23
Balam u zuwakai aza a Isaraila una̱singai
1 Ɗa Balam u danai Balaku, <<MaꞋaka mu atali alyuka e cindere na, ka̱ta̱ vu tuka̱ mu mbomburon n cindere n a̱giri e cindere feu.>> 2 Balaku u yaꞋin tsu na Balam u danai. Ɗa Balaku m Balam a yaꞋin alyuka a katalikalyuka dem n kobomburon n ka̱giri. 3 Ɗa Balam u danai Balaku, <<Shamgba ɗevu n ubuta̱ u kuneꞋe ku kusongu ku nu, mpa kpamu mi ta̱ a kulaza, yoku Vuzavaguɗu wi ta̱ a̱ kuta̱wa̱ u gasa nu mpa. Ili i na baci u yotsonki mu mi ta̱ a kudana wu.>> Ɗa u lazai u banai a̱ ubuta̱ u kaginda.
4 Ka̱shile ka cinai Balam, ɗa Balam u danai ni, <<N gere ta̱ atali alyuka e cindere ɗa n yaꞋankai le kuneꞋe ku kobomburon n ku ka̱giri a katalikalyuka dem.>> 5 Ɗa Vuzavaguɗu u zuwakai Balam kadanshi una̱ u ni u danai, <<Bono u Balaku, ka̱ta̱ vu dana yi.>> 6 Ɗa u bonoi wa̱ ni, u cinai ni kisani a̱yi nu nkoshi m gba̱ra̱-gba̱ra̱ m Mowabu dem a̱ ubuta̱ u kuneꞋe ku kusongu ku ni. 7 Balam ta na u danai ni kadanshi ke kene ka̱ ni, u danai,
<<Balaku mogono ma Mowabu wu uta̱ ta̱ nu mpa a Aram ɗa u tuka̱i mu na,
na ɗe a nsansa n kasana u danai,
<Ta̱wa̱, vi yaꞋanka mu Yakubu una̱,
ta̱wa̱, vi yaꞋanka mu aza a Isaraila una̱.>
8 Nini ɗai n kuyaꞋanka vuza una̱,
a na Ka̱shile ka yaꞋankai ni ba?
Nini ɗai kpamu n kuyaꞋanka,
vuza na Vuzavaguɗu u yaꞋankai una̱ ba?
9 E, na ɗe gaɗi vu katali me ene le ta̱,
na ɗe gaɗi vu nsansa me ene le ta̱,
aduniyan a ɗa a na i ida̱shi endeꞋen ni,
e yeve ta̱ a̱ ciya̱ ta̱ una̱singai u na u laꞋi aduniyan dem.
10 Yayi u kufuɗa kukece kumaci ku Yakubu?
Ka̱bunda̱i ke le an kubuta̱ ki iɗika,
ka̱bunda̱i ke le ka laꞋa ta̱ kukece.
YaꞋan ukpa̱ u va̱ wo okpo ukpa̱ u mejege,
YaꞋan ukocishi u va̱ wo okpo tsu le.>>
11 Ɗa Balaku u danai Balam, <<Yiɗa̱i vi yaꞋankai mu na? N ɗika wu ta̱ adama a na vi yaꞋanka irala a̱ va̱ una̱, ɗa na, vi yaꞋan ili ba, ɗa kucikpa vu zuwakai le una̱singai.>>
12 Ɗa wu ushuku ni u danai, <<Kadanshi ka na Vuzavaguɗu u zuwai una̱ u va̱ ka ɗaɗa n kudansa koci ba?>>
13 Balaku u danai ni, <<N folono wu ta̱ ta̱wa̱ tsu bana ubuta̱ u yoku, ubuta̱ u na ve kene le. Vi ta̱ e kene kagimi, ama ve kene le dem ba, ka̱ta̱ vi yaꞋanka mu ele una̱.>> 14 Ɗa u ɗikai ni a kubana e keteshe ka Zofim, a gaɗi vu Pisiga. U maꞋi atali alyuka e cindere, ɗa u yaꞋin kuneꞋe n kobomburon n ka̱giri a katalikalyuka dem. 15 Balam u danai Balaku, <<Shamgba punu na a uɓon u kuneꞋe ku kusongu ku nu, mi ta̱ a kubana kucina Vuzavaguɗu na ɗe.>>
16 Ɗa Vuzavaguɗu u gasai m Balam ɗa u zuwai kadanshi una̱ u ni u danai, <<Bono u Balaku, vu dana yi ili i na n danai nu.>> 17 Ana Balam u bonoi u Balaku, u cinai ni kisani a uɓon u kuneꞋe ku kusongu, nu nkoshi m gba̱ra̱-gba̱ra̱ m Mowabu koɓolo n a̱yi. Ɗa Balaku we ecei ni, <<Yiɗa̱i Vuzavaguɗu u dansai?>>
18 Balam u ɗikai kadanshi u tonoi,
<<Ɗa̱nga̱, Balaku, vu panaka mu,
panaka mu maku ma Ziporu.
19 Ka̱shile vuma ɗa ba, a na wa yaꞋan aꞋuwa,
ko maku ma vuma, a na wa sabaꞋa ka̱ɗu ka̱ ni.
U ci yaꞋan ta̱ kadanshi ka̱ta̱ u kpa̱ɗa̱ kushatangu?
Ko u yaꞋan uzuwakpani, ka̱ta̱ u kpa̱ɗa̱ ku kushatangu?
20 Pana, a dana mu ta̱ n zuwa una̱singai,
u vuza na u zuwakai una̱singai, mi ta na a kusabaꞋa ili i na u danai ba.
21 We ene unushi a̱ ubuta̱ u Yakubu ba,
we ene atakaci a̱ ubuta̱ wa aza a Isaraila ba.
Vuzavaguɗu Ka̱shile ke le wi ta̱ koɓolo n ele,
i ta̱ a kudansa n kacaꞋa adama a na a̱yi mogono me le maꞋa.
22 Ka̱shile ka̱ uta̱ka̱ le ta̱ a Masar,
ɗa kpamu wi a̱ kushilika̱ adama e le an kujima.
23 Babu tsuboci tsu na tso kudoro Yakubu,
babu kpamu nkunu n na n kuyaꞋan tsurala n aza a Isaraila,
gogo na uma i ta̱ a kuyaꞋan kadanshi ka aza a Isaraila a dana,
<La̱na̱ ili i na Ka̱shile ka yaꞋin!>
24 Uma a Isaraila i ta̱ an kawu vu gbayin.
A tsu uvuka ba ali a̱ ciya̱ ili i na e remei ɗa unai,
ka̱ta̱ o soꞋo mpasa mi ili i na a unai.>>
25 Balaku u danai Balam, <<Ka̱ta̱ vu yaꞋanka le una̱ ba, ka̱ta̱ kpamu vu yaꞋanka le una̱singai ba.>>
26 Ama ɗa Balam wu ushuki Balaku, <<N dana wu ba, ili na Vuzavaguɗu u danai, I ɗaɗa n kuyaꞋan?>>
27 Ɗa Balaku mogono u danai Balam, <<Ta̱wa̱ gogo na, mi ta̱ a kuɗika wu a kubana a̱ ubuta̱ u yoku. Yoku ta ɗe Ka̱shile ka kupana uyoꞋo ali u zuwa vi yaꞋanka mu ele una̱.>> 28 Balaku u ɗikai Balam a kubana gaɗi vu kusan ku Piyo, ku na ki a kinda keteshe.
29 Ɗa Balam u danai Balaku, <<MaꞋaka mu atalilyuka e cindere na ka̱ta̱ vu tuka̱ obomburon e cindere n a̱giri e cindere.>> 30 Balaku u yaꞋin tsu na Balam u danai, u yaꞋin alyuka n kobomburon n ka̱giri a katalikalyuka dem.