Katagarda ke ire
42
(Ishp 42--72)
Ma̱shi ma aza a na i a ugbashi
Kadanshi a kubana u vuza vu kelime vi ishipa: VicuꞋu vu tsuwaꞋi tsu muku n Kora,
1 Tsu na mereꞋe mi a mali ma̱ mini mo kuɗolu,
ta feu wuma u va̱ wi a mali ma̱ nu nannai, Ka̱shile.
2 Mi ta̱ a kakuli ka̱ nu,
Ka̱shile, Ka̱shile ka wuma.
Wannai ɗai n kubana e kelime ka̱ nu n cikpa wu?
3 Kanna n kayin dem mi ta̱ a̱ ma̱shi,
kujilya ku ɗa koci ili kulyaꞋa i va̱,
makyan dem irala i va̱ e ku ece mu,
<<Te ɗai Ka̱shile ka̱ nu ka?>>
4 Ka̱ɗu ka̱ va̱ ka̱ tsu na̱mgba̱ ta̱,
n ciɓa baci n ili i na i lazai ɗe,
a makyan ma na n tsu bana koɓolo n uma A̱Ꞌisa̱ a gbayin,
mi o kutono n e le ugeri.
koɓolo ka uma aza a̱ ma̱za̱nga̱, a ku canana i ishipa,
a̱ kuɗa̱ngusa̱ a̱la̱ka̱tsu a kucikpa Ka̱shile.
5 Yiɗa̱i i zuwai mi una̱mgbi ka̱tsuma̱ tsu nampa?
Yiɗa̱i i zuwai mi a atakaci nannai?
Mi ta̱ a kuzuwa ka̱ɗu ka̱ va̱ u Ka̱shile,
mi ta̱ o kudoku kucikpa yi,
kishi ka̱ va̱ n Ka̱shile ka̱ va̱.
6 N na̱mgba̱ ta̱ ka̱tsuma̱ ka̱u,
adama nannai mi ta̱ a kuciɓa n kasingai ka̱ nu,
a uɓon u Urdu, n kusan kugbayi Hamon,
n kusan ku Miza.
7 Atakaci a̱ va̱ i ta̱ tsu mini ma̱ uga̱vi,
mini ma o kuɓolongu adama a na ma̱ pura̱ mu,
aɓau ra̱ka̱,
a kulyaꞋa utsura u va̱.
8 Vuzavaguɗu u yotsongu ta̱ ucigi u ni u na u tsu sabaꞋa ba kanna lakam,
mpa feu n canana ishipa i kucikpa yi kayin dem,
n yaꞋan avasa u Ka̱shile, vuza na u nekei mu wuma.
9 N danai Ka̱shile, ubuta̱ u kusheɗeku u va̱,
<<Yiɗa̱i i zuwai vu cinukpai nu mpa?
Yiɗa̱i i zuwai n kulyaꞋa kelime n una̱mgbuka̱tsuma̱?
Adama ka gbani-gbani ka irala i va̱?>>
10 Kadanshi ki irala i va̱, ka sapa mu tsu kotokobi a etele a̱ va̱,
a makyan ma na i a kudana mu,
<<Teɗei Ka̱shile ka̱ nu ka?>>
11 Yiɗa̱i i zuwai mi una̱mgbi ka̱tsuma̱ tsu nampa?
Yiɗa̱i i zuwai mi a atakaci nannai?
Mi ta̱ a kuzuwa ka̱ɗu ka̱ va̱ u Ka̱shile,
mi ta̱ o kudoku kucikpa yi,
kishi ka̱ va̱ n Ka̱shile ka̱ va̱.