1 Ana wotoi u Nisan u lazai ɗaɗa wotoi u na̱shi a̱ ka̱ya̱ ka kamanga ko tsugono tsu Atazesu mogono. Ana a̱ tuka̱i ni m ma̱kya̱n, ɗa n ɗikai ma'a m bankai mogono. Mogono tana ma sa'wa kene una̱mgbi u ka̱tsuma̱ u va̱ ba sai makyan ma nampa. 2 Ɗa mogono me ecei mu,<<Yiɗa̱i i zuwai ɗa vi una̱mgbi u ka̱tsuma̱ tsu nampa? Tana vi nu mɓa̱la̱ ba. Babu ili i na ya kuzuwa wu vu yongo tsu nampa sai vi a̱ una̱mgbi u ka̱tsuma̱.>>

Ɗa m panai wovon ka̱u. 3 Ɗa mu ushuki mogono n danai, <<Wuma u nu u geshe mogono. Yiɗa̱i i kusa̱nka̱ mu una̱mgbi u ka̱tsuma̱? Likuci i na a̱ ciɗa̱ngi ikaya i va̱ i ɗa yokpo ta̱ agali, ɗa kpamu o songi a̱ɓa̱ya̱ntsu a̱ utsutsu u likuci wa n akina.>> 4 Ɗa mogono ma danai mu, <<Yiɗa̱i vu cigai n ya'anka wu?>>

Ɗa n ya'in kavasa a kubana a̱ Ka̱shile ka gaɗi. 5 Ɗa n danai mogono,<<U ga'an baci mogono, ɗa kpamu mpa kagbashi ka̱ nu n ciya̱i mapasa ma singai wa̱ nu, mi ta̱ a kuciga vu suku mu a kubana a̱ likuci i Yahuda, a̱ likuci i na a̱ ciɗa̱ngi ikaya i va̱, adama a na m ma'asaka likuci ya.>> 6 A makyan ma tana Egbere wi ta̱ lo ida̱shi ɗevu n mogono, ɗa mogono me ecei mu, <<Ayin a ya'in a ɗai ma kuya'an? Wana ɗai kpamu mo kubono?>> Ana n danai ni. Ɗa wu ushuki ufolu uva̱, ɗa n danai ni makyan ma nwalu ma̱ va̱. 7 Ɗa n danai mogono,<<U ga'an baci mogono, ya'an u ɗanaka mu katagarda ka na n kuneke i Gomuna yi uɓon u ɗakai e kuyene ku Yufiretu adama a na a̱ ka̱sukpa̱ mu n wala ali n yawa a̱ likuci i Yahuda babu kadama. 8 Ka̱ta̱ kpamu vu neke mu katagarda ka na n kuneke Asafa vuza na wi a̱ kula̱na̱ kutsun ku mogono, u dana yi u neke mu nɗanga n na ma kuya'anka aburakpatsu a utsutsu una u kuka̱na̱ a̱'isa̱ a, koɓolo n nshilya n likuci ma, kpamu n kpa'a ku na mpa n kuda̱sa̱ngu.>> Ɗa mogono me nekei mu ili ra̱ka̱ i na me ecei ni, adama a na kukiye ku Ka̱shile ki ta̱ koɓolo nu mpa. 9 Ɗa mogono ma̱ suki ovonshi osoji koɓolo n ka̱bunda̱i ko odoku a bana koɓolo nu mpa, ɗa n ya'in nwalu ma a kubana a kapashi ke kuyene ku Yufiretu ɗa n nekei i gomuna i le atagarda akaka o mogono a. 10 Ama ana Sanbala vuza vu Horon n Tobiya vuza kelime vu iɗika ya aza a Amona a panai vuma vu yoku u ta̱wa̱ ta̱ adama a na u lapula ida̱shi i ma̱ta̱na̱ ya aza a Isaraila, ɗa a̱ na̱mgbi ka̱tsuma ka̱u.

11 Ana n yawai a Urushelima, ɗa n yongoi bi'i lo ali ayin a tatsu. 12 Ɗa n ɗa̱nga̱i n kayin, mpa n uma o yoku kenu. N dana ko vuza te ili na Ka̱shile ka zuwai a̱ ka̱ɗu ka̱va̱ n ya'an adama a Urushelima ba. Babu manama ma na n ɗikai sai majaki ma na n kumbai koci. 13 Mu uta̱i n utsutsu u ka̱ra̱'a̱ a kubana a̱ a̱shi a̱ mini e kuyene ku Ka̱di n tsutsu u ka̱kiza̱, ɗa me enei mashilya ma Urushelima ma na ma̱ yikpa̱i n a̱ɓa̱ya̱ntsu a̱ utsutsu a na akina o songi va. 14 Ɗa m banai a̱ utsutsu u ka̱shi ka̱ mini n kuɗolu ku mogono, ama majaki ma na n kumbai va ma̱ ciya̱ ubuta̱ u kutono ba. 15 Nannai ɗa n tonoi punu a̱ ka̱ra̱'a̱ ka nu n la̱na̱i mashilya ma n kayin ka. Ɗa n kpatalai m bonoi n uye u na mu utuka̱i, m bonoi a̱ likuci n utsutsu u ka̱ra̱'a wa. 16 Babu vuza te a̱ ka̱tsuma̱ ka nkoshi m gba̱ra̱-gba̱ra̱ u yevei ubuta̱ u na mu uta̱i ko u yeve ili i na mi a kuciga kuya'an. Ka̱ta̱ kpamu n dana uma a̱va̱ aza a Yahuda ukuna ba, ko tana anan ganu, ko aza e kelime, ko nkoshi m gba̱ra̱-gba̱ra̱ ko aza a na i a kuya'an ulinga wa. 17 Ɗa n danai le, <<Yene ta̱ atakaci a na tsu uwai, niniɗai Urushelima wo kokpo agali n tsu na akina o songi a̱ɓa̱ya̱ntsu a̱ ni. Ta̱wa̱i, tsu ma'asakai mashilya ma Urushelima ma, adama a na ka̱ta̱ ci lya'a kelime n kupana wono ba.>> 18 Ɗa tana n danai le tsu na kukiye ku Ka̱shile ka̱ va̱ ki koɓolo nu mpa n ili na mogono ma danai mu.

Ɗa ushuki, <<Ɗa̱nga̱i tsu gita̱ kuma'asaka mashilya ma.>> Ɗa tana a̱ ciya̱i ka̱ɗu ka kuya'an ulinga u singai. 19 Ama ana Sanbala vuza vu Horon, n Tobiya vuza kelime vu iɗika i Amona n Gesheru vuza vu Araba a panai ili na ci sheshei kuya'an, ɗa a givai tsu n o zosoi. A danai, <<Yiɗa̱i yi a kuya'an? Yi ta̱ a kuciga kuya'anka mogono ugbamukaci?>> 20 Ɗa mu ushuki le n danai, <<Ka̱shile ka gaɗi ki ta̱ e kuneke tsu ulya'i u na tsa kuya'an u ɗa. A̱tsu aza a na ci a kuya'anka yi tsugbashi ci ta̱ a̱ kugita̱ kuma'a ka. Ama a̱ɗa̱ yi n upecu, ko ili na a kuciɓasa n a̱ɗa̱ a Urushelima ba.>>