139
Kadanshi a kubana u vuza vu kelime vi ishipa: Vishipa vu Dawuda.
Vuzavaguɗu vu la̱na̱ mu ta̱,
kpamu vu yeve ta̱ ko mpa ɗa ya.
Vu yeve ta̱ makyan ma na n da̱sa̱ngi
m makyan ma na n ɗa̱nga̱i
vu tsu yeve ta̱ kusheshe ku va̱ avu daꞋin.
Vu tsu zuwaka ta̱ n nwalu n va̱ n ivaꞋin i va̱,
vu yeve ta̱ ili i na n ci yaꞋansa.
Vuzavaguɗu, kafu kadanshi ka̱ uta̱ una̱ u va̱,
vu yeve ta̱ ɗe kaꞋa dem.
Vu ka̱ra̱Ꞌa̱ mu ta̱ a̱ ubuta̱ dem,
vu zuwai kukiye ku una̱singai ku nu a kaci ka̱ va̱.
IcuꞋu i kuyeve ku nanlo adama a̱ va̱
ku laꞋa ta̱ utsura u kadanshi,
ku laꞋa ta̱ utsura u kuyeve ku va̱.
Teɗai n kubana n katsukpa ayinviki a̱ nu?
Teɗai n kusuma a kubana e kelime ka̱ nu?
N kumba baci gaɗi ta ɗe vi,
n vaku baci a̱ ubuta̱ wa̱ ukpisa̱ vi ta̱ ɗe.
N imkpa baci gaɗi tsu manunu
n lazai a uɓon u kasana,
ko m banai n telei a uɓon u ka̱livi,
10 ko ɗe va kukiye ku nu ki ta̱ o kutono nu mpa,
kukiye ku usingai ku nu ki ta̱ e kureme mu mayin.
11 Ishi baci mi a kufuɗa kudana ka̱yimbi ka pala mu,
ka̱ta̱ kutashi uka̱ra̱Ꞌi nu mpa ko okpo kayin,
12 ko ka̱yimbi feu ki o ko okpo ka̱yimbi wa̱ nu ba,
kayin ki ta̱ an kutashi ku kanna,
adama a na ka̱yimbi n kutashi ili i te i ɗa wa̱ nu.
13 Avu ɗa vu yaꞋin ili i ka̱tsuma̱ i va̱,
avu ɗa vu yaꞋin mu a̱ ka̱tsuma̱ ka̱ a̱na̱ku a̱ va̱.
14 N cikpa wu ta̱,
adama a tsu na vu yaꞋin mu,
ili wovon i ɗa n ili mereve.
Ulinga u nu ili i mereve i ɗa,
n yeve ta̱ n ka nanlo mayin.
15 Etele a ikyamba a̱ va̱,
i usokongi wa̱ a̱ nu ba,
ana a yaꞋin mu usokongi,
ana a yaꞋin mu a̱ ka̱yimbi.
16 Vu ene mu ta̱ kafu a matsa mu
ayin a na a zuwakai mu n kuyaꞋan,
i ta̱ uɗani a katagarda ka̱ nu,
kafu a̱ gita̱ kuyaꞋan vuza te a̱ ka̱tsuma̱ ke le.
17 Ka̱shile yiɗa̱i a kugisanku
n kusheshe ku singai ku nu wa̱ va̱.
n yiɗa̱i a kugisanku ka̱bunda̱i ke le.
18 Mi baci e kukece le,
i ta̱ a ku laꞋa kayala a̱bunda̱i.
ko ɗa baci n jimgbai,
mi ta̱ koɓolo n avu.
19 Ka̱shile, ishi baci va̱ a̱ ku ushuku vu una
aza a gbani-gbani ra̱ka̱,
ka̱sukpa̱i mu,
a̱ɗa̱ aza a munuka,
20 aza a na i a kadanshi ka gbani-gbani adama a̱ nu,
irala i nu i na yi a kadanshi ka gbani-gbani.
21 Vuzavaguɗu, n iwan aza a na a iwain nu ba,
mi kpamu e ke ne unata wa aza a na i a kuyaꞋanka wu ugbamukaci ba.
22 N iwan le ta̱ n ka̱ɗu ka̱ va̱ ra̱ka̱-ra̱ka̱.
irala i va̱ i ɗa n iɗika le.
23 Vuzavaguɗu, la̱na̱ mu vi ta̱ e kuyeve ka̱ɗu ka̱ va̱,
kondo mu vi ta̱ e kuyeve kusheshe ku va̱.
24 La̱na̱ ko mi ta̱ n unushi a wuma u va̱
ubuta̱ wi ta̱ lo una n nusakai nu,
ka̱ta̱ vu tono nu mpa a uye u ko wannai.