Kiŋwaati ki ŋkosi ki
Jɔɔŋ lɛ
Fiee fi nuuŋ lɛ kiŋwaati ki Jɔɔŋ lɛ ki ŋkosi kini
Kiŋwaati ki Jɔɔŋ lɛ ŋkosi ki tɛ̀ tsɛɛ li bintaashɛ bi bɛniiŋ bɛ kimbeenchɛ-ɛ kini, kɛmi bikoo bi biee lɛ bifɛ. Bi biɛɛ li ŋkaŋgisɛ shéŋ yi bɛniiŋ bɛ tɛ̀ tsɛɛ li be-e, le be ni be tsiiŋ li kintaashɛ bɛ Nyɔ mɔɔ Ŋwani wu Jiso Krai bɛ li ntiifɛ le be ni be ŋiŋgi kii be biki nlaanchɛ wu binsɛɛ. Wi wu tsɛɛ kiŋwaati kini tɛ̀ bɔsɛyi wu chiinsɛ le, ɛ wi tsiiŋ lɛ kiŋ'wofu-u lɛnti, tɛ tuu le ni feti biee bi kijibɛ-ɛ kɛ. Tɛ tuu tsɛɛ tɛ le Jiso Krai tɛ nuuŋ nɛɛ wiwoŋ, wi kwikwi wu gɛɛ shéŋ li wu-u tuu kɔŋgisi Nyɔ, kɛmi tɛ le ni kɔŋgisi ŋwaani.
Bikoo bi biee bi lɛ Kiŋwaati kini-i
1:1-4 Mbɛɛchɛ
1:5–2:29 Ntoŋ wu kii kiŋ'wofu bɛ kijibɛ
3:1-24 Bɔɔŋ bɛ nuuŋ bɛ Nyɔ-ɔ bɛ bɛ nuuŋ bɛ kiŋkundi-i
4:1-6 Fiee fi nuuŋ fi chɛɛŋ bɛ fi nuuŋ fi binsɛɛ lɛ
4:7-21 Kii kiŋkɔŋgisɛ
5:1-21 Shéŋ yi wi gɛɛ li Krai li seti fiee fichu bu sɔlu
1
Jɛ yi nyɛɛ ntsɛ
1 Fiee fi tɛ̀ tsɛki fini nuuŋ kii Jɛ yi nyɛɛ ntsɛ yi tɛ̀ nuuŋ fɛmbɛɛchɛ-ɛ. Jɛ yini nuuŋ yi tɛ tɛ̀ woo biee bi yi tɛ̀ tiiti, tɛ̀ ŋɛŋ yi bɛ lii yisɛŋ, tɛ̀ bichɛ si yi nuuŋ, tɛ̀ koŋ li yi-i bɛ tsáŋ yisɛŋ. 2 Ntsɛ wuni tɛ̀ yenɛ tɛ ŋɛŋ wu, tɛ se tuu tɛ tiiti kii wu, tɛ fenjisi baa li be-eŋ kii ntsɛ wu kimakɛ wuni wu tɛ̀ nuuŋ bɛ Baa we, wu se yenɛ li bee li. 3 Fiee fi tɛ tɛ̀ ŋɛŋ tɛ tuu tɛ woo fiɛɛ, ɛ fi fi tɛ fenjisi baa tɛ li be-eŋ le nɛ ni nɛ nuuŋ li kintaashɛ-ɛ bɛ bee. Kintaashɛ kisɛŋ nuuŋ bee bɛ Baa wusɛŋ bɛ Ŋwani wu Jiso Krai. 4 Tɛ se tsɛki baa fini ke kinɛɛtinɛ kisɛŋ se ni ki nuuŋ ɛ ki yisɛ bujɔŋ.
Ntsɛ li kiŋ'wofu-u linti
5 Wuni nuuŋ ntoŋ wu tɛ tɛ̀ woo li wuu, tɛ se laŋini li be-eŋ le, Nyɔ nuuŋ kiŋ'wofu, kijibɛ nuuŋ yɛ li yi-i kɛ dududu. 6 Bɛdɛɛni, ɛ tɛ kweŋgi le tɛ baa li kintaashɛ-ɛ bɛ yi, tɛ se tuu tɛ deŋgi nuuŋ li kijibɛ-ɛ, kɛ tɛ sɛɛyi baa binsɛɛ, tɛ tsiiŋ yɛ tɛ biki chɛɛŋ kɛ. 7 Se nuuŋ le, ɛ tɛ deŋgi li kiŋ'wofu linti si nuuŋ tɛ li kiŋ'wofu linti lɛ, kɛ tɛ gii tɛ ni tɛ nuuŋ li kintaashɛ wi bee wi, ŋgɔŋ mɛ Jiso wu Ŋwanɛwi tsootsi tɛɛbeŋ tɛ wuuti li bibifi bisɛ-ɛŋ bichu. 8 Ɛ tɛɛbeŋ kweŋgi le tɛ kɛmi yɛ bibifi kɛ, kɛ tɛ yɛŋgi baa bɛ yí yisɛŋ, kɛ chɛɛŋ nuuŋ yɛ li tɛɛbeŋ kɛ. 9 Se nuuŋ le, ɛ tɛ jiishi bibifi bisɛŋ li wu-u, si nuuŋ wi wu ti lemi li jɛ ye-e feti biee tsaaŋ lɛ, kɛ gii feeki bibifi bisɛŋ, tsootsɛ bee, tɛɛbeŋ tɛ ni tɛ wuuti li biŋge bisɛŋ bichu bi ti nuuŋ yɛ tsaaŋ kɛ. 10 Ɛ tɛɛbeŋ kweŋgi le tɛ mɛɛŋ baa ki fɛ kɛ bibifi kɛ, kɛ tɛ dzɔ baa yi le yi yɛɛ wi wu binsɛɛ, jɛ ye kɛmi yɛ kintsii li yí yi sɛ-ɛŋ kɛ.