51
1 I na Vuzavaguɗu u danai i ɗana.
<<La̱na̱, n ku ɗa̱ngusa̱ ta̱ ka̱ a̱ɗu ka vuza munuka
a dama aza Babila koɓolo n aza Kaldiya,
2 ka̱ta̱ n suꞋuku Babila aza na a ku yelekpe yi,
ka̱ta̱ e yelekpe yi,
ka̱ta̱ o bonoko iɗika i ni lekeɗi,
ayin a na baci a kanji ni a kambu dem
a kanna ka atakaci.
3 Ka̱ta̱ i ka̱sukpa̱ katain ko rono utan u ni ba,
ka̱ta̱ kpamu i ka̱sukpa̱i uka a minya o kuvon a̱ ni ba.
ka̱ta̱ i ka̱sukpa̱ olobo e le n wuma ba,
unai osoji e le ra̱ku ra̱ka̱.
4 I ta̱ a kuyikpa̱ ukpa̱ a iɗika i Kaldiya,
ka̱ta̱ a yaꞋan ka muna uye wuya wuya.
5 A dama na Vuzavaguɗu Ka̱shile ko ovonshi
u ka̱sukpa̱ Isaraila n Yahuda ba,
ama iɗika ya aza Kaldiya i shana ta̱ n nushi
adama aza a ciɗa a Isaraila.
6 <<Sumai, i ka̱sukpa̱ Babila,
ka̱sukpa̱ yaba dem wiꞋisa wuma u ni.
Ka̱ta̱ una ɗa̱ adama unushi u ni ba,
adama na gogo na ayin a na Vuzavaguɗu kuyaꞋin katsupu,
u kutsupai ta̱ derere vi na u yaꞋin.
7 Babila wokpo ta̱ mokoko ma kazanariya ekiye a Vuzavaguɗu,
ɗa u zuwai uduniya ra̱ka̱ osoꞋi.
ɗa uduniya osoꞋi ma̱ra̱ ma̱ ni
ɗa a jarai.
8 Gogolo ɗa Babila u yikpa̱i ɗa u ɓosoi,
Shika̱i a dama a̱ ni.
La̱nsa̱ka̱i ni a̱guma̱ a dama an mɓa̱la̱ ni,
ugan ba wa, wo potso.
9 Ci neke ta̱ Babila a̱guma̱,
ama u potso ba.
Tsu ka̱sukpa̱i ni, tsu ka̱na̱ uye,
yaba dem u bono iɗika i ni,
a dama na afada a̱ ni a yawa ta̱ gaɗi Ka̱shile,
u gaɗukpa ta̱ ali u laza eleshu.
10 << <Gogo na Vuzavaguɗu sumba̱ tsu ta̱,
ta̱wa̱i tsu dana Sihiyona
i na Vuzavaguɗu Ka̱shile ka̱ tsu ka yaꞋin.
11 <<Gboroi ayaꞋa a̱ɗa̱,
ɗika yi nra̱ga̱ n ɗa̱.
Vuzavaguɗu ɗa̱ngusa̱ ta̱ a̱ɗu an ngono ma aza a Midiya, a dama kusheshe ku ni kuna wuꞋuna Babila, adama na nanlo ɗa katsupu ka Vuzavaguɗu, katsupu adama a Isa̱ a̱ ni.
12 <<Ɗa̱ngusa̱i kakashi a dama na i fa̱da̱ mashilya ma Babila.
Dansukai aza a kindi,
zuwai le a shamgba ubuta̱ u le,
foɓusoi aza a kavaꞋawan,
Adama na Vuzavaguɗu wi ta̱ a ku yaꞋin ulinga u ni,
u na u dansai a dama aza Babila.
13 OꞋo a vu a na vi ida̱shi a ubuta̱ u mini ma a̱bunda̱i,
a vu na vi n udukuyan wa a̱bunda̱i,
uteku nu yawa ta̱,
ayin a yawa ta̱ a na a ku kotso n avu.
14 Vuzavaguɗu Malyaimili u kucina ta̱ n ka̱cika̱ni.
mayun ɗa n shatangu Babila n uma, an ka̱kuma̱ ka akyun,
ka̱ta̱ a cana vishipa vu lyai a dama a̱ɗa̱.
15 <<A̱yi ɗa vuza na u yaꞋin iɗika n utsura u ni,
ɗa u yaꞋin aduniyan n ugboji u ni,
ɗa u ba̱rukpa̱i gaɗi n kuyeve ku ni.
16 Ɗa baci u lapai kakpanga, ka̱ta̱ mini mana mi gaɗi ma giruwa̱,
u tsu zuwa ta̱ eleshu a u koci wu uduniya,
u tsu suꞋuku ta̱ ulaɗi koɓolo m mini
ka̱ta̱ wutuka̱ n wunla̱ a ka̱tsa̱ma̱ ki uwa i ni.
17 <<Uma ra̱ka̱ alau a ɗa, kpamu e yeve ili ba,
kayimi ka ka̱ma̱li kpamu ko tsokpo ta̱ n wono adama a̱ ka̱ma̱li ka na u yuma yi.
adama na ka̱ma̱li kana u yaꞋin va, ukuna wa a uwa u ɗa,
a ɗa i n wuma ba.
18 I li gbani-gbani i ɗa, ili modoruko i ɗa koci,
ayin a kukiɗa ka afada a yawa baci i ta̱ a ku kuwa̱.
19 Ama a̱yi Ka̱shile kana a̱ tsu aza Isaraila ci o ku tono ki tsu na mpa ba,
adama na a̱yi ɗa vuza na u yaꞋin i li ra̱ka̱,
koɓolo n kumaci ka a gadu ku ni,
Vuzavaguɗu Malyaimili ɗa kula ku ni.
20 <<A vu ɗa ucanuku kuvon u va̱,
ucanuku vishili u va̱
n avu ɗa n ku una uduniya,
n navu ɗa n kuna tsugono,
21 n avu ɗa mu unai odoku n a kumbi e le,
n navu ɗa n la̱nga̱sa̱i ekeke odoku na a kumbi e le,
22 n navu ɗa mu unai vuka n vali ni,
n navu ɗa mu unai kolobo m mokoshi,
n navu ɗa mu unai kolobo n mekere,
23 n navu ɗa mu unai maguɓi n nlala n ni,
n navu ɗa mu unai kacimbi n kanaka ka̱ ni,
n navu ɗa mu unai ogomuna n aza gba̱ra̱gba̱ra̱ e le.
24 Vuzavaguɗu u dana ta̱, <<A̱ a̱shi a ɗa̱ a ɗa n ku tsupa ka Babila koɓolo n aza na i punu ida̱shi a Babila ra̱ka̱ a dama a ka gbani-gbani kana a yaꞋin a Sihiyona.>>
25 <<Mpa mita̱ a tsurala n a̱vu, a vu katali ka munuka.
a vu na vu unai uduniya ra̱ka̱,>>
n ku ɗa̱ngusa̱ ta̱ kukiye ku va̱ ka̱ta̱ n lapa wu,
ka̱ta̱ n tecengu wu vu gida̱la̱ i ɗika,
ka̱ta̱ m bonoko wu vu za vu ukuli a kusan.
26 Babu vuza na u kuɗika katali ka̱ nu yaꞋin ka ku maꞋa,
babu katali ka̱ nu kete kana a ku gita̱ ka̱ ku maꞋa,
adama na vi ta̱ o kokpo a gali a kubana uteku,>>
27 <<Ɗa̱ngushi kakashi ka urotu a iɗika ya.
u lika̱i ishiyaun a̱ ka̱tsuma̱ ku uduniya.
Foɓusoi uduniya adama kuvon n a̱yi,
ɗekei tsugono tsu na mpa adama a̱ ni.
tsugono tsu Arara, n tsu Mini koɓolo n tsu Ashkenaz,
Zagbai kajagaba adama a̱ ni,
tuka̱i n odoku n a̱bunda̱i tsa ka̱kpa̱n ka akyun.
28 Foɓusoi uduniya adama kuvon n a̱yi,
ngono maza Medes,
koɓolo n ana Gomuna n aza gba̱ra̱gba̱ra̱ a̱ ni ra̱ka̱,
n likuci i na i a kulyaꞋa tsugono ra̱ka̱.
29 Uduniya u giruwa̱i ɗa i jeꞋe ikyamba,
adama na Vuzavaguɗu shatangu ta̱ kusheshe ku ni adama Babila
adama a na u la̱nga̱sa̱ Babila
tsu na babu vuza na u ku da̱sa̱ngu ɗe.
30 Ovonshi a Babila a ka̱sukpa̱ ta̱ kuvon,
a shamgba ta̱ a̱pa̱m e le.
Utsura u le u kotso ta̱,
ɗa okpoi uteku tsa a̱ma̱ci,
o songu ta̱ ubuta̱ wi ida̱shi u le n akina,
o koɗo ta̱ aburakpatsu a utsutsu a̱ ni.
31 Kusuma o kutono aza a ilaɗi,
ka̱suki o kutono ka̱suki,
a dama na a bana a dana mogono ma Babila
an e remei likuci i ni,
32 a kpada ta̱ kapasa ka malaꞋa,
ɗa a dyaɓai a daɓa akina,
ɗa osoji e jeꞋi ikyamba.>>
33 Adama na Vuzavaguɗu vo ovonshi Ka̱shile ki Isaraila ka dana ta̱.
Aza Babila i ta̱ an ulanga u kulapa ki lyaꞋa
u na o foɓusoi ɗe a dama na a yaꞋin kulapu,
m megeshe kenu
ɗa ayin a makapa a̱ ni a ku yawa.>>
34 <<Nebukanezaru mogono ma Babila muna mu ta̱,
u jara mu ta̱,
ɗa u bono ki mu lekeɗi,
u soɗongi mu an koko,
ɗa u shatangi ka̱tsuma̱ ka̱ ni m ma̱la̱ki ma̱ va̱,
ɗa u zuwai mu utuka̱i.
35 Ɗa̱skpa̱ ka gbani-gbani kana a yaꞋin kai mu koɓolo n uma a̱ va̱, ko bono u Babila,>>
Ɗa̱skpa̱ aza na i ida̱shi a Sihiyona a dana.
<<Ɗa̱skpa̱ mpasa n tsu m bono a kaci ka aza na i ida̱shi a Kaldiya.>>
Ɗa̱skpa̱ aza Urushelima a dana.
36 A dama nannai, Vuzavaguɗu u dana ta̱
La̱na̱, <<Mpa n ku ɓa̱nka̱ ɗa̱ ta̱
ka̱ta̱ n tsupaka ɗa̱.
n ku zuwa ta̱ kuɗolu ku le kuɗekpe
ka̱ta̱ n zuwa a̱shi a̱ mini a̱ ni e ɗekpe,
37 Ka̱ta̱ Babila wokpo koɓolo ka keveri,
ubuta̱ u kalina wa nshe n ka kamba,
ili i wovon n ili kadanshi,
ubuta̱ u na uma a kuda̱sa̱ngu ba.
38 <<Ka̱ta̱ a̱ ka̱na̱ yura̱ koɓolo an kawu,
ka̱ta̱ a̱ shika̱ an muku n kau.
39 Ama a ayin a na a ɗa̱nga̱i, ka̱ta̱ n foɓuko le ka̱ɗiva̱
ka̱ta̱ n zuwa o soꞋo ma̱ra̱ ma maka le, a dama na a pana uyoꞋo,
ka̱ta̱ a vaku alavu a na a ku kpa̱ɗa̱ ku a̱nga̱,>>
40 Ka̱ta̱ n rono le an nkyon n na a kubanka ubuta̱ u kukiɗa,
an nkyon ko nga̱ji.
tsa ngiri n nga̱ji.
41 <<La̱na̱ bi, tsuna a lyai Babila n kuvon,
ili ya a̱ra̱ɗi uduniya ra̱ka̱.
Babila wokpo ta̱ ili wovon
wu uduniya ra̱ka̱.
42 Mala mita̱ a kulya Babila,
yura̱ ya aɓau a̱ ni i ta̱ a ku pala yi.
43 Likuci i ni yita̱ o kokpo a gali,
iɗika yi uɗekpu n agbata,
iɗika i na uma a tsu da̱sa̱ngu ba,
i na uma a tsu wala ba.
44 N ku takacika ta̱ Belu ka̱ma̱li ka aza Babila
ka̱ta̱ n zuwai u shama i na u soɗongi.
Uduniya wi a kudoku ku shida̱ a kubana ubuta̱ u ni ba.
Ka̱ta̱ mashilya ma Babila ma yikpa̱.
45 <<Sumai yuta̱ punu, a̱ɗa̱ uma a̱ va̱.
Sumai a dama na yisa wuma u ɗa̱.
sumai a dama a wupa ugbain u Vuzavaguɗu.
46 Ka̱ta̱ yutuka̱ a̱ɗu ko i pana wovon ba
ɗa baci i pana a uwa a kadanshi iɗika ya,
ukuna u kadanshi u ka̱ya̱ ka na mpa kau, u ka̱ya̱ ka nan ɗe kpamu kau,
ukuna u vishili iɗika
n ukuna u mogono a vishili n mogono.
47 A dama na, mayun kanna ki ta̱ lo a̱ kuta̱wa̱
kana n kutakacika a̱ma̱li aza Babila,
ka̱ta̱ iɗika i ni ra̱ka̱ yokpo n wono
ka̱ta̱ a̱kpisa̱ a̱ ni ra̱ka̱ okpo furali a iɗika i ni.
48 Ka̱ta̱ uduniya ra̱ka̱ n alingata a gaɗi a yaꞋin ma̱za̱nga̱,
adama aza uɓon u gaɗi a na a kuta̱wa̱ una Babila.
49 Babila wi ta̱ a ku yikpa̱ adama aza Isaraila a na unai,
derere tsu na Babila u yikpa̱i adama uma uduniya a na wunai ra̱ka̱.
50 <<A̱ ɗa̱ i laꞋakai,
sumai, ka̱ta̱ i shamgba ba.
ama, i ciɓa n Vuzavaguɗu ko a yi dangi,
kpamu ka̱ta̱ i ciɓa n Urushelima a a̱ɗa̱u a̱ɗa̱.
51 A̱ tsu tsokpo ta̱ aza wono, adama na uma i ta̱ a kushika tsu,
wono u pala ta̱ a̱shi a̱ tsu,
adama na omoci
a uwa ta̱ a ubuta̱ u ciɗa u kpaꞋa ku Vuzavaguɗu.
52 <<Adama nannai, Vuzavaguɗu u dana ta̱, kanna kita̱ lo a kuta̱wa̱,
kana n ku ki ɗika a̱ma̱li a̱ ni a fada,
n ubuta̱ ra̱ka̱ a ka̱tsuma̱ ki iɗika
ka̱ta̱ aza a muna a inka.
53 Ko ɗa Babila u gaɗukpa gaɗi a Ka̱shile,
ɗa umaꞋin mashilya mu utsura ɗe,
dem n nannai, n kusuꞋuku le ta̱ n vuza munuka,
mpa Vuzavaguɗu mpa ɗa n dansai.
54 <<M panai, ma̱shi a kuta̱ a iɗika i Babila.
kacaꞋa ka munuka ma a̱bunda̱i a iɗika ya aza Kaldiya.
55 Adama na Vuzavaguɗu ciga ta̱ wa bonoko Babila wokpo a gali
ka̱ta̱ kpamu zuwa kelentsu kagbayin ka̱ ni ka shira̱.
56 adama na vuza munuka u ta̱wa̱ le ta̱,
u ta̱wa̱ ta̱ u Babila,
a̱ pura̱ ta̱ ovonshi a̱ ni,
o koɗo ta̱ a utan u le miri-miri,
adama na Vuzavaguɗu Ka̱shile ka katsupu ka a.
mayun ɗa u tsupa.
57 Ka̱ta̱ n zuwa aza a̱gba̱ra̱-gba̱ra̱ n e yevei a̱ ni o soꞋo ma̱ra̱ malaꞋa le u soꞋi,
a na ogomuna a̱ ni, n ajagaba a̱ ni koɓolo n ovonshi a̱ ni,
ka̱ta̱ a vaku alavu a na a kukpa̱ɗa̱ kuɗa̱nga̱,
tsu na mogono, a̱ yi na kula ku ni ku ɗa Vuzavaguɗu va ovonshi udansai.
58 <<Vuzavaguɗu va ovonshi u dana ta̱.
Mashilya magbayin ma Babila
i ta̱ a kufa̱da̱ ma a li iɗika,
ka̱ta̱ a̱tsutsu a̱ ni u gaɗi a
o songu a ɗa n akina.
ka̱ta̱ atakaci a uma okpo ukuna u gbani,
ka̱ta̱ uduniya woꞋotongu ka̱cika̱le le gbani, adama na akina a ɗa a kuleɓece ili na a yaꞋin ra̱ka̱.
59 Kadanshi kana keneki Irimiya u nekei Serayiya, kolobo ka Neriya matsukaya ma MaꞋaseya, a ayin a na u tonoi Zedekiya mogono ma a Yahuda a kubana Babila, a ka̱ya̱ ka̱ na̱shi ka tsugono tsu ni. Serayiya va a̱yi ɗa kajagaba ka aza kindi ki uwa i omoci. 60 Ɗa Irimiya u ɗanai a katagarda atakaci ra̱ka̱ a na a kuciya̱ Babila, wa ta kadanshi ka na mpa ra̱ka̱ kana a ɗanai adama a Babila. 61 Ɗa Irimiya udanai Serayiya. <<Ayin a na baci vu yawai Babila, vu kece katagarda ka na mpa ka ra̱ka̱, 62 ka̱ta̱ vu dana,<OꞋo Vuzavaguɗu vu yaꞋin ta̱ kadanshi adama ubuta̱ u na mpa, an va kula̱nga̱sa̱ u ɗa ra̱kura̱ka̱, tsu na ko ili wuma ya ku da̱sa̱ngu punu ba, vuma ko manama, ka̱ta̱ u ɗa wokpo agali ali a kubana uteku.> 63 Ayin a na baci vu koci ku kece katakarda ka na mpa, vu shiya ka n katali, ka̱ta̱ vu taɗuka e mere ma kuɗolu ku Yufiretus, 64 ka̱ta̱ vu dana,<Tsu na mpa tsu ɗa Babila u ku liɓa, wi kpamu o kudoku ku ɗenga̱ ba, adama atakaci a na Vuzavaguɗu wi a ku tuka̱i le.> >>
Ɗa ɗa kadanshi ka Irimiya.