18
Wila̱ adama a tsugbani
1 Ɗa Vuzavaguɗu u danai Musa, 2 <<Ya'an kadanshi n uma a Isaraila ka̱ta̱ vu dana le, Mpa ɗa Vuzavaguɗu Ka̱shile ka̱ ɗa̱. 3 Ka̱ta̱ i ya'an uteku tsu na aza a Masar a ci ya'an ba, a̱ ubuta̱ u na yi ishi n ida̱shi. Ka̱ta̱ kpamu i ya'an tsu na a ci ya'an ɗe a iɗika i Kana'ana ba, a̱ ubuta̱ u na n kubanka ɗa̱. Ka̱ta̱ i ɗika kuyongo ku le ba. 4 I tono wila̱ u va̱ n kadanshi ka̱ va̱ mayin, mpa ɗa Vuzavaguɗu Ka̱shile ka̱ ɗa̱. 5 Tonoi kadanshi ka̱ va̱ n wila̱ u va̱, adama a na vuma na baci u tonoi u ɗa wi ta̱ a̱ kuciya̱ wuma. Mpa ɗa Vuzavaguɗu.
6 <<Ka̱ta̱ vuza u ya'an tsugbani n vuza na i kumaci kute ba. Mpa ɗa Vuzavaguɗu. 7 Ka̱ta̱ vu goyo eshevu a̱ ubuta̱ u kuya'an tsugbani n a̱na̱vu ba. A̱na̱vu a ɗa, ka̱ta̱ vu ya'an tsugbani n a̱yi ba. 8 Ka̱ta̱ vi ya'an tsugbani n sheku va̱ a̱na̱ku a̱ nu ba. Adama a na nannai wi ta̱ a̱ kutuka̱ n kugoyi we eshevu. 9 Ka̱ta̱ vi ya'an tsugbani n tavu ba, ko mekere me eshevu ko kpamu mekere ma̱ a̱na̱vu, ko a matsa ɗa̱ a kpa'a ku te ko a kpa'a ku yoku kau. 10 Ka̱ta̱ vi ya'an tsugbani m matsukaya ma̱ nu ko vashi vu nu ba. Nannai wi ta̱ a̱ kutuka̱ wu n kugoyi. 11 Ka̱ta̱ vi ya'an tsugbani m mekere ma na yi tsuna̱ku kakau ba, adama a na tavu ɗa wi feu. 12 Ka̱ta̱ vi ya'an tsugbani n a̱na̱vu e ke'en ba, adama a na a̱yi feu a̱na̱vu a ɗa. 13 Ka̱ta̱ vi ya'an tsugbani n a̱na̱vu e ke'en ko mokoshi ma̱ ni ba, adama a na a̱yi va feu a̱na̱vu a ɗa. 14 Ka̱ta̱ vu goyo eshevu e ke'en a̱ nu, a̱ ubuta̱ u kuya'an tsugbani n vuka vi ni ba. Adama a na a̱yi feu a̱na̱vu e ke'en a ɗa wu. 15 Ka̱ta̱ vi ya'an tsugbani n kejene ka̱ nu ba, adama a na a̱yi vuka vu kolobo vu nu ɗa, vi ya'an tsugbani n a̱yi ba. 16 Ka̱ta̱ vi ya'an tsugbani n vuka vu mokoshi ma̱ nu ko vangu vu nu ba, nannai wi ta̱ a kuzuwa o okpo n kugoyi. 17 Ka̱ta̱ vi ya'an tsugbani n vuka m mekere ma̱ ni ba. Ka̱ta̱ kpamu vi ya'an tsugbani n vashi ni ba, ko ma na mekere ma̱ ni ma matsai ko matsukaya. Dem vi le umaci u te u ɗa yi, kuya'an nannai va ukuna u gbani u ɗa. 18 Ka̱ta̱ vi ɗika vangu vu vuka vu nu, ali vi ya'an tsugbani n a̱yi ba, nannai wi ta̱ a kuzuwa o okpo vuza n sheku vi ni.
19 <<Ka̱ta̱ vu vaku n vuka a ayin a na wi e kene kusumbu ba, adama a na wi ta̱ nu nshinda̱. 20 Ka̱ta̱ vi ya'an tsugbani n vuka vu vuza na yi ida̱shi ɗeɗevu ba. Nannai wi ta̱ a kuzuwa wu vo okpo n nshinda̱. 21 Ka̱ta̱ vi neke muku n nu tsa alyuka a̱ ubuta̱ u ka̱ma̱li ka na e ci ɗeke Moleka ba, adama a na u ga'an vi neke kula ku Ka̱shile ka̱ nu wono ba. Mpa ɗa Vuzavaguɗu. 22 Ka̱ta̱ vi ya'an tsugbani n tovu vali, tsu na va kuvaku m mavuka ba. Nannai va ili yu unata i ɗa. 23 Ka̱ta̱ vi ya'an tsugbani m manama ba, ta lo va̱ kila̱kpa̱ ka̱ci ka̱ nu. Mavuka feu, ma kuya'an tsugbani m manama ba, nannai va ili yu unata i ɗa.
24 <<Ka̱ta̱ yi ila̱kpa̱ ka̱ci ka̱ ɗa̱ tsu nampa ba, adama a na ta uma a iɗika i na mi o kuloko adama a̱ ɗa̱ i la̱nga̱sa̱i ka̱ci ke le nannai. 25 Ɗaɗa iɗika ya ra̱ka̱ yo okpoi n unata, ɗa n takacikai i ɗa adama a̱ unushi u ni, ali ta na i lokoi aza a na i punu ida̱shi wa̱ ni ra̱ka̱. 26 Ama a̱ɗa̱ mayun ɗa i tono wila̱ u va̱ n kadanshi ka̱ va̱. Ka̱ta̱ i ya'an ko ili i te a̱ ka̱tsuma̱ ki ili yu unata ya ba, nannai ɗa feu n komoci ka na ki ida̱shi n a̱ɗa̱ ko vuza vu umaci. 27 Adama a na aza a na o yongoi iɗika i nanlo n cau a ya'ansa ta̱ ili i nanlo ya, ɗa iɗika ya yo okpoi n unata. 28 Ɗa baci yi ila̱kpa̱i iɗika ya, i ɗa yi ta̱ a ku'iwan ɗa̱ tsu na i ɗa i iwain aza a na ishi punu kafu a̱ɗa̱. 29 Vuza na baci u ya'in ili yu unata i te a̱ ka̱tsuma̱ ki i ɗa, mayun ɗa vuma nanlo i ta̱ o kuloko yi punu a̱ ka̱tsuma̱ ka uma a Isaraila. 30 Tonoi wila̱ u va̱ u na n zuwakai ɗa̱, ka̱ta̱ i ya'an ili yu unata i yoku a̱ ka̱tsuma̱ ki ili i na uma a na o yongoi a iɗika ya kafu a̱ɗa̱ a ya'ansai ba. Ka̱ta̱ yi ila̱kpa̱ ka̱ci ka̱ ɗa̱ a̱ ubuta̱ u kuya'an ki ili yu unata ba. Mpa ɗa Vuzavaguɗu Ka̱shile ka̱ ɗa̱.>>