115
Ishipa u Ka̱shile ka mayun
1 Vuzavaguɗu, wa̱ a̱ tsu u ɗa ba,
wa̱ a̱ tsu u ɗa ba,
ama a kula ku nu ku ɗa e ku neke tsugbayin,
adama a ucigi u nu u na u tsu sabaꞋa ba n usuɓi u nu.
2 Yiɗa̱i i zuwai ɗa uduniyan wi a kudansa,
<<Te ɗai Ka̱shile ka̱ ɗa̱ ki?>>
3 Ka̱shile ka̱ tsu ki ta̱ ɗe gaɗi,
A kuyaꞋan ili i na u cikalai.
4 A yaꞋan ta̱ a̱ma̱li e le n azurufa n azanariya,
ulinga we ekiye u uma u ɗa.
5 I ta̱ nu una̱, ama a tsu dansa ba,
i ta̱ n a̱shi, ama e ci ene ba.
6 I ta̱ n atsuvu, ama tsu pana ba,
i ta̱ n yunu, ama a tsu tsumgba ili ba.
7 I ta̱ n ekiye, ama a̱ tsu ka̱na̱ ili ba,
i ta̱ n ene, ama a tsu wala ba.
ogboroli e le a tsu uta̱ka̱ a̱la̱ka̱tsu ba.
8 Aza a na a yaꞋin le va i ta̱ o ko okpo ci le,
ta feu wi o ko okpo nannai
wa aza na i o kutono le.
9 A̱ɗa̱ kpaꞋa ki Isaraila, zuwai a̱ɗu u Vuzavaguɗu.
a̱yi ɗa ka̱ɓa̱nki ka̱ ɗa̱ m ma̱ra̱ga̱ ma̱ ɗa̱.
10 A̱ɗa̱ kpaꞋa ku Haruna, zuwai a̱ɗu u Vuzavaguɗu.
a̱yi ɗa ka̱ɓa̱nki ka̱ ɗa̱ m ma̱ra̱ga̱ ma̱ ɗa̱.
11 zuwai a̱ɗu u Vuzavaguɗu,
a̱ɗa̱ vu na yi o kutono yi ra̱ka̱,
a̱yi ɗa ka̱ɓa̱nki ka̱ ɗa̱ m ma̱ra̱ga̱ ma̱ ɗa̱.
12 Vuzavaguɗu u tsu ciɓa ta̱ n a̱tsu,
wi ta̱ a kuzuwaka tsu una̱singai.
Wi ta̱ a kuzuwaka kpaꞋa ki Isaraila una̱singai
wi ta̱ a kuzuwaka kpaꞋa ku Haruna, una̱singai
13 wi ta̱ a ku zuwaka yaba dem
vu na u tonoi Vuzavaguɗu una̱singai
aza a wawaꞋa n aza gbagbaꞋin dem.
14 YaꞋan Vuzavaguɗu u doku ɗa̱ ka̱bunda̱i,
a̱ɗa̱ n muku n ɗa̱.
15 YaꞋan Vuzavaguɗu vu na u yaꞋin gaɗi n iɗika
u zuwa ka ɗa̱ una̱singai,
16 Gaɗi vu a̱da̱nga̱shile,
vu Vuzavaguɗu ɗa,
ama ɗa u nekei vuma aduniya.
17 A̱kpisa̱ a ci cikpa Vuzavaguɗu ba,
aza a na a̱ gida̱la̱i a kubana a kasaun.
18 Ama a̱tsu ɗa tsa kucikpa Vuzavaguɗu,
gogo na a kubana ko wannai.
Cikpai Vuzavaguɗu.