1 Ɗa Vuzavaguɗu u ya'in kadanshi m Musa, 2 <<Ya'an kadanshi n uma a Isaraila ka̱ta̱ vu dana le, na ɗa ka̱ɗiva̱ ku uzagbi ka̱ va̱, ka̱ɗiva̱ ku uzagbi ka Vuzavaguɗu, ka na i kuɗika ko okpo kanna ka gbayin, adama o oɓolo a ciɗa.

3 <<Yi ta̱ n ayin a̱ ta̱li a na ya kuya'an ulinga, ama kanna ke cindere kanna ka Ashibi ka'a ka kuvuka mayin, kanna ka ciɗa ka na i kuya'an oɓolo. Ka̱ta̱ i ya'an ulinga ba, a̱ ubuta̱ u na baci de dem yi, kanna ka Ashibi ka Vuzavaguɗu ka'a.23:3 Kut 20:8-10; 23:12; 31:15; 34:21; 35:2; Wil 5:12-14

4 <<Nava ele ɗa ka̱ɗiva̱ kakau ka na Vuzavaguɗu u zagbai, ka̱ɗiva̱ ka ciɗa ka na ya kusala a ayin a na a zuwai a ya'ansa ka'a. 5 A kanna ka kupa n ka̱ na̱shi ko wotoi u iyain n kulivi, ɗaɗa kanna ka na a̱ kugita̱ ka̱ɗiva̱ ka Kupasamgbanai ka Vuzavaguɗu. 6 Ka̱ta̱ a kanna ke gendu ko wotoi ka, ka ɗaɗa kanna ka na a̱ kugita̱ Ka̱ɗiva̱ ko Boroji vu babu yisiti. Ka̱ɗiva̱ ka nampa ka Vuzavaguɗu ki ta̱ a kuya'an ali ayin e cindere, ka̱ta̱ a̱ ka̱tsuma̱ ka ayin a nanlo boroji vu na i kutakuma dem vi ya'an babu yisiti. 7 A kanna ka iyain ka̱ ka̱ɗiva̱ ka, uma ra̱ka̱ a ya'an oɓolo a ciɗa, ka̱ta̱ a̱ ka̱sukpa̱ ulinga u na a kiwanai kuya'ansa. 8 Ama i neke kune'e ku kusongu u Vuzavaguɗu ali ayin e cindere. Ka̱ta̱ a kanna ke cindere i ya'an oɓolo a ciɗa, i ya'an ulinga u na i kiwanai ba.>>

9 Ɗa Vuzavaguɗu u danai Musa, 10 <<Ya'an kadanshi n aza a Isaraila, ka̱ta̱ vu dana le, ayin a na baci i uwai a iɗika i na mi a kuciga me neke ɗa̱, ɗa i kya'i ili ya ashina, ka̱ta̱ i tuka̱ ganu m makatalu ma na i gita̱i kushiya va. 11 Ashibi a laza baci a kanna ke ire, ganu u ɗengusa̱ makatalu ma zuva a̱ ubuta̱ u Vuzavaguɗu adama a na ma̱ ciya̱ wishi adama a̱ ɗa̱. 12 A kanna ka na i ɗengusa̱i makatalu ma, yi ta̱ a kulyuka ka̱giri ka̱ ka̱ya̱'a̱ ke te ka na ki babu u'iwin u Ka̱shile tsa alyuka o kusongu u Vuzavaguɗu, 13 koɓolo n kune'e ki ishina i ifa vi re vi kiya ku singai ku na a satarai m mani'in ma zaitu, alyuka a ɗa a na a ya'in n akina u Vuzavaguɗu, ili i ma̱gula̱ni i singai a kubana u Vuzavaguɗu. I ta̱ kpamu e kuneke alyuka a ili i kuso'o a̱ ma̱diki me te ma̱ ma̱kya̱n. 14 Ka̱ta̱ i takuma boroji vu na a ya'in n ishina i savu, ko yu uzungi ba, sai a kanna ka na i tuka̱i bi'i n kune'e ku ɗa̱ ku nampa a̱ ubuta̱ u Ka̱shile ka̱ ɗa̱. Na va wila̱ u ɗa u na u kukotso ba ali a kubana wu ntsukaya n ɗa̱, ko te ɗai yi ida̱shi.

15 <<Ana kanna ka Ashibi ka kuvuka ka lazai, a kanna ke ire ka na vu tuka̱i m makatalu ma na a̱ ɗengusa̱i adama e kune'e, i ta̱ kukece kuden ku cindere derere. 16 I kece ayin amangerenkupa, a kanna ke ire ka Ashibi e cindere, i neke Vuzavaguɗu kune'e ki ishina i savu kpamu. 17 Ko te ɗai yi o kuyongo i tuka̱ n a̱kutsu ere o boroji adama a na e neke Vuzavaguɗu tsu kune'e ku singai ku kuɗa̱ngusa̱. Ka̱kutsu ko boroji dem yi ta̱ a kuya'an ka'a n kiya ku singai ku ifa vi re usatari n yisiti, ka̱ta̱ a ya'anka alyuka a ili i na i va'inkai u Vuzavaguɗu. 18 Koɓolo m boroji va, i neke a̱giri e cindere yaba dem u yawa ka̱ya̱'a̱ ke te, ka̱ta̱ kpamu ka ya'an babu u'iwin u Ka̱shile, n kobomburon ushan u kenu ke te n a̱giri ere. A ya'anka a ɗa kune'en ku kusongu u Vuzavaguɗu, koɓolo n kune'en ki ishina, n ki ili i kuso'o, m ma̱gula̱ni ma singai u Vuzavaguɗu. 19 Ka̱ta̱ i neke kune'e ku ma̱ga̱ji me te adama e kune'e ku unushi, koɓolo n a̱giri e re a na a yawai ka̱ya̱'a̱ kete-kete tsu kune'e ku ma̱ta̱na̱. 20 Ka̱ta̱ ganu u ɗengusa̱ a̱giri ere a tsu kune'e u Vuzavaguɗu koɓolo m boroji vi ili i na i gita̱i kuge'we va. Kune'e ku ɗa ku ciɗa ku ganu a kubana u Vuzavaguɗu. 21 A kanna ka nanlo ka ka̱ta̱ i sala koɓolo ka ciɗa ka̱ta̱ kpamu i ya'an ulinga u na i kiwanai ba. Na va wi ta̱ o kokpo ɗa̱ wila̱ ali nu ntsukaya n na n kuta̱wa̱, n ubuta̱ dem u na i da̱sa̱ngi.

22 <<A ayin a na baci i kya'i ili ya ashina i ɗa̱, ka̱ta̱ i kya'a ali a kubana iga̱'in ya ashina a̱ ɗa̱ ko i ɗaya ba. Ka̱sukpa̱ka̱i aza a unambi n omoci. Mpa ɗa Vuzavaguɗu Ka̱shile ka̱ ɗa̱.>>

23 Ɗa Vuzavaguɗu u ya'in kadanshi m Musa, 24 <<Dana uma a Isaraila a kanna ka iyain ko wotoi u cindere, yi ta̱ a kuvuka, ɗa baci i panai a̱ lika̱i ishari, ka̱ta̱ i ya'an oɓolo a ciɗa i neke kune'e a katalikalyuka. 25 Ka̱ta̱ i ya'an ulinga uteku tsu na i kiwanai ba, ama i neke kune'e ku kusongu u Vuzavaguɗu.>>

26 Ɗa Vuzavaguɗu u ya'in kadanshi m Musa, u danai, 27 <<A kanna ka kupa ko wotoi u cindere wa ki ta̱ o kokpo kanna ka kutakpa unushi, ki ta̱ o kokpo ɗa̱ kanna ko oɓolo ka singai. Yi ta̱ a kuya'an kakuli ka̱ta̱ i neke kune'e ku na o kusongu n akina a̱ ubuta̱ u Vuzavaguɗu. 28 Ka̱ta̱ i ya'an ulinga a kanna ka nanlo ka ba, adama a na kanna ka kanna ka kutakpa unushi ka'a, kanna ka na a kutakpaka ɗa̱ unushi u ɗa̱ a̱ ubuta̱ u Vuzavaguɗu. 29 Vuza na baci dem u kpa̱ɗa̱i kuya'an kakuli a kanna ka nanlo ka, i ta̱ e kupece yi n uma a̱ ni. 30 Mi ta̱ a kuna vuza na de dem u ya'in ulinga a kanna ka nanlo. 31 Ka̱ta̱ i ya'an ulinga ba ko kenu. Na va wi ta̱ o kokpo ɗa̱ wila̱ u gbayin u na i kutono ali a kubana ntsukaya n na n kuta̱wa̱ kelime, ko te ɗai baci i da̱sa̱ngi dem. 32 Kanna ka Ashibi ka'a ka kuvuka ka̱ ɗa̱, ka̱ta̱ i ya'an kakuli. I gita̱ngu n kulivi ka kanna ka̱ kuci ko wotoi ka, ali a kubana a̱ kulivi ku yoku.>>

33 Ɗaɗa Vuzavaguɗu u danai Musa kpamu, 34 <<Dana uma a Isaraila, A kanna ke gendu ko wotoi u cindere ɗaɗa a̱ kugita̱ Ka̱ɗiva̱ ka̱ Ma̱va̱li ma̱ Ka̱shile, i ta̱ a kuya'an ka'a ali ayin e cindere. 35 A kanna ka iyain, ɗaɗa i kuya'an oɓolo a ciɗa. Ka̱ta̱ i ya'an ulinga u na i kiwanai kuya'an ba. 36 Ali ayin e cindere a̱ɗa̱ e kuneke kune'e ku na a kuya'an n akina u Vuzavaguɗu. A kanna ka̱ kunla̱i yi ta̱ a kuya'an oɓolo a ciɗa, ka̱ta̱ i ya'an kune'e ku na a ya'in n akina u Vuzavaguɗu. Na va wi ta̱ o kokpo oɓolo a singai a na i kuya'an kucikpa, yi a kuya'an ulinga u ɗa̱ u na i kiwanai ba.

37 <<Na va ele ɗa ka̱ɗiva̱ kakau ka Vuzavaguɗu ka na u zagbai kokpo ka̱ɗiva̱ ka ciɗa ka̱ kutusa̱ka̱ n kune'e ku na a ya'in n akina u Vuzavaguɗu, kune'e ku kusongu, n kune'e ki ishina, koɓolo kpamu n alyuka n kune'e ki ili i kuso'o ku na ku ga'in a ya'an a kanna dem. 38 Kune'e ku nampa ili i ɗa i na o doki punu a̱ ka̱tsuma̱ ka̱ ka̱ɗiva̱ kakau ka kanna ka Ashibi. Koɓolo kpamu n kune'e ku ɗa̱ n i na dem i ya'in uzuwakpani, koɓolo n kune'e ku ma̱ta̱na̱ ku na i kuneke Vuzavaguɗu.

39 <<Ili i na i gita̱i a kanna ke gendu ko wotoi u cindere wana ɗai i kotso kuɓolongu ili ya ashina i ɗa̱, ya'in ka̱ɗiva̱ ka adama a Vuzavaguɗu ali ayin e cindere. Kanna ka iyain kanna ka Ashibi ka kuvuka ka'a, a kanna ka̱ kunla̱i ka̱ ka̱ɗiva̱ ka, kanna ka kuvuka ka'a. 40 A kanna ka iyain i taɓa umaci wu nɗanga n singai, koɓolo n ekeme a maɗanga ma mashuwa, koɓolo kpamu n acaka a nɗanga a na i n a̱vuku n a̱bunda̱i, n acaka a nɗanga n na mi a̱ ka̱kina̱ ke kuyene, ka̱ta̱ i ka̱na̱ kuya'an ma̱za̱nga̱ a̱ ubuta̱ u Vuzavaguɗu ali ayin e cindere. 41 I ya'an ka̱ɗiva̱ ka nampa u Vuzavaguɗu ali ayin e cindere a̱ ka̱ya̱ dem. Na va wi ta̱ o kokpo wila̱ u na u kukotso ba ali sai ntsukaya n na n kuta̱wa̱ kelime, i ya'an ka̱ɗiva̱ ka nampa o wotoi u cindere. 42 A̱ ka̱tsuma̱ ka ayin e cindere a̱ ka̱ɗiva̱ ka nanlo, ele na i muku mi Isaraila ra̱ka̱ i ta̱ a̱ kuda̱sa̱ngu a̱ nva̱li. 43 Na wi ta̱ a kuzuwa ntsukaya ma aza a Isaraila n na n kuta̱wa̱ dem n ciɓa, a na mpa ɗa n zuwai ikaya i le i yongoi a̱ nva̱li, a ayin a na mu uta̱ka̱i le a iɗika i Masar. Mpa ɗa Vuzavaguɗu Ka̱shile ka̱ ɗa̱.>>

44 Ɗa Musa u salakai aza a Isaraila ka̱ɗiva̱ kakau ka na Vuzavaguɗu u zuwai.