Vishipa vu Sulemanu
Kuɓa̱yuwa̱
Ilina u kula ku katagarda ka nampa Vishipa vu Sulemanu, ki a kadanshi Ɗa ɗa vishipa vu na vu laꞋi nu uyoꞋo a̱ ka̱tsuma̱ ki ishipa. Katagarda ka nampa kita̱ uɗiki n ishipa i na mekere n kolobo a tsu yaꞋankpanai kadanshi ku ucigi u le. Makyan ma yoku a yaꞋan kadanshi adama a̱ ka̱ci ke le. Makyan ma yoku kpamu a yaꞋanka ka̱ci ke le ko a̱ja̱Ꞌa̱ e le.
Ishipa i nampa ya, utuka̱ ta̱ i ɗa e keteshe n uye kakau. A ubuta̱ u yoku i ta̱ a kufuɗa kudana kolobo ka a̱yi ɗa mogono Sulemanu n ka̱ci ka̱ ni. I ta̱ kpamu a kufuɗa kukece katagarda ka tsu kuyongo, tsu na a ɗikai mekere ma a bankai a kpaꞋa ku mogono Sulemanu, ama mekere ma mi ta̱ a kuciga vuza yoku na ɗe a̱ likuci i le, a ukocishi de mavuka ma ma doku ta̱ ma gasa n kolobo ku ucigi ka likuci i le. I ta̱ kpamu a kufuɗa ku utuka̱ n arabali a nampa e keteshe tsu urotu u kuyongo u Ka̱shile n uma a̱ ni, ko Vuzavaguɗu n aza o kutoni a̱ ni.
Kpamu i ta̱ a kufuɗa e kece katagarda ka nampa ci ishipa i na yi a kadanshi ku ukuna wu ucigi ugbayin u na ugain a̱ ciya̱ a ubuta̱ u vuka n vali. Nannai bi ba, i ta̱ a kadanshi i ta̱ a kufuɗa kuyaꞋan ishipa i nampa a ubuta̱ u yolo a iɗika yi Isaraila i cau.
Nnama n a̱pa̱lu a na ulai a katagarda ka nampa iyoci i ɗa yu ucanuku wi ikebe nu tsuloboi kpamu, u na u zuwai uma a ciɓa nu ngono n ugain wa a̱ma̱li n ucigi.
Ili i na yi punu udari a katagarda ka nampa.
Vishipa vu ugiti 1:1; 2.7
Vishipa vu i re 2:8; 3:5
Vishipa vu tatsu 3:6; 5:1
Vishipa vu na̱shi 5:2; 6:3
Vishipa vu tawun 6:4; 8:14
1
1 Ishipa i Sulemanu i na i laꞋi n uyoꞋo.
Vishipa vu ugiti
Mekere maꞋa ma cananai
2 YaꞋan u como mu n una̱ u ni
adama a na ucigi u nu u laꞋa ta̱ ma̱kya̱n uyoꞋo.
3 Ma̱gula̱ni ma maniꞋin ma̱ nu, mi ta̱ n ugaꞋin u kutsumgba,
kula ku nu tana ki ta̱ ci ili i ma̱gula̱ni i na a vishangi.
ɗaɗa i zuwai ɗa a̱ma̱ci i a kuciga wu.
4 YaꞋan gogoꞋo vu ɗika mu tsu suma,
yaꞋan mogono ma banka mu a̱ kunu ku ni,
Ci yaꞋan ma̱za̱nga̱ koɓolo,
mi ta̱ a kucikpa ucigi u nu u laꞋa ma̱kya̱n,
ɗaɗa i zuwai nkere mi a kuciga wu.
5 Mpa vuza lima̱ ɗa, ama mi ta̱ n tsuloboi.
a̱ɗa̱ nkere n Urushelima,
mpa vuza lima̱ ɗa tsu a a̱pa̱m e Kedaru,
tsu kakashi ku utsutsu ka̱ ka̱pa̱m ka Sulemanu.
6 Ka̱ta̱ yi inda mu bi-bi-bi ba
adama a na mpa vuza lima̱ ɗa,
adama a na kanna kaꞋa ko songu mu ta̱ ɗa n lima̱na̱i.
Ataku a̱ va̱ a yaꞋan ta̱ wupa nu mpa
a zuwai mu n yaꞋan ulinga a kashina ki itacishi,
n ciya̱ makyan ma na n kula̱na̱ ikyamba i va̱ ba.
7 Dana mu, avu macigi ma̱ va̱, teɗai vi a kaguɓa ka ushiga u nu?
Kpamu teɗai vu tsu banka n ushiga u nu wu uvuka kanna ka suɗukpa baci?
Yiɗa̱i i zuwai mo kokpo tsu vuka vu na a palai
a̱ ka̱ka̱ra̱sa̱ a ushiga wa̱ a̱ja̱Ꞌa̱ a̱ nu?
8 Avu na vu laꞋi n tsuloboi a̱ ka̱tsuma̱ ka̱ a̱ma̱ci, vu yeve baci ubuta̱ ba,
tono ura̱Ꞌa̱ wu nlala n na o tsu tono
vu guɓa nraɗika n nu
ɗevu n a̱pa̱m a nguɓi.
9 Avu macigi ma̱ va̱,
tsuloboi tsu nu u pura̱ ta̱ ugboji u va̱,
tsu kodoku ka na ki o kurono ucanuku
we ekeke odoku o kuvon a FiriꞋauna.
10 Ili ya atsuvu i doku ta̱ nguji n nu ugaꞋin,
kuɗeku ku nu ki ta̱ ucindali n idolu i singai.
11 Ci ta̱ a kuyaꞋanka wu ili ya atsuvu ya azanariya,
n ukali wa azurufa.
12 A makyan ma na mogono mi a̱ ubuta̱ u kirukpa ku ni,
ili ma̱gula̱ ni i va̱ i ka̱na̱ ta̱ ubuta̱ dem m ma̱gula̱ni.
13 Macigi ma̱ va̱ mi ta̱ tsu kazuwatsu ma Muru wa̱ va̱,
a ivaꞋin a̱ ma̱ka̱nga̱ ma̱ va̱.
14 Macigi ma̱ va̱ mi ta̱ tsu ka̱kutsu ka̱ a̱pa̱lu a kakamba wa̱ va̱
ashina itacishi i Enu-gedi.
15 Avu vi ta̱ n tsuloboi macigi ma̱ va̱.
Mayun, avu vi ta̱ n tsuloboi.
A̱shi a̱ nu i ta̱ kure-kure tsu moɗoi.
16 Avu vi ta̱ n tsuloboi, Macigi ma̱ va̱.
Avu vi ta̱ a kuɗika ugboji u va̱.
ivaꞋamkpatsu i tsu yi ta̱ leku an mita̱ ma̱ ta̱ku.
17 Aburakpatsu a kpaꞋa a̱ tsu nɗanga n sida n ɗa,
nɗanga n Firi n ɗa ashamkpatsu a kpaꞋa a tsu.