12
Irimiya u Dansai
1 Vuzavaguɗu, a vu vuza singai ɗa,
ayin a na baci de dem n tuka̱i nu n kadanshi.
Dem n nanai ka̱sukpa̱ mu n doku mece wu i li te.
Yi ɗa̱i i zuwai ɗa vuma gbani-gbani u tsu yongo n uciyi?
Yi ɗa̱i i zuwai ɗa uma a gbani-gbani a tsu laꞋa yaba dem ku yongo n ma̱ta̱na̱?
Ka̱ta̱ kpamu a ka̱na̱ ku lyaꞋa kelime n ku ciya̱ u ciyi?
2 A vu ɗa vu shikpa̱i le, ɗa a zuwai aralu,
ɗa o gbonguroi ɗa tana a matsai umaci,
o tsu yongo ta̱ n kula kunu una̱u le,
ama a̱ɗu e le i ta̱ dangi n avu.
3 Ama a vu, Vuzavaguɗu, vu yeve mu ta̱,
vene mu ta̱, ɗa kpamu vu kondoi ka̱ɗu ka̱ va̱,
vu yeve ta̱ an ka ki ɗevu n avu.
Adama nannai, rono mu an mokyon ma na o foɓusoi adama a ku kiɗa,
ka̱ta̱ vu zuwa ma kau adama a kanna ka ku kiɗa.
4 Ali wannai ɗa uduniya u ku ka̱sukpa̱ kuyaꞋan kpalu?
Ka̱ta̱ mita̱ ma ashina ma ka̱sukpa̱ ku ɗekpe?
Adama a kagbanigbani ka aza na i punu ida̱shi i ɗa
n nnu n inyama n kakamba n kotsoi,
adama a na a dana ta̱, <<Wi a kuna tsu ra̱ku ra̱ka̱ ba.>>
Vuzavaguɗu wu ushuki Irimiya
5 <<Ɗa baci a vu n uma i yaꞋin malamanai mi ilaɗi i e ene ɗa o otongi nu,
nini ɗa va ku fuɗa malamanai n odoku?
Kpamu ɗa baci vu yikpa̱i a iɗika i singai,
nini ɗa va ku yaꞋin iɗika ya a wana i Urdu?
6 Adama na, ko aza nu, n aza kpaꞋa ku dada nu,
e le feu a yaꞋin ka wu ta̱ ka gbani-gbani,
o ku tono wu n a lapakai nu una̱,
ka̱ta̱ vu ushuku n a̱ le ba.
ko nini ɗa baci de vu panai a dansai kasingai a dama nu.>>
7 <<N ka̱sukpa̱ ta̱ kpaꞋa ku va̱,
n varuku ta̱ ili yu uka̱ni i va̱,
N neke ta̱ macigi ma̱ va̱
e kiye a vurala vu ni.
8 I li yi uka̱ni i va̱,
yokpo ta̱ an kawu a kakamba,
u ɗengusa̱ ta̱ ka̱la̱ka̱tsu ka tsurala n m mpa,
adama nanai ɗa n iwain ni.
9 Ili yu uka̱ni i va̱, yokpo mu ta̱ an kura̱ ku a̱kunzu?
Ɗa̱skpa̱ asakali a na tsu takuma i nyama uta̱ a ka̱ra̱i.
Bana, vu ɗeke n nyama n kakamba ra̱ka̱,
tuka̱ n a̱ le a takuma.
10 Nguɓi n a̱bunda̱i a la̱nga̱sa̱ ta̱ kashina ki itacishi ka̱ va̱,
a dasa ta̱ ugboku va̱,
ɗa o bonokoi kashina ka singai ka̱ va̱
ka̱pula̱ka̱ ka gbani-gbani
11 O bonoko ta̱ ka kagali,
kagali, wita̱ a kuyaꞋin ka mu kpalu.
Ɗa iɗika ra̱ka̱ yokpoi agali,
kpamu babu vuza na u keɓecei.
12 A gaɗi vu nsansa n na mpa ra̱ka̱,
aza munuka uta̱ ta̱,
adama na kotokobi ka Vuzavaguɗu ka ka̱na̱ ta̱ munuka
daga uteku wu iɗika u na mpa a kubana u na n ɗe,
a ka̱tsa̱ma̱ ki ili ya mpasa ra̱ka̱ babu vuza na wi m ma̱ta̱na̱.
13 A ca̱Ꞌa̱ ta̱ alkama, ama ɗa a kyaꞋi awana,
a takacika ta̱ ka̱ci ka̱le gbani.
I ta̱ a kupana wono wi i na a cimbai,
adama wupa ugbain u Ka̱shile.>>
14 I na Vuzavaguɗu u dansai adama itoku i gbani-gbani ra̱ka̱ i na i sawai ili yu uka̱ni i na u nekei uma a̱ ni aza Isaraila i ɗa na.<<La̱na̱, mpa n ku utuka̱ le ta̱ a ka̱tsa̱ma̱ ki iɗika i le, ka̱ta̱ kpamu mu uta̱ka̱ aza Yahuda a ka̱tsa̱ma̱ ke le. 15 Kpamu ayin a na baci mu utuka̱i le, ka̱ta̱ n kucikpa m pana asuvu ayali e le, ka̱ta̱ n bonoko le, yaba dem a ubuta̱ wu uka̱ni u ni, n iɗika i ni. 16 Ka̱ta̱ wokpo, a li ɗa baci o bonoi ɗa o tonoi kuyotsongu ku uma a̱ va̱, tsu na a kuyaꞋin a kucina n kula ku va̱, <N kucina ta̱ n Ka̱shile ka wuma,> e le feu i ta̱ a ku ciya̱ upeci u le a ka̱tsuma̱ ka uma a̱ va̱. 17 Ama ɗa baci likuci a ka̱tsuma̱ ka aduniyan a iwain kupana, ka̱ta̱ mu utuka̱ a i ɗa muna ra̱ku ra̱ka̱.>>