69
Wawa mu Ka̱shile
Kadanshi a kubana u vuza vu kelime vi ishipa: Tsu ka̱la̱ka̱tsu ka̱ <<A̱pa̱lu.>>Vishipa vu Dawuda.
1 Ka̱shile wawa mu,
adama a na mini ma yawa mu ta̱ e kuɗeku.
2 Mi ta̱ a kuliɓa a̱ ubuta̱ o kolyoꞋo ka̱u,
babu ubuta̱ u kudasa,
n yikpa̱ ta̱ a̱ mini mu uga̱vi,
aɓau kpamu i ta̱ a̱ ku kimba̱ mu.
3 Mo oꞋwo ta̱ m meɗevile, a̱ kula̱nsa̱ uɓa̱nki,
ali ka̱la̱ka̱tsu ka̱ va̱ ka paɗai.
A̱shi a̱ va̱ ra̱ka̱ a̱ ga̱la̱i,
adama a na n zuwa ta̱ a̱shi a̱ kula̱nsa̱ Ka̱shile ka̱ va̱.
4 Aza a na a iwain mu ko ili,
a laꞋa ta̱ ka̱nji ka kaci ka̱ va̱ a̱bunda̱i.
Aza a na a cigai ku una mu ko ili i ta̱ n utsura,
a gutsakai mu n tsupa ili i na m bokoi ba.
5 Ka̱shile, vu yeve ta̱ tsulau tsu va̱,
unushi u va̱ wi usokongi wa̱ a̱ nu ba.
6 Ka̱ta̱ vu ka̱sukpa̱ mu n neke
aza a na a zuwai ka̱ɗu wa̱ nu a pana wono ba,
Vuzaguɗu, Ka̱shile MalaꞋimili,
ka̱ta̱ vu ka̱sukpa̱ mu n tuka̱ n ili wono
wa aza a na i a̱ kula̱nsa̱ Ka̱shile ki Isaraila ba.
7 Adama a̱ nu a ɗa mo okpoi ili yi ishikushi,
ali wono u kimba̱i mu.
8 Tsu komoci kaꞋa mi wa̱ aza a̱ va̱,
ali n aza a kpaꞋa a̱ va̱ dem mo okpoi o limoci we le.
9 Mali ma A̱Ꞌisa̱ a gbayin a̱ nu,
ma zuwa mu ta̱ a̱ ku kula̱ tsa akina
ishikushi i na i a kuyaꞋanka wu yi okpo ta̱ a kaci ka̱ va̱.
10 Ana shika̱i n yaꞋin kakuli,
ɗa wo okpoi mu ili yi ishikushi.
11 N ukai akashi a kpalu,
ɗa mo okpoi ili ya agivi.
12 Mo okpoi ili i kadanshi a uye dem,
osoꞋi kpamu a kuyaꞋanka mu ishipa.
13 Ama mpa mi ta̱ a kuvasa wa̱ a̱ nu, Vuzavaguɗu,
ushuku mu Ka̱shile, a makyan ma na wu untsai nu,
adama ucigi u gbayin u nu u na u tsu sabaꞋa ba,
adama a na vi ta̱ a kushatangu ukuna u wishi wu usuɓi u nu.
14 Wawa mu o kolyoꞋo adama a na ka̱ta̱ n liɓa ba,
wawa mu ekiye aza a na a iwain mu,
a̱ mini mu uga̱vi ma nampa kpamu.
15 Ka̱ta̱ vu ka̱sukpa̱ aɓau a̱ kimba̱ mu ba,
ka̱ta̱ vu ka̱sukpa̱ mini mu uga̱vi ma lyaꞋa mu ba,
ka̱ta̱ vu ka̱sukpa̱ kpenle ku ukpa̱ ku tsugba mu ba.
16 Vuzavaguɗu, adama a ucigi u singai u nu u na u tsu sabaꞋa ba,
ushuku mu,
adama asuvayali a̱bunda̱i a̱ nu, panaka mu.
17 Ka̱ta̱ vu sokongu ka̱ci ka̱ nu u kagbashi ka̱ nu ba,
mi ta̱ o kusoꞋo atakaci,
yaꞋan gogoꞋo vu ushuku mu.
18 Ta̱wa̱ ɗevu vu shiba̱ mu,
adama a irala i va̱.
19 Vu yeve ta̱ tsu na i a kushika mu,
n tsu na i a ku lukanasa mu, n tsu na o goyoi mu,
vu yeve ta̱ aza a na i a kutakaci mu ra̱ka̱.
20 Ka̱ɗu ka̱ va̱ ka̱ gusa̱ ta̱ adama a ishikushi i na i a kuyaꞋanka mu,
ali n takpai asuvu.
N zuwa ta̱ ka̱ɗu i ta̱ a̱ kusa̱Ꞌa̱ mu,
ama ko vuza.
N zuwai ka̱ɗu ko mi ta̱ a̱ kuciya̱ vuza na u kuneke mu kadanshi,
ama n ciya̱ ba.
21 Makyan ma na m panai kambulu,
ɗa e nekei mu yaza,
ana kakuli ka̱ ka̱na̱i mu,
ɗa e nekei mu mini ma kalam.
22 Ka̱shile, yaꞋan ka̱ɗiva̱ ke le ko okpo le yakuru,
yaꞋan ida̱shi i ma̱ta̱na̱ i le yo okpo le maza.*69:22 Ubuta̱ wa wi ta̱ a kadanshi ugboku u re, aza a yoku e yevei ta̱, yaꞋan ka̱ɗiva̱ ke le ko okpo maza wa̱ a̱ja̱Ꞌa̱ e le, aza a yoku tankpamu e yevei ta̱, yaꞋan ida̱shi i ma̱ta̱na̱ i le yo okpo le maza.
23 Zuwa a̱shi ele a yaꞋan rumbu-rumbu
ali a̱ kukpa̱ɗa̱ ku ene,
ka̱ta̱ vu zuwa a̱cina̱ e le o kogo ko wannai.
24 Tsuwa̱nka̱ le wupa u nu,
yaꞋan asuvu a usuɗukpi a̱ nu a lyaꞋa utsura u le.
25 Ka̱shile, yaꞋan ka̱tsura̱ ke le ko okpo lekeɗi,
ka̱ta̱ vuza u da̱sa̱ngu punu a̱pa̱m e le ba.
26 Adama a na a takacika ta̱ aza a na vu yaꞋankai usa̱n,
i a kadanshi ka̱ mɓa̱la̱ ma aza a na vu lapai.
27 Doku le unushi a̱ ka̱tsuma̱ ka̱ unushi u le,
ka̱ta̱ vu ka̱sukpa̱ le a̱ ciya̱ upecu wu ili yi usuɓi i nu ba,
28 Zuwa a takpa kula ku le a katagarda ka wuma,
ka̱ta̱ vu kece le a̱ ka̱tsuma̱ ka uma a usuɓi ba.
29 Ama mi ta̱ a̱ ka̱tsuma̱ ka atakaci nu mɓa̱la̱,
Ka̱shile, yaꞋan wishi u nu wu ere mu.
30 Mi ta̱ a kucikpa kula ku Ka̱shile n ishipa,
mi ta̱ a kusala tsugbayin ci ni a̱ ubuta̱ u kucikpa yi.
31 Nannai va wi ta̱ a kuzuwa Vuzavaguɗu u pana uyoꞋo,
u laꞋa alyuka e medendem,
u laꞋa kuneꞋe ku kobomburon.
32 Ayin a na baci aza a na o goyoi ka̱ci ke le enei nannai,
i ta̱ a kuyaꞋan ma̱za̱nga̱.
Aza a na i a̱ kula̱nsa̱ Ka̱shile,
i ta̱ a̱ kuciya̱ utsura u ka̱ɗu.
33 Vuzavaguɗu u panaka ta̱ aza a unambi,
u tsu goyo uma a̱ ni a na i a ugbashi ba.
34 Cikpai Ka̱shile, gaɗi n iɗika, cikpai ni,
mala n ili i wuma i na yi punu dem.
35 Adama a na Ka̱shile ki ta̱ a ku wawa Sihiyona,
u maꞋasaka likuci ya aza a Yahuda,
uma a̱ ni i ta̱ a̱ kuda̱sa̱ngu ɗe a lyaꞋa uka̱ni wi iɗika ya.
36 Ntsukaya ma agbashi a̱ ni i ta̱ a kulyaꞋa uka̱ni wi i ɗa,
aza a na i a kuciga yi i ta̱ a̱ kuyongo ɗe.
*69:22 69:22 Ubuta̱ wa wi ta̱ a kadanshi ugboku u re, aza a yoku e yevei ta̱, yaꞋan ka̱ɗiva̱ ke le ko okpo maza wa̱ a̱ja̱Ꞌa̱ e le, aza a yoku tankpamu e yevei ta̱, yaꞋan ida̱shi i ma̱ta̱na̱ i le yo okpo le maza.