3
Niniva wi ta̱ o ko okpo agali
1 Ili ya atakaci i ɗa avu likuci i munuka,
a̱yi na u shanai tukpa n a'uwa a̱bunda̱i,
n ucanuku u na a isai.
2 Panai, izumgbi yi nshashau n yi ekeke,
n izumgbi ya ilaɗi yo odoku,
n kugba̱ɗa̱ ke ekeke o odoku.
3 Inda bi'i akumbi odoku o kuvon,
otokobi nu nsara a kutasa tsa akina,
na ɗa koɓolo ka uma ka na unai,
na ɗa kaginga ke even a uma,
even a uma babu uteku,
uma a̱ kuta̱ɗa̱tsa̱ a gaɗi vu even a ikyamba.
4 Ili i nanlo ra̱ka̱ i ya'an ta̱ adama a tsugbani ci Niniva,
kashakanlai kasingai ka nanlo ka una̱ wu uyo'o,
ma̱ma̱ci mo tsuboci ma a,
a̱yi na u ya̱nsa̱i uduniyan ubuta̱ u tsugbani u ni,
uma kpamu a̱ ubuta̱ wa ala'win a̱ ni.
5 Vuzavaguɗu mala'imili u danai, mi ta̱ a tsurala n avu,
mi ta̱ a̱ ku Va̱ga̱lukpa̱ ciyanpa tsu nu, ka̱ta̱ m palaka a̱shi a̱ ni.
Ka̱ta̱ n zuwa iɗika kakau yi ene ciyampa tsu nu,
ka̱ta̱ tsugono kpamu ce ene wono u nu.
6 Mi ta̱ a ku vishangu wu ili yu unata,
ka̱ta̱ n goyo wu,
n bonoko wu ili i kugoyi.
7 Aza a na e enei nu ra̱ka̱ i ta̱ a kusuma ka̱ta̱ a dana,
<<Niniva wo okpo ta̱ agali, ya yi u kuya'an kpalu ku ni?>>
Te ɗai n kuciya̱ aza na e kuneke yi kadanshi ka uremi u ka̱ɗu?
8 Niniva, avu vu la'a ta̱ likuci i Tebesu,
i na yi a ka̱kina̱ ka kuyene ku Nilu,
m mini uka̱ra̱'i u ni dem?
Mala ma'a ubuta̱ u kusheɗeku u ni,
mini ma'a mashilya ma ni.
9 Itopiya m Masar ɗa utsura u ni,
Futu n Libiya ele ɗa a̱ tsu ɓa̱nka̱ yi,
10 N nannai dem a ɗikai ni,
a bankai ugbashi,
a minjarai aci a̱ muku n ni,
a nsanji mu uye dem.
A ya'in kazagba adama nkoshi m gba̱ra̱-gba̱ra̱ n ni
ɗa a shiyai uma a gbagba'in a̱ ni dem ni ikani.
11 Avu a̱ ka̱ci ka̱ nu Niniva vi ta̱ o kuso'o ma̱ra̱ ma makau,
ka̱ta̱ vu takacika n a̱bunda̱i,
ali vu la̱nsa̱ ubuta̱ u kusheɗeku a̱ ubuta̱ wi irala i nu.
12 Nshilya mu utsura u nu ra̱ka̱ mi ta̱ o ko okpo babu utsura,
i ta̱ a kulya'a le tsu umaci u ma̱biri,
u na u ge'wei,
a makyan ma na baci a̱ gba̱ɗa̱i maɗanga ma,
ka̱ta̱ umaci wa u yikpa̱ a̱ una̱ u vuza na u kulya'a le.
13 La̱na̱ bi'i osoji a̱ nu,
i ta̱ tsa a̱ma̱ci e mere ma̱ nu.
Utsutsu wi iɗika i nu yi ta̱ uɓa̱yuwi,
adama a irala i nu,
akina e leɓece ta̱ agbaguratsu e le.
14 Kenuku mini adama a na i ta̱ a ku kambuku wu,
tarai mini ma̱ a̱bunda̱i kafu kuvon ku yawa.
Doku katsura ka nshilya n nu,
bana a kadaɓa vu na̱na̱ ci'in,
ɗika ili kuya'anka iputa̱.
15 Dem n ofoɓuso a nampa,
akina a ɗa a kulya'a wu,
kotokobi kpamu ki ta̱ a kugbatya kuɗeku ku nu.
Ka̱ta̱ a lya'a wu tsa kakyu'un.
Vu doku ka̱bunda̱i ka̱ nu tsa akyu'un,
ɗa vu yimkpai n ka̱bunda̱i ci ishigi.
16 Vu doki ka̱bunda̱i ka aza a tsulaga a̱ nu,
ali a la'i ka̱bunda̱i ka azangata a gaɗi,
e le i ta̱ tsu nta̱ɗa̱ma̱ci n na n tsu ba̱ra̱kpa̱ evelyu e le,
ka̱ta̱ a imkpa a laza.
17 Ngono n nu i ta̱ tsu nta̱ɗa̱ma̱ci,
nkoshi m gba̱ra̱-gba̱ra̱ n nu mi ta̱ an ka̱kuma̱ ka nta̱ɗa̱ma̱ci
a ku tele a̱ wuya̱n
a ayin a uta̱ni
ka̱ta̱ makyan ma na baci kanna ku uta̱i a imkpa a laza,
babu vuza na u yevei ubuta̱ u na a kubana.
18 Avu mogono ma Asiriya,
nguɓi n nu n lata ta̱,
e yevei a̱ nu a gbaɗika ta̱.
Uma a̱ nu a wacuwai a nsasan,
babu vuza na u ku ɓolongu le.
19 Babu i na i kupotsotongu untsu a̱ nu,
untsu a̱ nu a munuka a ɗa.
Vuza na baci de dem u panai arabali a̱ nu,
ka̱ta̱ u ɓasa ekiye u dana,
adama a na yayi u kpa̱ɗa̱i ku takacika,
ekiye a̱ nu?