107
KATAGARDA KA TAWUN
(Ishp 107--150)
Ishipa i kucikpa u Ka̱shila̱
Ishipa i kucikpa adama a kasingai
1 Cikpai Vuzavaguɗu,
adama a na a̱yi vuza kasingai ɗa,
ucigi u ni u na u tsu sabaꞋa ba
ko wannai ɗa.
2 YaꞋan aza a na Vuzavaguɗu u shiba̱i
a dansa ukuna u nampa,
aza a na u shiba̱i e ekiye a irala,
3 n aza a na u ɓolongi a iɗika kakau,
a kasana n ka̱livi,
a uɓon u gaɗi n uɓon u ɗakai.
4 Aza a Israila a̱ ka̱ra̱sa̱ ta̱ e meremune,
a̱ ciya̱ uye a kubana a̱ likuci i na a̱ kuda̱sa̱ngu ba.
5 Kambulu ka̱ ka̱na̱i le n kakuli,
ɗa a takpai asuvu.
6 Ɗa a bankai m ma̱shi me le u Vuzavaguɗu,
a̱ ka̱tsuma̱ ka atakaci e le,
ɗa tana u wawai le, a kadama ke le.
7 U tonoi n ele n uye u na wu untsukai,
a kubana a̱ likuci i na a̱ kuda̱sa̱ngu.
8 YaꞋan a cikpa Vuzavaguɗu
a dama a ucigi u ni u na u tsu sabaꞋa ba,
n adama a ulinga wi ili i mereve i ni
a̱ ubuta̱ u uma,
9 adama a na u tsu neke ta̱
aza a kakuli mini,
u tsu cuwa̱ta̱ngu ta̱
aza a kambulu n ilikulya i singai.
10 Aza a Israila a̱ da̱sa̱ngi a̱ ka̱yimbi,
n ka̱yimbi ka kpaɓam,
aza a ugbashi atakaci n ikani,
11 adama a na a yaꞋanka ta̱
kadanshi ka̱ Ka̱shile ugbamiwasuvu
o ogoyoi odoki a MalaꞋimili.
12 Ɗa u zuwai le ulinga wa atakaci ka̱u,
a̱ ka̱na̱i kuta̱ɗa̱tsa̱sa̱,
kpamu ko ka̱ɓa̱nki.
13 Ɗa a bankai m ma̱shi me le u Vuzavaguɗu,
a̱ ka̱tsuma̱ ka atakaci e le,
ɗa tana u wawai le, a kadama ke le.
14 Wu uta̱ka̱i le a̱ ka̱tsuma̱ ka̱ ka̱yimbi,
n ka̱yimbi ka kpaɓam,
ɗa u taɓai ikani i le.
15 YaꞋan a cikpa Vuzavaguɗu
adama a ucigi u ni u na u tsu sabaꞋa ba,
n adama a ulinga wi ili i mereve i ni,
a̱ ubuta̱ u uma.
16 Adama a na u fa̱da̱ ta̱,
ukungulu wi iyum i shili
ɗa u kiɗai agbaguratsu a̱ iyum.
17 Aza a Isaraila okpoi alau
a uye u gbani-gbani u le,
a takacikai adama unushi u le.
18 Ili i kulyaꞋa dem
i luwa le ba,
ali ɗa a yawai ɗevu n kukuwa̱.
19 Ɗa a bankai m ma̱shi me le u Vuzavaguɗu,
a̱ ka̱tsuma̱ ka atakaci e le,
ɗa tana u wawai le, a kadama ke le.
20 U nekei kadanshi, ɗa ko potsokpoi le,
u wawai le a̱ ubuta̱ wa a asaun.
21 YaꞋan a cikpa Vuzavaguɗu
adama a ucigi u ni u na u tsu sabaꞋa ba,
n adama a ulinga wi ili i mereve i ni
a̱ ubuta̱ u uma.
22 YaꞋan a̱ tuka̱ n kuneꞋe ku ucikpi,
ka̱ta̱ kpamu a sala ulinga u ni
a̱ ka̱tsuma̱ ki ishipa i ma̱za̱nga̱.
23 Aza o yoku a wala ta̱ a mala n antsu,
ele aza a tsulaga a ɗa a̱ mini ma gbagbaꞋin.
24 Ene ta̱ ulinga u Vuzavaguɗu,
n ulinga u mereve u ni a mala ma uga̱vi.
25 Ana u nekei kadanshi
ɗa wunla̱i wu utsura u ɗa̱nga̱i
ali u zuwai aɓau a̱ mini,
26 a̱ ɗa̱nga̱i a kubana gaɗi,
ɗa o bonoi punu a̱ mini ma̱ uga̱vi,
a̱ ka̱tsuma̱ ka atakaci e le
ɗa antiki a antsu a,
a panai wovon.
27 A̱ ka̱na̱i katangalasa n a̱ ta̱ɗa̱tsa̱i,
adanshi ma̱ra̱ ma maka le ta̱.
kuyeve ku le ra̱ka̱,
ko okpoi ukuna u gbani.
28 Ɗa a bankai m ma̱shi me le u Vuzavaguɗu,
a̱ ka̱tsuma̱ ka atakaci e le,
ɗa tana wu uta̱ka̱i le, a kadama ke le.
29 U vaꞋankai n wunla̱i wu utsura wa,
ɗa aɓau a̱ mini a kpamu a shamgbai bini.
30 Ɗa a yaꞋin ma̱za̱nga̱ a na ubuta̱ u shira̱i,
ɗa u tonoi n ele a kubana
a̱ ubuta̱ u na antsu a ci shamgba.
31 YaꞋan a cikpa Vuzavaguɗu
adama a ucigi u ni u na u tsu sabaꞋa ba,
n adama a ulinga wi ili i mereve i ni
a̱ ubuta̱ u uma.
32 YaꞋan e neke yi tsugbayin o koɓolo ka uma,
ka̱ta̱ kpamu a cikpa yi
a̱ ka̱tsuma̱ ko koɓolo
ko nkoshi m gba̱ra̱-gba̱ra̱.
33 U bonokoi nyeneke kakamba,
a̱shi a̱ mini tankpamu kayala ke ɗekpu,
34 iɗika i singai yo okpoi yi mkpaɗi
adama a ka gbani-gbani ka uma a iɗika ya.
35 U bonokoi kakamba ko okpoi nyeneke m mini,
iɗika i ɗekpu kpamu a̱shi a̱ mini.
36 Ta ɗe u bankai aza a kambulu o yongo,
ɗa a maꞋin likuci i na a̱ ku da̱sa̱ngu ɗe.
37 A yaꞋin vica̱Ꞌa̱ ashina, ɗa a̱ shikpa̱i nɗanga mi itacishi,
ɗa a̱ ciya̱i ili n a̱bunda̱i.
38 U zuwakai le una̱singai,
ɗa ka̱bunda̱i ke le ko doki.
u ka̱sukpa̱ ushiga wi ili kuzuwa i le i jebe ba.
39 Ana ka̱bunda̱i ke le ke jebei,
ɗa okpoi ili i kugoyi.
A̱ ubuta̱ u modoruko,
ma̱dukpa̱ n una̱mgbuka̱tsuma̱,
40 a̱yi na u tsu goyo aza a gbagbain,
u zuwai le a̱ ka̱na̱i ka̱ ka̱ra̱sa̱
a kakamba ka na ki n uye ba.
41 Ama wu uta̱ka̱ ta̱ n aza a yali
a̱ ka̱tsuma̱ ka a atakaci e le,
kpamu u zuwai muku n le n yimkpai
tsu ushiga wi ilikuzuwa.
42 Aza a̱ ka̱ɗu ka mayun,
enei ɗa a yaꞋin ma̱za̱nga̱,
ama aza a gbani-gbani ra̱ka̱
i ta̱ a ku paɗa bini.
43 Vuza na baci wi n ugboji dem,
u pana ukuna u nampa,
ka̱ta̱ kpamu u coꞋoko
n ucigi u gbayin u Vuzavaguɗu.