Kiŋwaati ki ŋkosi ki Pɔɔ tɛ̀ tsɛɛ li kintaashɛ ki
Tɛsalonika-a
Fiee fi nuuŋ lɛ Kiŋwaati ki Tɛsalonika-a ki ŋkosi kini
Tɛsalonya tɛ nuuŋ kitoŋ kimu lɛ kimbɛ ki Masadonya lɛ Pɔɔ tɛ̀ bɛchi kintaashɛ ki bɛniiŋ bɛ kimbeenchɛ-ɛ. Fi tɛ mɛɛŋ ki ŋɔɔnɛ kɛ si kintaashɛ kini tɛ bɛchi kɛ, Bɛjuu tuu be bɛchi be baanini Pɔɔ be fuumi kimi bɛ wu. Pɔɔ tuu tsɛɛ kiŋwaati ki ŋkosi kini li bɛniiŋ bɛ Krai bɛ Tɛsalonya le kaŋgi shéŋ yibe, fɛ be ni be lemi be tɛɛmi.
Bikoo bi biee bi lɛ Kiŋwaati kini-i
1:1 Mbɛɛchɛ
1:2–3:13 Pɔɔ woo bujɔŋ tuu pia bɛniiŋ bɛ kimbeenchɛ-ɛ
4:1-12 Ntiifɛ kii ntsɛ wu bɛniiŋ bɛ nuuŋ bɛ Krai
4:13–5:11 Ntiifɛ kii si Krai gii naa kaari bɛ
5:12-22 Ntiifɛ wu kimɛrisɛ
5:23-28 Kimɛrisɛ
1
1 Ɛ mi Pɔɔ, miɔ tɛɛ Silas mɔɔ Timɔti. Ntsɛkɔɔ kiŋwaati kini li kintaashɛ ki bɛniiŋ bɛ kimbeenchɛ-ɛ ki li kitoŋ ki Tɛsalonika-a ki taashɛ ki nuuŋ bɛ Nyɔ Baa wusɛŋ mɔɔ Taa Jiso Krai.
Nyɔ doonchɛ beŋ shéŋ yi dzeeŋ, yi tuu nyɛ beŋ mbɛɛŋgii.
Pɔɔ nyɛ kiyɔɔni li Nyɔ-ɔ li kintaashɛ
ki bɛniiŋ bɛ kimbeenchɛ-ɛ ki Tɛsalonika
ki bɛniiŋ bɛ kimbeenchɛ-ɛ ki Tɛsalonika
2 Tɛ shiiŋ tɛ nyɛɛ kiyɔɔni li Nyɔ-ɔ mfi kwi kii beŋ bɛchu, tɛ teenyi beŋ bɛchu mfi kwi li nlɛkɛ li Nyɔ-ɔ wusɛŋ. 3 Mfi wu tɛ nuuŋ limfwe li Nyɔ Baa wusɛŋ, tɛ kiimi kiŋge kinɛ ki buti li shéŋ yi nɛ gɛɛ li Krai li bɛ nimɛ chinɛ chi buti li kiŋkɔŋgisɛ kinɛ-ɛ mɔɔ shéŋ yi nɛ kɛndi yi buti li mbichɛ wu nɛ bichi limfwe li Taa wu tɛɛbeŋ wu Jiso Krai.
4 Bɛŋwaanɛŋ bɛsɛŋ bɛ Nyɔ kɔŋgisi, tɛ kii baa le Nyɔ tsaa yɛ beŋ. 5 Tɛ kii baa lɛ kifɛ ntoŋ wu dzeeŋ wu tɛ tɛ̀ bɛ bɛ wu lɛ be-eŋ tɛ̀ nuuŋ yɛ bɛ n'yɔru kwaa kɛ. Wu tɛ̀ bɛ tɛ bɛ buŋga bu dzɛti li tsaŋ yi Fiana yi Waaŋ li, tɛ se gbɛŋgi baa tɛ kii le ntoŋ wulu nuuŋ chɛɛŋ. Nɛ kii baa ŋwaani bɛniiŋ bɛ tɛ tɛ̀ nuuŋ mfi wu tɛ tɛ̀ tsiiŋ lɛ be-eŋ lɛnti kii beŋ. 6 Nɛ tɛ̀ biki dzé yisɛŋ mɔɔ yi Taa kifɛ nɛ tɛ̀ fii ntoŋ wulu bɛ kinɛɛtinɛ ki dzɛti li tsaŋ yi Fiana yi Waaŋ li mɔɔ nuuŋ si nɛ tɛ̀ nuuŋ li ŋgɛ wu nyɔŋa-a lɛ. 7 Bɛdɛɛni nɛ se to bɛniiŋ bɛ kimbeenchɛ-ɛ bɛ bɛniiŋ bɛchu bɛ lɛ kimbɛ ki Masadonyaa mɔɔ ki Akeya nuuŋ be ni be biki dzé yibe. 8 Ntiiti fini kifɛ ɛ jɛ yi Taa kwaa yi bo li be-eŋ yi dɛndɛ kimbɛ ki Masadonya bɛ ki Akeya kɛ. Ntoŋ wu kii shéŋ yinɛ yi nɛ gɛɛ li Nyɔ-ɔ dɛndɔɔ tɛ li bintsii bichu-u. Fi se fiɛɛ le, tɛ kɛmi yɛ le tɛ tuu tɛ ni tɛ tiiti fiee fi fimu kɛ. 9 Nɛ ni nɛ kii le bɛniiŋ bɛlu kibɛɛ tiiti baa kii si nɛ tɛ̀ fii bee lɛ be-eŋ lɛnti, mɔɔ si nɛ tɛ̀ chinɛ munyɔkinɛ nɛ to bɛ Nyɔ le nɛ ni nɛ nindi li Nyɔ yi chɛɛŋ yi kɛmi ntsɛ-ɛ. 10 Be tiiti tɛ si nɛ tɛŋgi Ŋwani wu gii naa dza liboo bɛ. Ŋwani wuni nuuŋ ɛ wu wu tɛ buu li kwe-e, ɛ Jiso wu busi tɛɛbeŋ li tsaŋ yi sheŋ yi Nyɔ yi fuuti yi gii naa doonchɛ li bɛniiŋ li.