Keneki
Nahum
Kuɓa̱yuwa̱
Katagarda ka Nahum ka ishipa i ma̱za̱nga̱ i ɗa adama a̱ uyikpi u Niniva, likuci i gbayin i Asiriya i na yi a tsurala n Isaraila. Ugan ba a ɗana ta̱ katagarda ka a ka̱ya̱ ka (612) kafu a matsa Yesu. I ta̱ e kene uyikpi u Niniva atakaci a̱ Ka̱shila̱ a ɗa adama a ugbamukaci u ni n ka gbani-gbani ka̱ ni. Atakaci a nampa a̱ ta̱wa̱ ta̱ a ukocishi u tsumani ci cindere kafu a matsa Yesu.
Ili i na yi punu udari
Afada adama a Niniva 1:1-15
Uyikpi u Niniva 2:1; 3:19
1
Akaka adama a Niniva. Na lo va ɗaɗa katagarda ka kene ka na keneki Nahum vuza va aza a Elikoshi we enei.
Wupa u Vuzavaguɗu adama a Niniva
Vuzavaguɗu Ka̱shile vuza cishe'e ɗa,
vuza na u ci ya'an katsupu,
Vuzavaguɗu vuza katsupu ɗa,
vuza va asuvu a usuɗukpi kpamu.
Vuzavaguɗu u tsu tsupa ta̱ irala i ni,
u tsu bonoko ta̱ wupa u ni a̱ ubuta̱ wi irala i ni.
Vuzavaguɗu vuza wupa ɗa gogo'o ba,
ama vuza tsu tsugbayin n utsura ɗa,
Vuzavaguɗu wi a̱ kukpa̱ɗa̱ kutakacika vuza vu unushi ba.
Uye u na Vuzavaguɗu u tsu wala, kabatalikpau ka gbayin ka tsu vugula̱ ta̱,
eleshu kpamu ɗaɗa kubuta̱ ku ene a̱ ni.
U tsu ɓarangu ta̱ mala ali me ɗekpe,
u tsu zuwa ta̱ nyeneke ra̱ka̱ n ɗekpe.
ali n ubuta̱ u kalina a Bashan nu nsasan n Kamelu dem,
a na i n mita̱ ma̱ ta̱ku nu nɗanga n tsu ɗekpe ta̱,
a̱pa̱lu a Lebano dem a tsu lumba ta̱.
Nsasan m gbagba'in n tsu gba̱ɗa̱ ta̱ e kelime ka̱ ni,
aginda kpamu a tsu derikpe ta̱.
Ka̱ta̱ iɗika i jengeɗe e kelime ka̱ ni,
e, ali aduniyan koɓolo n ili i na yi punu dem.
Yayi wa kufuɗa kushamgba e kelime ka̱ ni, u ya'an baci wupa?
Yayi wa kufuɗa kugbama asuvu e kelime ka̱ ni, ɗa baci u ya'in wupa?
Wupa u ni u tsu va̱ma̱ ta̱ tsa akina,
akpanlai a gbagba'in o tsu ɓoso ta̱ e kelime ka̱ ni.
Vuzavaguɗu vuza singai ɗa,
ubuta̱ u kusheɗeku u ɗa wi a kanna ka atakaci.
U tsu ere ta̱ aza a na a̱ tsu sheɗeku wa̱ a̱ ni.
Ama tsu mini ma na ma ayai wi ta̱ a kuni'wa̱nta̱ngu irala i ni ra̱ka̱,
wi ta̱ a kuyawaka Niniva uteku,
ka̱ta̱ u loko aza a na a iwain ni a kubana a̱ ka̱yimbi.
Yiɗa̱i i zuwai ɗa yi a kushiya tsurala n Vuzavaguɗu?
Ili ra̱ka̱ ko yiɗa̱i baci wi ta̱ a kubonoko i ɗa gbani,
babu vuza na u kuya'an tsurala n a̱yi kure.
10 Irala i ni,
i ta̱ ugbaɓi tsa awana,
i ta̱ an oso'i a na a oso'i ma̱ra̱ ma makai le,
a n nwalu n a tangalangi a maza me le,
i ta̱ o kusongu le ra̱ka̱,
an mita̱ me ɗekpu.
11 Punu a̱ ka̱tsuma̱ ka Niniva, ɗa vuza yoku wu uta̱i,
vuza na u foɓusoi ka gbani-gbani a kubana u Vuzavaguɗu,
u nekei odoki a gbani-gbani.
12 Ili i na Vuzavaguɗu u danai i ɗaɗa na,
<<A̱ɗa̱ aza Asuriya, ko a na wo okpoi yi ta̱ n ka̱bunda̱i,
tukpa n utsura kpamu,
i ta̱ kugbatya ɗa̱, ka̱ta̱ a takpa ɗa̱.
A̱ɗa̱ aza a Yahuda, ko a na wo okpoi n neke ɗa̱ ta̱ atakaci,
mi o kudoku ma takacika ɗa̱ kpamu ba.
13 Gogo na mi ta̱ o kukoɗo kogboro ke eɗeku a̱ ɗa̱,
ka na aza Niniva a zuwakai ɗa̱,
ka̱ta̱ kpamu n kasa ikani,
i na a shiyakai ɗa̱.>>
14 Vuzavaguɗu u neke ta̱ kadanshi,
adama a Niniva u danai,
<<I o kudoku kupana kula ku nu ba.
A̱ma̱li u she'wei n uluwi a̱ nu,
mi ta̱ a kukapa a ɗa a̱ ka̱tsuma̱ ka a̱'isa̱ a̱ma̱li a̱ nu,
ka̱ta̱ n foɓuso ko wu kasaun,
adama a na avu ili i ma̱riki i ɗa ba.>>
15 La̱na̱, a gaɗi vu nsasan m gbagba'in,
ene a vuza na u tsu tuka̱ n arabali a singai a ɗa na,
a̱yi na u tsu sala ukuna u ma̱ta̱na̱.
Avu Yahuda, zuwa ka̱ɗiva̱ a̱ nu,
Shatangu uzuwakpani u nu.
Adama a na ili i gbani-gbani i nanlo Niniva,
a takpai ta̱ ra̱ka̱.
i ta̱ a ku una le ra̱ka̱-ra̱ka̱.