin kadanshi n a̱yi a ayin o tsugono tsu Johoyakim kolobo ka Josiya, mogono ma aza a Yahuda, a kubana a ukoci u ka̱ya̱ ka kupa n kete ko tsugono tsu Zedekiya, kolobo ka Josiya, mogono ma Yahuda ali a kubana a ayin a tsugbashi tsa a aza a Urushelima o wotoi u tawun.
Uɗeki u Irimiya
4 Ɗa Vuzavaguɗu u yaꞋin kadanshi nu mpa, u danai,
5 <<N yeve wu ta̱ babu a yaꞋan ka̱tsuma̱ ka̱ nu,
kafu kpamu a matsa wu ɗa merengi nu,
ɗa n zagbai nu vo okpo keniki ka uma aduniyan.>> 6 Ɗa n danai,<<A̱Ꞌa̱, Vuzavaguɗu Ka̱shile. La̱na̱, mpa n fuɗa kadanshi ba, adama a na mpa maku ma kenu maꞋa.>> 7 Ama ɗa Vuzavaguɗu u danai mu,
<<Ka̱ta̱ vu dana,<Mpa maku ma kenu ma ba,> adama a na u yaba dem vu na baci n suki nu, mayun ɗa vu bana,
Kpamu i na baci de dem n danai nu, i ɗaɗa va kudansa.
8 Ka̱ta̱ vu pana wovon u le ba,
adama a na mpa mi ta̱ koɓolo n avu, mi ta̱ kpamu a kisa wu.>> Mpa Vuzavaguɗu, mpa ɗa n dansai. 9 Ɗa Vuzavaguɗu u ɗengusa̱i kukiye ku ni ɗa u saꞋwai una̱ u va̱. Ɗa u danai mu,
<<La̱na̱, gogo na, n zuwa ta̱ kadanshi ka̱ va̱ a̱ una̱ u nu.
10 La̱na̱, anana n zuwa wu ta̱ gaɗi va aduniyan n tsugono,
adama a na vu muɗa̱ ka̱ta̱ kpamu vu fa̱da̱,
adama a na vu una, ka̱ta̱ kpamu vu vakangu,
adama a na vu maꞋa ka̱ta̱ kpamu vu fa̱da̱.>>
11 Ɗa Vuzavaguɗu kpamu u doku u yaꞋin kadanshi nu mpa, u danai,<<Irimiya, yiɗa̱i vi enei?>> Ɗa n danai, <<Me ene ta̱ kacaka ka maɗanga ka alumo.>> 12 Ɗa Vuzavaguɗu u danai, mayun ɗa,<<Ve ene ta̱ mayin, adama a na mpa mi ta̱ a kinda i na ya̱ kuta̱wa̱ ya̱ gita̱.>>
13 Ɗa Vuzavaguɗu u doku u yaꞋin kadanshi nu mpa kpamu ire, u danai,<<Yiɗa̱i ve enei?>> Ɗa n danai ni,<<Me ene ta̱ mogbodo a̱ kupuna̱ a kinda uɓon u gaɗi.>> 14 Ɗa Vuzavaguɗu u danai mu, <<A uɓon u gaɗi, atakaci a ɗa a̱ kuta̱, ka̱ta̱ a takacika aza a na i punu a̱ ida̱shi a iɗika ya ra̱ka̱. 15 La̱na̱, mpa ɗa na e meɗevile ma kumaci n tsugono tsa aza uɓon u gaɗi ra̱ka̱, adama a na a̱ ta̱wa̱ a̱ shikpa̱ akuba o tsugono e le a̱ utsutsu u Urushelima, a kanza nshilya n ni koɓolo n likuci i Yahuda i na i buwai ra̱ka̱. 16 Ka̱ta̱ n dansa atakaci a na n kuyaꞋanka le, adama asuvawuya a na a yaꞋankai mu, a na a̱ ka̱sukpa̱i mu, ɗa o songuki a̱ma̱li ili ma̱gula̱ni, ɗa kpamu a yaꞋankai a̱ma̱li a na a yaꞋin n ekiye e le tsugbashi. 17 Ama avu ɗa̱nga̱ vu yaꞋan ofoɓuso adama a ulinga, ka̱ta̱ vu dana le ili ra̱ka̱ i na n danai nu. Ka̱ta̱ vu pana wovon u le ba, ta lo mpa n ku zuwa wu vu pana wovon a a̱shi e le. 18 Mpa tana anana m bonoko wu ta̱ likuci yi ukanji m mashilya mi iyum, n asaka a iyum i shili adama a iɗika ra̱ka̱, nu ngono ma Yahuda, n aza a̱ gba̱ra̱-gba̱ra̱ a̱ ni, n anan ganu koɓolo n uma a̱ likuci a̱ ni ra̱ka̱. 19 Pana, i ta̱ a kuyaꞋan tsurala n avu, ama a̱ kuciya̱ ulyaꞋi ba, adama na mi ta̱ koɓolo n avu, mpa ɗa Vuzavaguɗu mpa ɗa n dansai.>>