118
Avasa a ucikpi adama a ulyaꞋi
Cikpai Vuzavaguɗu
adama a na a̱yi vuza singai ɗa,
ucigi u ni u na u tsu sabaꞋa ba ko wannai ɗa.
YaꞋan aza a Isaraila a dana,
<<Ucigi u ni u na u tsu sabaꞋa ba ko wannai ɗa.>>
YaꞋan aza a kpaꞋa ku Haruna a dana,
<<Ucigi u ni u na u tsu sabaꞋa ba ko wannai ɗa.>>
YaꞋan aza a na i a kupana wovon u Vuzavaguɗu a dana,
<<Ucigi u ni u na u tsu sabaꞋa ba ko wannai ɗa.>>
A̱ ka̱tsuma̱ ka kadama ka̱ va̱,
n ɗekei vuzavaguɗu,
ɗa wu ushuki, u ka̱sukpa̱i mu ba̱ri.
Vuzavaguɗu wi ta̱ koɓolo nu mpa,
mi a kupana wovon ba.
yiɗa̱i vuma u kufuɗa kuyaꞋanka mu?
Vuzavaguɗu wi ta̱ koɓolo nu mpa,
a̱yi ɗa ka̱ɓa̱nki ka̱ va̱,
mi ta̱ e kene tsu na a kulyaꞋa irala i va̱.
U laꞋa ta̱ n kugaꞋan vu sheɗeku u Vuzavaguɗu,
a na va ku lemece ke vuma ma̱tsa̱n.
U laꞋa ta̱ n kugaꞋan vu sheɗeku u Vuzavaguɗu,
a na va ku lemece ke muku mu ngono ma̱tsa̱n.
10 Uduniyan ra̱ka̱ u kanza mu ta̱,
ama a̱ ka̱tsuma̱ ka kula ku Vuzavaguɗu
ɗa mu unai le.
11 A kanzai mu a̱ ubuta̱ dem,
ama a̱ ka̱tsuma̱ ka kula ku Vuzavaguɗu
ɗa mu unai le.
12 A̱ kpa̱nta̱i mu ci ishigi,
ama ɗa a̱ kuwa̱i gogoꞋo lo tsu na awana a̱ tsu kula̱ akina,
ama a ka̱tsuma̱ ka kula ku Vuzavaguɗu
ɗa mu unai le ra̱ka̱.
13 A yaꞋin tsu na a ku una mu,
ama ɗa Vuzavaguɗu u ɓa̱nka̱i mu.
14 Vuzavaguɗu ɗa katsura ka̱ va̱ n vishipa vu va̱,
wo okpo ta̱ kishi ka̱ va̱.
15 Ishipa i ma̱za̱nga̱ n ulyaꞋi,
yi uta̱i a̱tsura̱ aza a usuɓi.
<<Kukiye ku usingai ku Vuzavaguɗu,
kuyaꞋan ta̱ ili i gbagbaꞋin.
16 Kukiye ku usingai ku Vuzavaguɗu ku ɗa
ku nekei tsu ulyaꞋi,
kukiye ku usingai ku Vuzavaguɗu
ku yaꞋin ili i gbagbaꞋin.>>
17 Mpa mi a̱ kukuwa̱ ba,
ama mi ta̱ o kuyongo n wuma,
ka̱ta̱ n neke arabali a ulinga u na Vuzavaguɗu u yaꞋin.
18 Vuzavaguɗu u gbara mu ta̱ ka̱u,
ama wu una mu ba.
19 Ɓa̱yuwa̱ ka̱ mu utsutsu wa aza a usuɓi,
mi ta̱ a ku uwa punu n cikpa Vuzavaguɗu.
20 Na lo ɗa utsutsu u Vuzavaguɗu,
u na uma a usuɓi a ku uwa.
21 N cikpa wu ta̱ adama a na vu ushuku mu ta̱,
vu okpoi kishi ka̱ va̱.
22 Katali ka na a maꞋi a iwain
ko okpo ta̱ kenene ke mere.
23 Na lo ulinga u Vuzavaguɗu ɗa,
ili i mereve i ɗa kpamu a̱ a̱shi a̱ tsu.
24 Na ɗa kanna ka na Vuzavaguɗu u yaꞋin,
yaꞋan tsu pana uyoꞋo ci yaꞋin ma̱za̱nga̱ n ka a.
25 Vuzavaguɗu wawa tsu,
Vuzavaguɗu neke tsu u lyaꞋi.
26 Vuza vu una̱singai ɗa,
a̱yi na wi a̱ kuta̱wa̱ a̱ ka̱tsuma̱ ka kula ku Vuzavaguɗu.
ɗe a kpaꞋa ku Vuzavaguɗu
tsu zuwaka wu una̱singai.
27 Vuzavaguɗu a̱yi ɗa Ka̱shile,
ɗa u zuwai kutashi ku akana tsu.
Gita̱i ka̱ɗiva̱, i dara n a̱vuku a nshuwa ekiye a̱ ɗa̱,
a kubana a katalikalyuka.
28 Avu ɗa Ka̱shile ka̱ va̱,
mi ta̱ a kucikpa wu,
avu ɗa Ka̱shile ka̱ va̱,
mi ta̱ e kuneke wu tsugbayin.
29 Cikpai Vuzavaguɗu
adama a na a̱yi vuza singai ɗa,
ucigi u ni u na u tsu sabaꞋa ba ko wannai ɗa.