KATAGARDA
ISHIPA
KUƁA̱YUWA̱
Katagarda ki Ishipa, ɗaɗa katagarda ki i ishipa n ka avasa a katagarda ka ciɗa. Uma kakau ɗa a ɗanai a̱ ka̱tsuma̱ ka makyan n a̱bunda̱i. Ishipa i nampa n avasa a, aza a Isaraila o ɓolongu ta̱ i ɗa a̱ ka̱na̱i kuyaꞋan ulinga n i ɗa a̱ ubuta̱ u kucikpa u le. A ukocishi, o ɓolongi i ɗa n atagarda o kutoni.
Ishipa yi uɗani i nampa n ya avasa i ta̱ u pecekushi. Ishipa i kucikpa Ka̱shile yi ta̱ lo, n yi una̱singai u Ka̱shile. Avasa a̱ kula̱nsa̱ uɓa̱nki i ta̱ lo, n a̱ kula̱nsa̱ ukeɗi n wishi. Avasa a̱ kula̱nsa̱ kucinukpa ku unushi, n a̱ kula̱nsa̱ a takacika irala. Avasa a̱ kula̱nsa̱ ugboji wi ida̱shi i ta̱ lo. Avasa a nwalu a kubana a̱ ubuta̱ u kucikpa i ta̱ lo n a kuzuwa ku mogono.
Avasa a nampa ra̱ka̱ adama a vuma te n uma ra̱ka̱ ɗa. Aza o yoku a kudana tsu na vuma wi a kupana a̱ ka̱ɗu ka̱ ni, aza o yoku tankpamu a kudana ili i na uma a̱ Ka̱shile i a kuciga n tsu na uma i a kupana.
Yesu u yaꞋan ta̱ ulinga n ishipa. Aza a na a ɗanai uzuwakpani u savu a yaꞋan ta̱ ulinga n i ɗa, kpamu a yaꞋan ta̱ ulinga n i ɗa a iɗanishi i le. Ili i na i ɗikai a makyan ma na a̱ ciya̱i aza o kutoni, ɗa katagarda ka ishipa ko okpoi katagarda ka tsugbayin n ka kucikpa.
Ili i na yi punu
Ishipa amangatawun n amangerenkupa i ɗa, ɗa kpamu e peciki katagarda ka ugboku u tawun, tsu na i ugeri ɗanna.
Ishipa 1-41
Ishipa 42-72
Ishipa 73-89
Ishipa 90-106
Ishipa (107-150)
Katagarda ka iyain
1
(Ishp 1--41)
Ma̱za̱nga̱ ma mayun
1 Vuza vu ma̱za̱nga̱ ɗa,
vuza na u tsu tono odoki a uma a gbani-gbani ba,
ko u tono uye wa aza a unushi ba,
ko u gbaɓa kaci n aza ulami ba.
2 Ama wi ta̱ a kupana uyoꞋo u tono wila̱ u Vuzavaguɗu,
wi ta̱ e kusheshe ku wila̱ wa a̱ ka̱ɗu ka̱ ni kanna n kayin.
3 Wi ta̱ tsu maɗanga,
ma na a̱ shikpa̱i a̱ iga̱Ꞌin i mini,
ma na ma tsu matsa a makyan ma̱ ni,
kpamu a̱vuku a̱ ni e ci ɗekpe ba,
u tsu ciya̱ ta̱ ulyaꞋi a ili i na u yaꞋin dem.
4 Ama uma a gbani-gbani i nannai ba,
I ta̱ tsu kopo ka na wunla̱i u tsu pura̱ngu.
5 Ka̱shile ta na ki ta̱ a kutakacika uma a gbani-gbani,
aza a unushi tamkpamu u pece le n uma a singai.
6 Adama a na Vuzavaguɗu wi ta̱ a̱ kula̱na̱ ukuna u uma a usuɓi,
Ama ulinga u uma a gbani-gbani wi ta̱ a kubanka le a̱ ukpisa̱.