1 Ɗa Vuzavaguɗu u ya'in kadanshi m Musa n Haruna, u danai. 2 <<A ayin a na baci de dem aza a Isaraila a̱ kuda̱sa̱ngu, yaba dem u shamgba n kakashi ka kumaci ka kpa'a ka̱ ni a̱ ka̱tsura̱ ka̱ ni uka̱ra̱'i m Ma̱va̱li mo Oɓolo da'angi m ma'a. 3 Aza a na a̱ kuda̱sa̱ngu a uɓon u kasana, ele ɗa kumaci ka aza a Yahuda. I ta̱ a kushamgba n kakashi ka kpa'a ke le, uteku tsu na e peciki le kefeku-kefeku. Vuza kelime va aza a Yahuda a̱yi ɗa Nashon kolobo ka Aminadabu. 4 Ka̱bunda̱i ka uma a̱ ni, ka yawa ta̱ a̱kpa̱n amangatatsunkupa n na̱shi n amangatawa̱nta̱li (74, 600). 5 Ka̱ta̱ kumaci ka aza a Isaka ku tono ɗevu n ele. Vuza kelime va aza a Isaka a̱yi ɗa Nataniya kolobo ka Zuwaru. 6 Ka̱bunda̱i ka uma a̱ ni, ka yawa ta̱ a̱kpa̱n amangerenkupa n a̱ na̱shi n amangatawa̱na̱shi (54, 400). 7 Ka̱ta̱ kumaci ka aza e Zabalun ku tono. Vuza kelime va aza e Zabalun a̱yi ɗa Eliyabu kolobo ke Helon. 8 Ka̱bunda̱i ka uma a̱ ni, ka yawa ta̱ a̱kpa̱n amangatawenre n kupa n e cindere n amangatawa̱na̱shi (57, 400). 9 Ka̱bunda̱i ka uma a Yahuda a na i punu a̱ ka̱tsura̱ ka ra̱ka̱ a yawa ta̱ uma a̱kpa̱n amangatawun n amangatawunkunla̱i n a̱ ta̱li n amangatawa̱na̱shi (186, 400). Ele ɗa aza a na a̱ kugita̱ kuɗa̱nga̱.

10 <<N uɓon u ɗaka tamkpamu, kumaci ka aza Ruben ku ɗa a kushamgba ɗe n kakashi ka kpa'a ku le, uteku tsu na i kefeku-kefeku. Vuza kelime va aza Ruben a̱yi ɗa Elizu kolobo ka Shedeyu. 11 Ka̱bunda̱i ka uma a̱ ni ka yawa ta̱ uma a̱kpa̱n amangatawun a̱na̱shi n a̱ ta̱li n amangatawantawun (46, 500). 12 Aza a na o kutono kumaci ku Ruben ka ele ɗa kumaci ku Simiyon. Vuza kelime vu kumaci ku Simiyon va a̱yi ɗa Shelumiye maku ma Zurishada. 13 Ka̱bunda̱i ka uma a̱ ni a yawa ta̱ a̱kpa̱n amangerenkupa n kuci n amangatawantatsu (59, 300). 14 Kumaci ku Gadu ele ɗa aza na o kutono. Vuza kelime vu kumaci ku Gadu va a̱yi ɗa Eliyasafa maku ma Dewuyelu. 15 Ka̱bunda̱i ka uma a̱ ni ka yawa ta̱ a̱kpa̱n amangere n a tawun n amangatawa̱nta̱li n amangerenkupa (45, 650). 16 Ka̱bunda̱i ka ra̱ka̱-ra̱ka̱ ka kumaci ku Ruben ka yawa ta̱ uma a̱kpa̱n amangatawun n amangerenkupa n kete, n amangatawa̱na̱shi n amangerenkupa (151, 450). Ele ɗa aza a na o kokpo ugboku u ire a makyan ma na baci aza a Isaraila a cigai kuta̱ kuya'an nwalu.

17 <<Kumaci ku na ko kutono ku ɗaɗa, kumaci ka aza e Levi, i ta̱ a̱ kuta̱ a̱ kuɗa̱nga̱ punu e mere ma̱ ka̱tsura̱ ma, uɗiki m Ma̱va̱li mo Oɓolo ma. Kumaci kakau i ta̱ a kuwala tsu na o tonukoi le o yongo punu a̱ ka̱tsura̱ ka, yaba dem n kakashi ka kumaci ku ni.

18 <<Ɗe a̱ ka̱livi, ka̱tsura̱ ka kumaci ku Ifirayimu ele ɗa a kushamgba ɗe. Vuza kelime vu kumaci va a̱yi ɗa Elishama maku ma Amihudu. 19 Ka̱bunda̱i ka uma a̱ ni ka yawa ta̱ a̱kpa̱n amangere n amangatawantawun (40, 500). 20 Kumaci ku na ku tonoi Ifirayimu ku ɗaɗa kumaci ku Manasa. Vuza kelime vu kumaci vu Manasa va a̱yi ɗa Gamaliya maku ma Pedazuru. 21 Ka̱bunda̱i ka uma a̱ ni ka yawa ta̱ a̱kpa̱n kamangankupa n e re n amangatawenre (32, 200). 22 Kumaci ku Bayami ele ɗa aza a na i o kutono. Vuza kelime vu kumaci va a̱yi ɗa Abidan maku ma Gidiyon. 23 Bayami n Abidan maku ma Gidiyon i ta̱ uma a̱kpa̱n kamangankupa n uma a tawun n amangatawa̱na̱shi (35, 400). 24 Aza a na e kecei a̱ ka̱tsuma̱ ka kumaci ki Ifirayimu a̱ ka̱tsura̱ ke le ka, i ta̱ uma a̱kpa̱n amangatawun n kunla̱i n amangatawun (108, 100). Ele ɗa aza a na o kokpo ugboku u tatsu a makyan ma na baci aza a Isaraila a cigai kuta̱ kuya'an nwalu.

25 <<Aza a na a̱ kushikpa̱ a̱pa̱m e le a uɓon u gaɗi ele ɗa kumaci ku Dan, ka̱ta̱ a shamgba a̱ ubuta̱ u kakashi ka kpa'a ke le uteku u kefeku ke le. Vuza kelime vu kumaci ku Dan va a̱yi ɗa Ahiyeza maku ma Amishada. 26 Ka̱bunda̱i ka uma a̱ ni a ka yawa ta̱ uma a̱kpa̱n amangatatsu n ere n amangatawencindere (62, 700). 27 Kumaci ku Ashera ele ɗa a kuvaku o tono le. Vuza kelime vu kumaci ku Ashera ka a̱yi ɗa Pagiyelu maku ma Okiran. 28 Ka̱bunda̱i ka uma a̱ ni ka yawa ta̱ uma a̱kpa̱n amangere n kete n amangatawantawun (41, 500). 29 Kumaci ku Nafutali ku ɗa ko kutono le ka̱ca̱pa̱. Vuza kelime vu kumaci ku Nafutali va a̱yi ɗa Ahira maku ma Enanu. 30 Ka̱bunda̱i ka uma a̱ ni ka yawa ta̱ uma a̱kpa̱n amangerenkupa n a tatsu n amangatawa̱na̱shi (53, 400). 31 Ka̱bunda̱i ra̱ka̱-ra̱ka̱ ka uma a Dan a, ka yawa ta̱ uma a̱kpa̱n amangatawun n amangerenkupa n e cindere n amangatawa̱nta̱li (157, 600). Ele ɗa aza a na o ko okpo a ukocishi a makyan ma na a̱ kuɗa̱nga̱ a̱ ka̱sukpa̱ ka̱tsura̱ n kakashi ke le.>>

32 Nava ɗaɗa aza a Isaraila, aza a na e kecei va, yaba dem m kpa'a ku ni. N ikaya i le n kumaci ku le a yawa ta̱ uma a̱kpa̱n amangatawa̱nta̱li n a tatsu n amangatawantawun n amangerenkupa (603, 550). 33 Ama Vuzavaguɗu u ya'an ta̱ ɗe kadanshi m Musa u danai, ka̱ta̱ e kece aza e Levi ubuta̱ u te n aza a Isaraila ba.

34 Ɗa aza a Isaraila a ya'in ra̱ka̱ i na Vuzavaguɗu u danai Musa. Ɗa yaba dem u da̱sa̱ngi a̱ ubuta̱ u kakashi ka kpa'a ka̱ ni, tsu nanlo tsu ɗa kpamu a̱ uta̱i, yaba dem n kefeku ka̱ ni m kpa'a ku ni.