104
Vishipa vu ucikpi u Ka̱shile MalaꞋimili
1 Cikpa Vuzavagɗu ka̱ɗu ka̱ va̱.
Avu Vuzavaguɗu Ka̱shile ka̱ va̱,
avu vuzagbayin ɗa ka̱u,
vu kala ta̱ ka̱ci ka̱ nu n
ugaꞋin n tsugbayin.
2 Vu pala ta̱ ka̱ci ka̱ nu n kutashi tsu motogu,
ɗa vu kpa̱Ꞌi gaɗi tsu ma̱va̱li.
3 Vu maꞋin ubuta̱ wi ida̱shi i nu
a gaɗi vu mini ma gaɗi,
ɗa vu bonokoi eleshu ekeke odoku a̱ nu,
ɗa vu walai a gaɗi ve evelyu a̱ wunla̱i.
4 Vu bonokoi wunla̱i maku mu usuki ma̱ nu,
melentsu ma akina kpamu vuza va̱ a̱ga̱nda̱ a̱ nu.
5 Vu shikpa̱i aduniyan a̱ kumiꞋi ku ni,
kpamu i kumuɗa̱ ba ko wannai.
6 Ɗa vu zuwai mala ma palai aduniyan tsa aminya,
mini kpamu ma palai nsasan.
7 Ama a na vu ɓarangi mini ɗa ma sumai,
a na ma panai ulapi u kakpanga ka̱ nu ɗa ma sumai,
8 ɗa me yenei a gaɗi vu nsasan,
ma̱ gida̱la̱i a kubana a̱ a̱ra̱Ꞌa̱,
a̱ ubuta̱ u na vu zuwakai le.
9 Vu zuwakai le kureꞋe ku na a kupasa ba,
adama a na ka̱ta̱ o doku a pala iɗika kpamu ba.
10 Vu zuwai mini me yenei a̱ nka̱riki,
ɗa me yenei e mere ma nsansa,
11 e kuneke nnama n kakamba ra̱ka̱ mini,
a̱ ubuta̱ u na mkparagi n tsu soꞋo mini ma takpaka le kakuli.
12 A̱ ka̱kina̱ ka̱ mini ka, ta ɗe nnu n kakamba n tsu da̱sa̱ngu.
e mere ma a nsaɓu a nɗanga a taɗe a ci yaꞋan ishipa i le.
13 Ɗe gaɗi a̱ ubuta̱ wi ida̱shi u nu,
ɗa vu tsu neke nsasan mini,
ka̱ta̱ iɗika i shana n kasingai ku ulinga u nu.
14 Vu zuwai mita̱ mo gbonguro adama a ilikuzuwa,
ica̱Ꞌa̱shi kpamu adama a na vuma,
u ciya̱ ilikulya a iɗika,
15 ma̱kya̱n kpamu adama a na
u zuwa ka̱ɗu ka vuma ma̱za̱nga̱,
m maniꞋin adama a na a̱shi a̱ ni a gaꞋan,
n ilikulya adama a na vuma u ciya̱ utsura wi ikyamba.
16 Nɗanga n na Vuzavaguɗu
u ca̱Ꞌi n ciya̱ ta̱ mini mayin,
tsu nɗanga n sida n Lebano,
17 a gaɗi vu le, taɗe nnunu n ci yaꞋan cikinda ci le,
ta ɗe feu mapapadan u ci yaꞋan ta̱ kpaꞋa ku ni.
18 Nsasan m gbagbaꞋin mi igeve n ɗa,
aɓatsu kpamu ubuta̱ u kusheɗeku n rema n ɗa.
19 Vu yaꞋin wotoi adama a na vu yotsongu ayin,
kanna kpamu ke yeve ta̱ makyan ma na ki a̱ kuyikpa̱.
20 Vu yaꞋin kayin n ka̱yimbi,
a makyan ma nanlo maꞋa
nnama n kakamba ra̱ka̱ n tsu uta̱.
21 Ikawu i tsu ura̱ ta̱ a makyan ma na i a kutambu,
a̱ kula̱nsa̱ i na a kulyaꞋa u Ka̱shile,
22 kanna ku uta̱ baci,
ka̱ta̱ o bono a vaku a enle e le,
23 vuma tankpamu wu uta̱ ulinga,
ali a kubana kulivi.
24 Vuzavaguɗu la̱na̱
ka̱bunda̱i ku ulinga u nu,
a̱ ka̱tsuma̱ ka kuyeve
ɗa vu yaꞋin ili i nampa ra̱ka̱,
aduniyan a shana ta̱ tukpa ni i na vu yaꞋin.
25 Mala mi ta̱ n wanshi nu mgbayin,
tukpa n imacishi i na i laꞋi ku kece,
ili i wuma, i gbagbaꞋin ni i kenkeꞋen dem.
26 Antsu a̱ mini i ta̱ lo,
a kubana n o bonoi,
oroꞋo a na vi yaꞋin,
adama a na o yongo a̱ mini.
27 Ra̱ka̱ vu le avu ɗa i a kinda
adama a na vu neke le ilikulya
a makyan ma na a cikalai.
28 Vi neke le baci i na a cikalai
ka̱ta̱ o ɓolongu i ɗa,
vu neke le baci ili i na yi e kukiye ku nu,
ka̱ta̱ a lyaꞋa a̱ cuwa̱ mayin.
29 Ɗa baci vu sokongi a̱shi a̱ nu,
ka̱ta̱ a pana wovon,
vu ɗika baci ayinviki e le ka̱ta̱ a̱ kuwa̱.
o bono a̱ kubuta̱ ubuta̱ u na uta̱i.
30 Ɗa baci vu suꞋuki n ayinviki a̱ nu,
ka̱ta̱ a matsa le,
kpamu vu tsu sabaꞋa ta̱ a̱shi aduniyan.
31 YaꞋan tsugbayin tsu Vuzavaguɗu,
ci yongo ko wannai.
yaꞋan Vuzavaguɗu u yaꞋan ma̱za̱nga̱ n ulinga u ni.
32 A̱yi na wi inda baci aduniyan,
ka̱ta̱ a̱ gba̱ɗa̱,
ɗa baci u saꞋwai nsasan m gbagbaꞋin,
ka̱ta̱ n ɗa mu utuka̱ n ka̱nga̱.
33 Mi ta̱ a kuyaꞋan vishipa u Vuzavaguɗu
a wuma u va̱ dem,
mi ta̱ a kuyaꞋan vishipa vu kucikpa u Ka̱shile ka̱ va̱
a ayin a wuma u va̱ dem.
34 YaꞋan kusheshe ku va̱ ku zuwa yi ma̱za̱nga̱,
ka̱ta̱ mpa tamkpamu
n yaꞋan ma̱za̱nga̱ u Vuzavaguɗu.
35 Ama yaꞋan aza a unushi a̱ puwa̱nka̱ punu a aduniyan
ka̱ta̱ odoku ene aza a gbani-gbani ba.
Cikpa Vuzavaguɗu, avu ka̱ɗu ka̱ va̱,
Cikpa Vuzavaguɗu.