1 <<Na ɗa wila̱ u kune'e ku kuna ku unushi, ku ɗaɗa ta na ku na ku la'i n ciɗa. 2 Manama ma na a kuya'anka kune'e ku kuna ku unushi a kiɗa ma'a a̱ ubuta̱ u na a tsu kiɗa manama me kune'e ku kusongu, ka̱ta̱ a vishangu mpasa ma a katalikalyuka n akambu a̱ ni dem. 3 Ganu wi ta̱ e kuneke ushuma u manama ma nanlo ra̱ka̱ a katalikalyuka, ushuma u na u kuya'anka nannai u ɗaɗa u winja koɓolo n u na u palai ili i ka̱tsuma̱, 4 muku n ka̱tsuma̱ n re n nanlo koɓolo n ushuma u na wi akambu e le, n ukpan wa asuvu, i ta̱ a kutakpa le koɓolo m muku n ka̱tsuma̱ ma. 5 Ganu wi ta̱ o kusongu le a katalikalyuka tsu kune'e ki ilikulya u Vuzavaguɗu, kune'e ku kuna ku unushi ku ɗa. 6 Mavali de dem ma na mi punu a kpa'a ku ganu mi ta̱ a kufuɗa kutakuma i ɗa, ama i ta̱ a kutakuma i ɗa a̱ ubuta̱ u ciɗa, ɗaɗa ili i na i la'i n ciɗa dem. 7 Wila̱ u kuna ku unushi u nampa wi ta̱ derere n wila̱ u kune'e ku unushi, dem vi le wila̱ u te ɗa. U ɗa dem wi ta̱ o kokpo u ganu a̱yi na u kuya'an ulinga n u ɗa, u na u bonoko vuza ciɗa a̱ ubuta̱ u Vuzavaguɗu. 8 Ganu vu na u ya'ankai vuza yoku kune'e ku kusongu, a̱yi ɗa u kuɗika ukpan u manama ma nanlo ma wo okpo u ni. 9 Kune'e dem ki ili i kashina ku na a kangalai e kebelyu ka̱ viyum ko ka̱ ci'in, ko a katali, yi ta̱ o kokpo i ganu vu na u nekei i ɗa. 10 Kune'e ki ishina dem ko usatari m mani'in ko babu usatari, i ta̱ e kupeceke muku n Haruna derere.

11 <<Na ɗa wila̱ wa alyuka u kune'e ki ida̱shi i singai ku na vuza u kuneke Vuzavaguɗu. 12 U neke baci a ɗa u Vuzavaguɗu tsa agisana a ucikpi, ka̱ta̱ u neke a ɗa koɓolo n akala m boroji vu babu yisiti usatari m mani'in, koɓolo n emeshe a babu yisiti usatari m mani'in, n akala a kiya ku singai a na a satarai m mani'in mayin. 13 Koɓolo kpamu n alyuka a̱ ma̱ta̱na̱ a ucikpi a̱ ni a, ka̱ta̱ u neke a ɗa koɓolo m boroji vu na vi n yisiti. 14 A̱ ka̱tsuma̱ ke kune'e ku nampa, wi ta̱ e kuneke ka̱kutsu ko boroji ke te, wo okpo tsu kune'e u Vuzavaguɗu. Yi ta̱ o kokpo i ganu vu na u tsu vishangu mpasa n kune'e ku ma̱ta̱na̱, a katalikalyuka. 15 Inyama ya alyuka i kune'e ki ida̱shi i singai adama a ucikpi, a takuma i ɗa ra̱ka̱ a kanna ka na a ya'in kune'e ka. Ka̱ta̱ a buwaka i yoku ali kayin ka asa ba. 16 Ama kune'e ku ni adama a kushatangu akucina a ɗa baci ko kune'e ku ucigi u ka̱ɗu, a kutakuma i ɗa a kanna ka na u ya'in alyuka a, kagimi ka na baci ka buwai kpamu i ta̱ a kufuɗa kutakuma i ɗa kayin ka asa baci. 17 Ama inyama ya alyuka i na baci i buwai ali a kanna ka tatsu, i ta̱ o kusongu i ɗa n akina. 18 Ɗa baci a takumai inyama ya alyuka i ma̱ta̱na̱ a kanna ka tatsu, vuza na u nekei a ɗa, Vuzavaguɗu wa̱ ku ushuku n a̱yi ba, ko keceke yi a ɗa a̱ ka̱tsuma̱ ka a singai. A ɗa i ta̱ o kokpo ili yu unata, vuza na baci u takumai i ɗa ko kenu gbani u ronoko ta̱ ka̱ci ka̱ ni unushi.

19 <<Inyama i na baci de dem i sa'wai ili i na yi n nshinda̱, ka̱ta̱ i takuma i ɗa ba, i songi i ɗa a akina. Ama vuza na baci wi babu nshinda̱ wi ta̱ a kufuɗa kutakuma i ɗa. 20 Ama ɗa baci vuza yoku vuza na wi ni nshinda̱ u takumai inyama i kune'e ki ida̱shi i singai i na e nekei Vuzavaguɗu, i ta̱ o kuloko yi punu a̱ ka̱tsuma̱ ka uma a Isaraila. 21 Ɗa baci kpamu vuza yoku u sa'wai ili yi ni nshinda̱, ko vuma, ko manama, ko kpamu ili i gbani-gbani i yoku, ko u lya'i ili i kune'e ki ida̱shi i singai i na e nekei Vuzavaguɗu, vuma nanlo va i ta̱ o kuloko yi punu a̱ ka̱tsuma̱ ka uma a̱ ni.>>

22 Ɗa Vuzavaguɗu u danai Musa, 23 <<Dana uma a Isaraila, ka̱ta̱ i takuma ushuma u kobomburon ba, ko wu nkyon ko kpamu wu nraɗika ba. 24 Ya kutakuma ushuma u manama ma na ma̱ kuwa̱i agifa ba, ko kpamu manama ma na ili i kakamba yu unai ba, ama yi ta̱ a kufuɗa kuya'anka ushuma wa ili i yoku kau. Ko kenu i takuma i ɗa ba. 25 Vuza na baci de dem u takumai ushuma u manama ma na a ya'ankai kune'e ki ilikulya a̱ ubuta̱ u Vuzavaguɗu, i ta̱ o kuloko yi punu a̱ ka̱tsuma̱ ka uma a̱ ni. 26 Ubuta̱ u na baci de dem i da̱sa̱ngi, ka̱ta̱ i takuma mapasa ma manu ko m manama ba. 27 Vuza na baci de dem u takumai mpasa, i ta̱ o kuloko yi punu a̱ ka̱tsuma̱ ka uma a̱ ni.>>

28 Ɗa Vuzavaguɗu u danai Musa, 29 <<Dana uma a Isaraila wila̱ u nampa, vuza na baci de dem u kuneke Vuzavaguɗu alyuka e kune'e ki ida̱shi i singai, wi ta̱ kpamu e kuneke punu kune'e ku ma̱ta̱na̱ u Vuzavaguɗu. 30 N ka̱ci ka̱ ni u tuka̱ n kune'e ku na o kusongu a̱ ubuta̱ u Vuzavaguɗu. U tuka̱ n ushuma m ma̱ka̱nga̱ ma, ka̱ta̱ a̱ ɗengusa̱ ma̱ka̱nga̱ ma tsu kune'e ku kuɗa̱ngusa̱ u Vuzavaguɗu. 31 Ganu wi ta̱ o kusongu ushuma wa zuva a katalikalyuka, ama ma̱ka̱nga̱ tamkpamu mi ta̱ o kokpo ma Haruna m muku n ni. 32 Neke ma̱kuta̱ mu usingai me kune'e ku ma̱ta̱na̱ u ganu, tsu kune'e ku nu. 33 Maku mo kolobo ma Haruna ma na me nekei mpasa n kune'e ku ma̱ta̱na̱ koɓolo n ushuma wa, a̱yi ɗa vuza na u kuɗika ma̱kuta̱ me kune ku singai mo okpo upecu u ni. 34 Punu a̱ ka̱tsuma̱ ke kune'e ku ma̱ta̱na̱ ka aza a Isaraila, n ɗika ta̱ ma̱ka̱nga̱ ma na a̱ ɗengusa̱i m ma̱kuta̱ ma na a ya'ankai kune'e ka, ɗa n nekei Haruna ganu m muku n ni, wo okpo upecu u le u na wu uta̱i wa aza a Isaraila. 35 Na va ɗaɗa upecu u kune'e ki ilikulya ku na a ya'ankai Haruna m muku n ni, ku na e nekei Vuzavaguɗu a kanna ka na e erengi le o okpo anan ganu. 36 A kanna ka na e erengi le va, ɗa Vuzavaguɗu u danai uma a Isaraila e neke le ili i nampa ya yo okpo upecu u le ali n tsukaya tsu na tsa̱ kuta̱wa̱.>>

37 Na va ɗaɗa wila̱ u kune'e ku kusongu, n kune'e ki ishina, n kune'e ku unushi, n kune'e ku kuna ku unushi, n kune'e ku kerengu, koɓolo n kune'e ku ma̱ta̱na̱, 38 u na Vuzavaguɗu u nekei Musa a Kusan ku Sinai. A kanna ka nanlo ka ɗaɗa u danai uma a Isaraila a̱ tuka̱ n kune'e ku le ɗe u Vuzavaguɗu a kusan ku Sinai.