17
Ma̱shi ma vuza vu babu unushi
Avasa a Dawuda.
1 Vuzavaguɗu pana ufolu u va̱ a̱ kula̱nsa̱ kamayun,
pana ma̱shi ma̱ va̱, ma̱ kula̱nsa̱ uɓa̱nki.
Zuwa atsuvu vu pana avasa a̱ va̱,
adama a na mpa vuza va aꞋuwa ɗa ba.
2 YaꞋan afada a na va kuyaꞋan o yotsongu mi ta̱ n usuɓi,
adama a na vi yeve ta̱ ili i na yi derere.
3 Vu la̱na̱ baci ka̱ɗu ka̱ va̱,
ɗa vu ta̱wa̱i wa̱ a̱ va̱ n kayin,
vu kondo mu ba ci,
vi a kuciya̱ ili i gbani-gbani wa̱ a̱ va̱ ba,
n sheshe ta̱ a̱ ka̱ɗu ka̱ va̱ una̱ uva̱ wi a ku nusaka wu ba.
4 Tsu na uma o yoku a ci yaꞋan,
mpa n tono ta̱ kadanshi ka̱ nu,
n tono uye u uma a kavama ba.
5 Ene a̱ va̱ i ta̱ o kutono uye u nu makyan dem,
n saꞋwa kukatsukpa ba.
6 N yaꞋan ta̱ avasa wa̱ a̱ nu Ka̱shile,
adama a na avu vu tsu ushuku mu ta̱,
zuwa atsuvu vu pana avasa a̱ va̱.
7 Yotsongu ucigi u mereve u nu,
ucigi u nu u na u tsu sabaꞋa ba,
avu ɗa vu tsu isa aza a na i a̱ kula̱nsa̱ ubuta̱ u kusheɗeku,
aza a na i a̱ kula̱nsa̱ ubuta̱ u kusheɗeku e kukiye ku usingai ku nu,
a̱ ubuta̱ wi irala i le.
8 Ere mu tsu maku ma̱ ka̱shi,
sokongu mu a ɗaka ve evelyu a̱ nu,
9 wa aza a gbani-gbani a na a cigai ku una mu,
n irala i va̱ aza a na i uka̱ra̱Ꞌi nu mpa.
10 I na asuvayali a̱ɗu e le ba,
una̱ u le sai kadanshi ka̱ a̱ra̱ɗi.
11 Gogo na i ta̱ uka̱ra̱Ꞌi nu mpa a̱ ubuta̱ u na n vadalukpai dem,
a̱ kula̱nsa̱ ka̱ba̱nga̱ adama a na o polo mu a iɗika.
12 Ana ikawu a̱ kula̱nsa̱ mu adama a na a sazasa,
a na ikawu yi utsura,
a kuvana a̱ ubuta̱ u na i ubopi.
13 Ta̱wa̱, Vuzavaguɗu vu yaꞋan kuvon n irala i va̱, vu lyaꞋa le,
vu isa mu n kotokobi ka̱ nu wa aza a gbani-gbani. 14 Vuzavaguɗu, isa mu n kukiye ku nu a icuꞋu i uma a nanlo,
isa mu a̱ ubuta̱ u uma aduniyan a nampa,
a na i n ili i na a cigai dem,
takacika le n ili i na vu zuwakai le,
ya muku n le feu n takacika,
ali a kubana a n tsukaya n le.
15 Mi ta̱ e kene wu, adama a na mpa vuza vu usuɓi ɗa,
ɗa baci n jimgbai dem n ci yaꞋan ta̱ ma̱za̱nga̱ adama a na vi ta̱ koɓolo nu mpa.