Kiŋwaati ki ŋkosi ki Pɔɔ tɛ̀ tsɛɛ li
Timɔti-i
Fiee fi nuuŋ lɛ Kiŋwaati ki Timɔti-i ki ŋkosi kini-i
Kiŋwaati kini nuuŋ ki ŋkosi ki Pɔɔ tɛ̀ tsɛɛ li sɔɔnɛwi wumu wu bukooŋ bwee tɛ̀ nuuŋ le Timɔti. Timɔti wuni tɛ̀ nuuŋ wi wu Krai, tɛ̀ nuuŋ wi wu kwɛɛŋ wu Eesha wu ŋkwɛŋ.
Biee bi Pɔɔ tɛ̀ tsɛɛ kii bi lɛ kiŋwaati kee ki ŋkosi kini biɛɛ bitɛɛtu. Fi ŋkosi fiɛɛ tiiti le lɛnti nyɛɛ ntifi li bee le be ni be dzeti mfi kii nlaanchɛ wu nuuŋ yɛ tsaaŋ lɛnti lɛ bɛniiŋ bɛ kimbeenchɛ-ɛ kɛ. Wuni nlaanchɛ tɛ̀ nuuŋ le, kwɛɛŋ wu tɛɛbeŋ ŋiŋgi wuni nuuŋ kwɛɛŋ wu bifi, wi se nuuŋ kɛmɛ kinsofu nɛɛ mfi wu wi kɛɛ biee bimu bi nuuŋ lɛ munyiikɔɔ li, bɛ mfi wu wi tsiiŋ ntsɛ wumu nɛɛ si nuuŋ ni fɛŋgi njɛ ŋwaani biee bimu bɛ numu kwɛɛŋ nsiŋ kɛ nyuŋ nsiŋ.
Kiŋwaati kilu tiiti kɛɛ tɛ si nuuŋ Timɔti ni feti nimɛ chee lɛ kintaashɛ ki bɛniiŋ bɛ kimbeenchɛ-ɛ lɛnti, bɛ si bɛniiŋ nuuŋ be ni be feti nlɛkɛ li Nyɔ-ɔ. Ki tuu ki tiiti ŋwaani kiŋge ki bikoo bi bintaashɛ bi bɛniiŋ bɛ kimbeenchɛ-ɛ mɔɔ bɛniiŋ bɛ fii li nimɛ-ɛ lɛ bintaashɛ lɛnti kɛmi le be ni be kɛmi. Li mɛrisɛ wu tifɔɔ Timɔti si nuuŋ ni nindi si ŋwanɛ nimɛ wu Jiso Krai wu dzeeŋ.
Bikoo bi biee bi lɛ Kiŋwaati kini-i
1:1-2 Mbɛɛchɛ
1:3–3:16 Ntifi kii si bɛ nuuŋ bɛ ni bɛ feti biee li kintaashɛ-ɛ, bɛ kii bɛte bikoo bi kintaashɛ-ɛ
4:1–6:21 Ntifi kii si Timɔti gii ni feti nimɛ chee
1
1 Ɛ mi Pɔɔ, nnuuŋ ŋwanɛ ntoŋ wu Krai Jiso si Nyɔ yi Kinsofu kisɛŋ bɛ Krai Jiso wu tɛɛbeŋ gɛɛ bufii li wuu tɛ tee le ni nuuŋ.
2 Ntsɛkɔɔ kiŋwaati kini li wɛ-ɛ Timɔti wu nuuŋ ŋwanɛŋ wu chɛɛŋ li kimbeenchɛ-ɛ.
Nyɔ Baa bɛ Krai Jiso wu Taa wusɛŋ doonchɛ wɛ shéŋ yi dzeeŋ, tuu kɔɔ nshiiŋ bɛ wɛ, nyɛ wɛ mɔɔ mbɛɛŋgii.
Le Timɔti ni loosi bɛmfenjisɛ bɛ binsɛɛ lɛ
3 Si ntɛ nsooŋ bɔ li wɛ-ɛ mfi wu ntɛ̀ ŋgiiŋgi Masadonya le ɔ shɛ ɔ ni ɔ nuuŋ Ɛfɛso lɛ, ntuuɔ nsuŋgi bɔ tɛ le ɔ ni ɔ nuuŋ le ɔ loosi bɛniiŋ baa bɛ fenjisi mfenjisɛ wumu wu gwe. 4 Ɔ loosi tɛ le kiiŋ be ni be dzeti mfi wube be bifisi li mulo-oŋ mɔɔ li mɛŋkooŋ mɛ bɛte bini bi bɛniiŋ lɛ mɛ be ti shiiŋ be fɛɛ maa be giiŋgi bɛ me limfwe kɛ. Bini nuuŋ biee bi bɛɛ nuuŋ bɛ bitɛchinɛ, nuuŋ yɛ bɛ nimɛ chi Nyɔ-ɔ chi biki kimbeenchɛ kɛ. 5 Fiee fi shaaŋ li tefɛ chini linti fiɛɛ le chi fɛ bɛniiŋ kɛmɛ kiŋkɔŋgisɛ ki dzɛti fɛ shéŋ yi wuuti, bɛ ki dzɛti li shéŋ yi wi feti fiee nuuŋ yɛ fi shéŋ yee sɛki wu kɛ mɔɔ fi dzɛti li shéŋ yi chɛɛŋ yi wi gɛɛ li Nyɔ-ɔ. 6 Bɛniiŋ bamu chinɛ baa yini dze kituŋ, be tuu be mbweŋgi be giiŋgi nuuŋ li tefɛ chi li yee li. 7 Be wɛki baa le be ni be nuuŋ bɛniiŋ bɛ fenjisi bɛniiŋ bɛnchi bɛ Nyɔ-ɔ, se nuuŋ le be tɛ kɛɛ fiee fi be tiiti kii fi kɛ kinyi ki fiee fi be tɛchini li fi-i, mɛŋinɛ nsiŋ kɛ.
8 Tɛ kii baa le nchi wu Nyɔ nuuŋ fiee fi dzeeŋ fɛ wi dzeti nchi wulu lɛ dze yi shaaŋ li si kɛmi le dzɔɔ. 9 Tɛ kii baa tɛ le bɛ ti mɛɛŋ ki gɛɛ kɛ nchi li bɛniiŋ bɛ nuuŋ tsaaŋ li kɛ. Bɛ tɛ giki nuuŋ li bɛniiŋ bɛ cheti bɛnchi mɔɔ bɛ tɛɛmi bikoo, mɔɔ bɛ fɛŋgi Nyɔ, mɔɔ bɛ feti bibifi, mɔɔ bɛ wuuti yɛ kɛ, mɔɔ bɛ nyamisi fiee fi kii Nyɔ, kɛ bɛ woyi bɛ tee bɛ bee kɛ bɛ ni bɛ bee, kɛ bɛ woyi bɛniiŋ bamu. 10 Wu nuuŋ tɛ li bukɛɛŋ bɛ buniŋ bɛ jii bukwɛɛ li, mɔɔ li buniŋ bɛ gimi bɛ bamu. Wu nuuŋ tɛ li bɛniiŋ bɛ yii bɛniiŋ be giiŋgi bɛ be, mɔɔ bɛ sɛɛyi binsɛɛ, mɔɔ bɛ chinini le be tiiti baa chɛɛŋ be tuu be fenjisi nuuŋ binsɛɛ. Tuu nuuŋ tɛ le be ni be feti nɛɛ mɔɔ nuuŋ la le fi biki yɛ mfenjisɛ wu tsaaŋ kɛ. 11 Mfenjisɛ wuni biki ntoŋ wu dzeeŋ wu nyɔŋa wu nuuŋ wu Nyɔ yi bɛ piɛti, ntoŋ wulu se nuuŋ wu bɛ tɛ nyɛ li tsaŋ yɛɛŋ.
Pɔɔ nyɛ kiyɔɔni li Taa li kii nshiiŋ yi tɛ̀ kɔɔ li wuu
12 Nyɛɛɔ kiyɔɔni li Krai Jiso wu Taa wusɛŋ wu nyɛ mi buŋga le ni nindi nimɛ chee. Tɛ bichɛ mi ŋɛŋ le mi ŋkɔchɔɔ, se tsaa mi le ni nindi. 13 Mɔɔ nuuŋ si ntɛ̀ nnuuŋ ŋkosi ntiiti jɛ́ yi bifi kii wu, mbiindi bikaa lɛ bɛniiŋ bee jiŋ, ŋgaashi be, se nuuŋ le, tɛ̀ kɔɔ nshiiŋ bɛ mi, kifɛ ntɛ̀ mfeti biee bini li kijibɛ-ɛ ntɛ̀ ŋkɛmi yɛ kimbeenchɛ kɛ. 14 Taa wusɛŋ tɛ̀ doonchɛ kiŋkɔŋgisɛ kee li mi-i ki yaŋ ŋge, se fɛ mi ŋkɛmɛ kimbeenchɛ bɛ kiŋkɔŋgisɛ nɛɛ si wi wu taashɛ bɛ Krai Jiso ti kɛmi. 15 Tefɛ chi nuuŋ le Krai Jiso tɛ̀ bɛ li nshɛ le soo bɛniiŋ bɛ bifi nuuŋ chɛɛŋ. Ɛ tefɛ chi kɔchɛ, chi nuuŋ wi beŋ li chi chichu-u mɛŋinɛ nsiŋ. Mi kibɛɛ nnuuŋ ŋkunɛ bibifi. 16 Se nuuŋ le, Taa tɛ̀ kɔɔ nshiiŋ bɛ mi, le Jiso Krai se doonchɛ kɛti li mi-i nshiiŋ yee yi keeti yi giiŋgi limfwe ma nsiŋ li bɛniiŋ li. Mi wu nuuŋ ŋkunɛ bibifi, nse nuuŋ nɛɛ si mbosɛ li bɛniiŋ bɛ gii naa be beŋ li wuu be se kɛmɛ ntsɛ wu kimakɛ. 17 Nyɔ nuuŋ Mfɔŋ wu lindɛɛri wu ti mɛɛ yɛ kɛ, ti kwii yɛ kɛ, bɛ ti ŋiŋgi yɛ yi kɛ. Ɛ nɛɛ yi kwaa yi nuuŋ Nyɔ. Tɛ ni tɛ nyɛɛ ŋguŋu li yi-i tɛ tendi bɛndee bɛ yi-i, mfi kwi ma nsiŋ. Fi nuuŋ lɛ.
Nimɛ chi Timɔti gii ni nindi
18 Timɔti ŋwanɛŋ, nyɛɛɔ tefɛ chi fiee fi ntiiti fini li tsaŋ ya, chi biki chɛɛ nuuŋ fiee fi bɛniiŋ tɛ tee kii wɛ si bɛniiŋ bɛ laŋini bɛntoŋ bɛ Nyɔ-ɔ, le fi naa fi fi wɛ ɔ se toŋ dziŋ yi dzeeŋ. 19 Ɔ lemi nɛɛ li kimbeenchɛ ko-o, ɔ yiki fiee fi shaaŋ fi shéŋ ya tiiti li wɛ-ɛ. Bɛniiŋ bamu chinɛ baa n'yikɛ fiee fi shéŋ yibe tiiti be, be we li bɛmbeenchɛ bɛ bee, si yih yi dzɔɔ, fɛ yi kɛsi. 20 Li kintutu ki bee ɛ Imenayus bɛ Alɛkɛsanda. Mi nyɛɔ be li tsaŋ yi Sata-aŋ kituŋ, fi fiɛɛ le ɛ be kɛmɛ bufii, be chikɛ bɛ bukooŋ bu Nyɔ-ɔ bu be bifisi bwɛɛ.