Katagarda ka Ansa
Kuɓa̱yuwa̱
Katagarda ka Ansa, katagarda kaꞋa ka na o ɓolongi kuyotsongusu ku kuyongo ku ma̱riki n ku kutoni. Kuyotsongusu ka ki ta̱ uɗiki n ansa n cicoꞋo tsu mogono Sulemanu. Kuyotsongusu ka ku pece ta̱ cicoꞋo n tsulau, a̱ ida̱shi i ma̱riki n i gbani-gbani, a na a yaꞋin kadanshi ke le n uye kakau. Kadanshi ka̱ a̱bunda̱i ki ta̱ a kadanshi ki ili i na yi a̱ kugita̱sa̱ anana m makpaꞋa. Katagarda ka ka̱ gita̱ ta̱ n kuciɓaka uma, Wovon u Ka̱shile ɗaɗa ugiti u kuyeve. 1:7 Ili i na i ɗikai lo katagarda ka, ka lyaꞋa ta̱ kelime n kuyaꞋan kadanshi ka na ki ida̱shi i kutoni i ɗa koci ba, ama ili i na a kiwanai kene n kuyongo ku ma̱riki. IcuꞋu i kadanshi ka wawaꞋa ka nampa ko yotsongu icuꞋu i kuyeve ku nlum mi Isaraila n cau, tsu na vuza vu cicoꞋo u kuyaꞋan a makyan ma na ili i yoku i ɗa̱nga̱i. Ukuna u nampa wa wi ta̱ a kadanshi ki ida̱shi i kpaꞋa, n i tsulaga. U yoku kpamu wi ta̱ a kadanshi ki ida̱shi a̱ ka̱tsuma̱ ka uma, ko kpamu ida̱shi yu usuɓi. Ukuna wa̱ a̱bunda̱i wi ta̱ a kadanshi, vu goyo ka̱ci ka̱ nu, uka̱ni u ka̱ɗu, n kuɗika aza a unambi n a̱shi a singai n ida̱shi i ma̱riki a̱ ka̱tsa̱ma̱ ka̱ a̱ja̱Ꞌa̱.
Ili i na yi punu u udari a katagarda ka nampa
Kucikpa ku ansa 1:1-9; 18
Ansa Sulemanu 10:1-22; 16
Kadanshi ka ansa kamangankupa, 22:16-24; 34
Ansa kadanshi o yoku a Sulemanu 25:1-29; 27
Kadanshi ka Agur 30:1-31
Kadanshi ko yoku ka ku yotsongusu 31:1-31
1
Ugiti u kuyeve
1 Ansa a Sulemanu kolobo ka Dawuda mogono mi Isaraila.
2 Na ɗa ansa a na a̱ kuɓa̱nka̱ wu,
vu yeve cicoꞋo n odoki a singai,
ka̱ta̱ e yeve kudansa i na yi usokongi
3 adama a na a̱ ciya̱,
kuyotsongusu ku cicoꞋo,
n usuɓi, n afada a mayun,
n ili i na yi mayin,
4 a zuwa vuza vu unambi u kuyeve,
wo okpo n kuyeve,
o yotsongusu a̱ɗa̱nga̱ni tsu na
a kuyaꞋan kusheshe ku singai.
5 YaꞋan vuza vu cicoꞋo u pana ka̱ta̱ u doku ciya̱ kuyeve,
vuza vu uyevi kpamu
u ciya̱ uɓa̱nki
6 adama a na e yeve i na ansa i a kadanshi,
kadanshi ka aza o cicoꞋo n iteꞋe i le.
7 Wovon u Vuzavaguɗu u ɗaɗa ugiti u kuyeve,
ama kalau ka goyo ta̱ cicoꞋo n odoki.
Odoki u ka̱ɗa̱nga̱ni
8 Pana, Maku ma̱va̱, pana kadanshi ke esheku a̱ nu,
kpamu ka̱ta̱ vu ka̱sukpa̱ odoki a̱na̱ku a̱ nu ba,
9 adama a na kuyotsongu ku le
ki ta̱ o ku doku wu tsugbayin,
ka̱ta̱ okpo ili kuɗeku i singai a kuɗeku ku nu.
10 Maku ma̱va̱, ɗa baci aza a unushi a kparasai nu,
ka̱ta̱ vu ushuku ba.
11 Ɗa baci a danai, <<Ta̱wa̱ tsu gbaɓa kaci,
tsu una vuma yoku,
tsu bana tsu bopo tsu una aza a babu unushi,
12 YaꞋan tsu soɗongu le ra̱ka̱-ra̱ka̱ tsu kasaun,
tsa aza a na a̱ gida̱la̱i a kubana e kpenle.
13 ka̱ta̱ ci ciya̱ uciyi n a̱bunda̱i,
ci shatangu iꞋuwa i tsu n ucanuku u gbani,
14 ta̱wa̱ vu gbaɓa ka̱ci n a̱tsu,
ka̱ta̱ tsu pece ili i na tsu bokoi.>>
15 Maku ma̱va̱, ka̱ta̱ vu gbaɓa ka̱ci ka̱ nu n icuꞋu i uma a nanlo ba,
yaꞋan daꞋangi n ele,
16 adama a na i ta̱ m moloko a̱ ubuta̱ u kuyaꞋan ka gbani-gbani,
i ta̱ ufoɓi ayin tutu adama a munuka. 17 Gbani ɗa azuku maza
a̱ a̱shi a manunu ma na a cigai kuka̱na̱.
18 ama icuꞋu i uma a nanlo,
ka̱ci ke le kaꞋa a tsu zuwaka maza.
e ci reme ili ba, wuma u le ɗa koci.
19 Ta ukocishi wu uye
wa aza a̱ kutsa̱n ki ikebe i nannai,
kutsa̱n ka ki ta̱ o ku okpo ma̱giti mu ukpa̱ me le.
Ci coꞋo ci ta̱ e meɗevile.
Kadanshi a ukuna u ku iwan cicoꞋo
20 Panai, cicoꞋo ci ta̱ e meɗevile a uye n kuden, 21 ci ta̱ e meɗevile n utsura a̱ utsutsu i likuci, n ubuta̱ u na uma dem a tsu yaꞋan oɓolo. 22 <<Ali wannai ɗa, a̱ɗa̱ aza a na yi n ugboji ba,
yi ta̱ o kuyongo nannai ko ugboji?
Ali wanai ɗai, a̱ɗa̱ aza o kugoyi,
yi ta̱ a kupana uyoꞋo wu ulami u na yi a kuyaꞋan,
a̱ɗa̱ a lau i iwain kuyeve?
23 Ishi baci i zuwa atsuvu i pana uɓarangi u va̱.
Mi ishi a̱ ku tsuwa̱nka̱ ɗa̱ n ayinviki a̱ va̱,
ka̱ta̱ n zuwa ɗa̱ i yeve kadanshi ka̱ va̱.
24 Adama a na n ɗeke ta̱, ɗa̱ i iwain kupana,
n ɗengusa̱i ekiye a̱ va̱ wa̱ a̱ ɗa̱ ama ko vuza u zuwaka ba,
25 I iwain kutono odoki a̱ va̱ ra̱ka̱,
kpamu i ciga uɓarangi ɗa̱ u va̱ ba. 26 Mi ta̱ o ku zoꞋoso ɗa̱,
a makyan ma atakaci,
mi ta̱ a kuyaꞋanka ɗa̱ ulami,
a makyan ma na ma̱dukpa̱ ma̱ ta̱wa̱i ɗa̱,
27 Ayin a na baci atakaci a̱ ta̱wa̱i ɗa̱
tsu kabatalikpau,
a ayin a na yi o kusoꞋo atakaci n awuya.
28 Ka̱ta̱ i ɗeke mu,
ama mi a̱ ku ushuku ɗa̱ ba.
yi ta̱ a̱ ku la̱nsa̱ mu a̱ ubuta̱ dem,
ama yi a̱ kuciya̱ mu ba.
29 Adama a na i iwan ta̱ kuyeve ugaꞋin u kuyeve ba,
kpamu i zagba i pana wovon u Vuzavaguɗu ba.
30 Yi ushuku n odoki a̱ va̱ ba,
i iwain uɓarangi u va̱.
31 Adama a nannai yi ta̱ a̱ kuciya̱ katsupu ku ulinga u ɗa̱,
yi ta̱ a̱ kucuwa̱ n una̱mgbuka̱tsuma̱ u ɗa̱. 32 Aza a unambi u kuyeve a tsu kuwa̱ ta̱, adama a na a̱ ushuku n cicoꞋo ba,
Alau tamkpamu a̱ tsu kuwa̱ ta̱ adama a na a zuwaka ba.
33 Ama yaba dem vu na baci u panakai mu,
wi ta̱ a̱ kuda̱sa̱ngu m ma̱ta̱na̱.
Ko ili tana yi a̱ kuciya̱ yi ba,
babu kpamu ili i na i kuneke yi wovon.>>