Kiŋwaati ki bɛ tɛ̀ tsɛɛ li
Bɛhiburu-u
Fiee fi nuuŋ lɛ Kiŋwaati ki Hiburu-u kini
Tɛ gbɛŋgi yɛ tɛ kii wi wu tɛ̀ tsɛɛ kiŋwaati kini kɛ, se nuuŋ le tɛɛbeŋ kii baa le bɛ tɛ̀ tsɛɛ li bɛniiŋ bɛ Krai bɛ nuuŋ Bɛhiburu. Bɛhiburu nuuŋ bukooŋ bu Bɛjuu lɛ bumu. Bɛ tɛ̀ tsɛɛ le bɛ fɛ le Bɛjuu bɛ tɛ̀ gɛɛ shéŋ li Krai ba be ni be lemi nɛɛ li yi-i, mɔɔ nuuŋ si bɛŋgɛ tɛ̀ bɛɛ li bee lɛ dzé-e lɛ dzé-e lɛ. Tɛ̀ nuuŋ tɛ le fɛ be kɛɛ le leh wu fwɛŋ wu Jiso bɛ bɛ wu, wu kɛmi buŋga wu yɛki wu fichi. Bɛ tɛ̀ tsɛɛ tɛ le bɛ tifi be le be kɛɛ le fiee fi Nyɔ kaachɛ bɛniiŋ lu nuuŋ tɛ naa ka li yee li kɛ. Bɛ doonchɛ baa le biee bi Krai wu Ŋwanɛ Nyɔ bɛ bɛ bi yɛki bi bɛntomfɔŋ bɛ Nyɔ-ɔ bɛ ŋkosi, kifɛ bi bee tɛ̀ nuuŋ nɛɛ nuuŋ binjiinjii, se Krai bɛɛɔ kituŋ nuuŋ bɛ biee bi nuuŋ chɛɛŋ.
Bikoo bi biee bi lɛ Kiŋwaati kini-i
1:1-3 Krai gbɛŋgi nuuŋ mbosɛ yi Nyɔ kibɛɛ
1:4–2:18 Krai yɛki bɛnchindaa bɛ Nyɔ-ɔ
3:1–4:13 Krai yɛki Mɔɔsɛ bee Joshwa
4:14–7:28 Krai nuuŋ te muntofi wu yɛki bɛte muntofi bɛchu
8:1–9:28 Leh wu Krai tɛ̀ bɛ bɛ wu yɛki wu fichi
10:1-39 Fintofi fi Krai tɛ̀ fɛ yɛki muntofi munchu
11:1–12:29 Kii ŋgɛwu shéŋ li Nyɔ-ɔ
13:1-25 Ntifi yi lɛ kimɛrisɛ
1
Nyɔ yɔ yɛ li bee li nuuŋ lɛ kimfimɛ ki Ŋwani-i
1 Tɛ mɛɛŋ lindɛɛri, Nyɔ yeti li bɛte taa bɛsɛŋ li bimfimu bi bɛntomfɔŋ bee li, li kiŋga ŋge bɛ lɛ dzé chichi chichi. 2 Se nuuŋ le, li jo yi lɛ kimɛrisɛ yini-i, yi yɔ yɛ li bee li nuuŋ lɛ kimfimɛ ki Ŋwani-i. Ɛ Ŋwani wuni wu yi tsaa yɛ le gii nuuŋ kinjila li biee bichu-u. Ɛ nɛɛ wu wu Nyɔ tɛ̀ tɔŋ nshɛ bɛ biee bichu kɛti li tsáŋ yee li. 3 Kiŋ'wofu ki Nyɔ-ɔ bɛndi kɛɛ li yi yee li, se gbɛŋgi nuuŋ mbosɛ yi Nyɔ kibɛɛ. Ɛ wu wu feti kiboo bɛ nshɛ se nuuŋ lu. Se feti biee bini nuuŋ nɛɛ bɛ jɛ ye yi kɛmi buŋga. Tɛ̀ maaŋ kimaaŋ ki bibifi bisɛ-ɛŋ. Le maaŋ lɛ, se yɛɛ liboo shee lɛ kibɛnɛ ki kigɔŋɛ ki Nyɔ yi Bunɔŋa-a.
Ŋwanɛ Nyɔ ko wu yaa bɛnchindaa bɛ Nyɔ-ɔ
4 Fi se tuu fi nuuŋ le, Nyɔ tɛ̀ fɛ Ŋwani ko ŋge yaa bɛnchindaa bɛ Nyɔ-ɔ, nɛɛ si bukooŋ bu Nyɔ tɛ̀ nyɛ wu ko tɛ ŋge bu yaa bu bee. 5 Tɛ kii le wu koɔ ŋge kifɛ nchindaa wu Nyɔ wumu nuuŋ yɛ lu wu Nyɔ tɛ̀ saa yi teeŋ wu le,
“Ŋwani kɛ,
Kɛ le bɛŋ yani mi nteeɔ le ɛ mi baa wa, kɛ.”
Wumu nuuŋ yɛ lu wu tɛ̀ saa wu tee kii wuu le,
“Ŋgii ni nuuŋ tee.
Ni nuuŋ Ŋwanɛŋ ni.”
6 Tɛ̀ gii nuuŋ mfi wu Nyɔ tɛ̀ nuuŋ le yi toŋ Ŋwani wu ŋkosi wuni li nshɛ yini, yi tɛ̀ tee le,
“Bɛnchindaa bɛ Nyɔ-ɔ bɛchu kɛmi le be ni be guundi wu.”
7 Fiee fi Nyɔ tɛ̀ tee kii bɛnchindaa bee nuuŋ fini le,
“Yi ti feti be be nuuŋ si mfiee,
yi feti tɛ be be nuuŋ bɛniiŋ bee bɛ nimɛ-ɛ
be nuuŋ si nimi chi wi-i.”
8 Le tuu to li Ŋwani-i, tee le,
“Hooo Nyɔ, ɔ gii naa ɔ shee li kabara wa-a ɔ ni ɔ sɛki mfi kwi ma nsiŋ.
Ntsɛ wu tsaaŋ gii naa ni nuuŋ kimbaaŋ ki bumfɔŋ bwo-o.
9 Ɔ kɔŋgisɔɔ nuuŋ fiee fi tsaaŋ, ɔ baanini fiee fi bifi.
Nɛɛ lɛ, mi wu Nyɔ yi nuuŋ Nyɔ ya
mi n'yɛɛkɔɔ wɛ, ɔ yaa kintutu ko,
mi se mfwaɔ wɛ bɛ mbee yi bumfɔŋ bu kinɛɛtinɛ-ɛ.”
10 Yi se tuu yi ka yi tee li Ŋwani-i le,
“Taa, ɛ wɛ wu tɛ̀ tɔŋ nshɛ fɛmbɛɛchɛ-ɛ,
se biee bichu bi nuuŋ liboo nuuŋ mfɛru wu tsaŋ ya.
11 Biee bini gii bi ma, ɛ wɛ kwaa ɔ gii ɔ ba lu.
Bi gii bi doŋ si ndu.
12 Ɔ gii ɔ baaŋ bi si kiŋkoŋ.
Ɔ gii ɔ fiiki bi si ndu yi doŋ.
Se nuuŋ le, ɔ gii ɔ ba ɔ ni ɔ nuuŋ nɛɛ si ɔ nuuŋ lɛ.
Biya bio nuuŋ tɛ naa ma kɛ.”
13 Ɛ nchindaa wu Nyɔ wu la wu Nyɔ tɛ̀ saa yi tee li wuu le,
“Shee lɛ kibɛnɛ keŋ ki kigɔŋɛ-ɛ,
nsiiŋ gɛɛŋ bo mfi wu mi ŋgiiki
bɛniiŋ bo bɛ mbani-i wɛ limfwe
si kilaanda ki bikaa bio-o,
Ɔ tɔmi bikaa bio li bee ni?”
14 Mɔɔ bɛchindaa bɛ Nyɔ-ɔ bani nuuŋ nɛɛ si fiana yi nindi li Nyɔ-ɔ, bɛ yi tundi be be deŋgi be fii bɛniiŋ bɛ gii be kɛmɛ kinsofu nɛɛ ni?