30
Ishipa i kucikpa adama a kupotsokpo
Vishipa vu Dawuda.
1 Vuzavaguɗu, mi ta̱ a kucikpa wu,
adama a na vu wawa mu ta̱,
ɗa vu sa̱nka̱i irala i va̱ i lyaꞋa mu.
2 N folono ta̱ uɓa̱nki wa̱ nu,
Vuzavaguɗu Ka̱shile ka̱ va̱,
ɗa tana vu potsokpoi mu.
3 Vuzavaguɗu, vu isa mu ta̱ a̱ ubuta̱ wu ukpisa̱,
adama a na n ka̱na̱ ta̱ ɗe uye a̱ kugida̱la̱ e kpenle,
ama ɗa vu isai mu.
4 Cananai ishipa i kucikpa Vuzavaguɗu,
a̱ɗa̱ uma a̱ ma̱riki.
Ciɓai, n ili i na vuza ciɗa u yaꞋin,
i cikpa yi.
5 Wupa u ni u tsu geshe ba,
ama kasingai ka̱ ni ki ta̱ lo ko wannai,
a̱ kushika̱ ta̱ n kayin,
ama ka̱ta̱ ma̱za̱nga̱ ma̱ ta̱wa̱ n usana.
6 Mpa n ka̱ɗu a̱ ida̱shi, ɗa n danai,
<<Ko vuza u kulyaꞋa kelime ka̱ va̱ ba.>>
7 Vuzavaguɗu, adama a kasingai ka̱ nu,
u ɗa vu shikpa̱i mu tsu katali ka gbayin ku utsura.
Ama ayin a na baci vu sokongu ki mu a̱shi a̱ nu,
ka̱ta̱ wovon u ka̱na̱ mu ka̱u.
8 N ɗeke wu ta̱, Vuzavaguɗu,
n folono ta̱ uɓa̱nki u nu.
9 <<Yiɗa̱i a̱ kuciya̱ n kuwa̱ baci?
Kodokpotsu ke ne ka i a̱ kuciya̱,
ɗa baci n gida̱la̱i a kubana a kasaun?
A̱kpisa̱ i ta̱ a kufuɗa kucikpa wu?
I ta̱ a kusala usuɓi u nu?
10 Vuzavaguɗu, panaka mu,
pana asuvayali a̱ va̱,
Ɓa̱nka̱ mu, Vuzavaguɗu.>>
11 Vu bonokoi una̱mgbuka̱tsuma̱ u va̱,
wo okpoi kujeꞋe ku ma̱za̱nga̱,
vu foɗoi mu akashi a kpalu,
vu ukai mu a̱ ma̱za̱nga̱.
12 Adama a nannai, mi a kupaɗa bini ba,
mi ta̱ a kucikpa wu n ishipa.
Vuzavaguɗu, avu ɗa Ka̱shile ka̱va̱,
mi ta̱ a kucikpa wu ko wannai.