Ntoŋ wu dzeeŋ wu kii Jiso si
Maacho
tɛ̀ tsɛɛ
Fiee fi nuuŋ lɛ Kiŋwaati ki Maacho-o kini
Ntoŋ wu dzeeŋ wu nuuŋ lɛ kiŋwaati ki Maacho-o kini, tiiti le Jiso nuuŋ Kinsofu ki Nyɔ tɛ̀ kaachɛ. Ntoŋ wu dzeeŋ wuni wɛ li bɛniiŋ bɛchu bɛ li kikoo ki nshɛ-ɛ. Kiŋwaati kini tiiti le Jiso nuuŋ Wi wu Ntiifɛ wu shaaŋ wu kii naanyɛ fiee fi bɛnchi bɛ Nyɔ-ɔ tiiti. Ntiifɛ wu Jiso kwikwi lɛ kiŋwaati kini-i wɛ ɛ bɛ tɛ̀ banchɛ li bikoo bitiinu-u. (1) Si Jiso tɛ̀ yɛki shiiti li ŋkumɛ-ɛ se tiifi kii bɛniiŋ bɛ bumfɔŋ bu liboo nuuŋ bubee. (2) Si Jiso tɛ̀ nyɛ ntifi li bɔɔŋ bee bɛ kintutu-u bɛ yoofi ntsɔ bɛfɛ baa kii nimɛ chi tɛ̀ toŋ be kii chi. (3) Ŋgaŋgaa yi Jiso tɛ̀ wɛti kii bumfɔŋ bu liboo. (4) Ntiifɛ kii fiee fi nuuŋ wi wu kintutu wu Jiso. (5) Ntiifɛ kii si nshɛ yini gii naa yi ma bɛ si bumfɔŋ bu Nyɔ-ɔ gii naa bu bɛ.
Bikoo bi biee bi lɛ kiŋwaati kini-i
1:1–2:23 Kini ki Jiso Krai, bɛ si bɛ tɛ̀ biɛ wu
3:1-12 Nimɛ chi Jɔɔŋ Nlisulidzɔɔ lɛ
3:13–4:11 Si bɛ tɛ̀ lii Jiso li dzɔɔ bɛ si Sataŋ tɛ̀ mɔnchɛ wu
4:12–18:35 Nimɛ chi Jiso tɛ̀ deŋgi feti Galilii
19:1–20:34 Si Jiso tɛ̀ dza Galilii, gɛɛŋ Jɛrosalɛŋ
21:1–27:66 Fuu wu Jiso wu kimɛrisɛ Jɛrosalɛŋ bɛ lu lichiŋ
28:1-20 Si Taa Jiso tɛ̀ bo li kwe-e, doonchɛ yi yee li bɛniiŋ bee li
1
Kini ki Jiso Krai
(Luk 3:23-38)
1 Maaŋ mɛŋkooŋ mɛ bɛte kini ki Jiso Krai-i: Tɛ̀ nuuŋ ŋwanɛ kini ki Mfɔŋ Daafi-i wu tɛ̀ nuuŋ ŋwanɛ kini ki Abraha-aŋ. 2 Abrahaŋ tɛ̀ nuuŋ te Adzi, Adzi nuuŋ te Yakɔ, Yakɔ nuuŋ te Judas bee bɛŋwaantee, 3 Judas nuuŋ te Pɛrɛs bɛ Dzara ɛ ni wu be tɛ̀ nuuŋ Tama. Pɛrɛs nuuŋ te Hɛsrɔŋ, Hɛsrɔŋ nuuŋ te Lam. 4 Lam nuuŋ te Aminada, Aminada nuuŋ te Nashɔŋ, Nashɔŋ nuuŋ te Salmɔŋ. 5 Salmɔŋ nuuŋ te Bwaas wu ni tɛ̀ nuuŋ Lahab. Bwaas nuuŋ te Obɛd wu ni tɛ̀ nuuŋ Lut. Obɛd nuuŋ te Jɛɛsi. 6 Jɛɛsi nuuŋ te Mfɔŋ Daafi.
Mfɔŋ Daafi nuuŋ te Salimu wu ni tɛ̀ nuuŋ kwɛɛ Yuria. 7 Salimu nuuŋ te Lehobwam, Lehobwam nuuŋ te Abija, Abija nuuŋ te Asa. 8 Asa nuuŋ te Jɛhoshafat, Jɛhoshafat nuuŋ te Jora, Jora nuuŋ te Yusaya. 9 Yusaya nuuŋ te Jotam, Jotam nuuŋ te Ahas, Ahas nuuŋ te Hɛsɛkaya, 10 Hɛsɛkaya nuuŋ te Manasi, Manasi nuuŋ te Emɔ,*Biŋwaati bi fichi bimu kɛmi bukooŋ buni le Ɛmɔ. Emɔ nuuŋ te Josaya. 11 Josaya nuuŋ te Jɛkonaya bee bɛŋwaantee. Bɛ tɛ̀ biɛ be nuuŋ mfi wu bɛniiŋ bɛ Babilɔŋ tɛ̀ kɔɔ bɛniiŋ bɛ Isɛlɛɛ be gɛɛŋ bɛ be li kwɛɛŋ wube wu Babilɔ-ɔŋ.
12 Lɛjiŋ lɛlu, si bɛ tɛ̀ kɔɔyɛ bɛniiŋ bɛ Isɛlɛɛ bɛ giiŋgi bɛ be Babilɔŋ lɛ, Jɛkonaya tɛ̀ nuuŋ te Shitiya, Shitiya nuuŋ te Sɛlubabɛ, 13 Sɛlubabɛ nuuŋ te Abiyut, Abiyut nuuŋ te Ɛliakiŋ, Ɛliakiŋ nuuŋ te Aso, 14 Aso nuuŋ te Sadok, Sadok nuuŋ te Akiŋ, Akiŋ nuuŋ te Ɛliyut, 15 Ɛliyut nuuŋ te Ɛliasa, Ɛliasa nuuŋ te Mataŋ, Mataŋ nuuŋ te Yakɔ. 16 Yakɔ nuuŋ te Jɔsɛ wu nyumɛ Maariya, Maariya nuuŋ wu wu tɛ̀ biɛ Jiso wu bɛ tɛ̀ teenyi le Krai Kinsofu ki Nyɔ tɛ̀ kaachɛ.
17 Bɛdɛɛni, bɛte kini ki Jiso-o kini tɛ̀ nuuŋ yoofi ntsɔ binɛɛ mbɛɛchɛ li Abrahaŋ mbɛ mbochu li Mfɔŋ Daafi-i, ki tuu ki nuuŋ tɛ yoofi ntsɔ binɛɛ mbɛɛchɛ li Mfɔŋ Daafi-i mbɛ mbochu li mfi wu bɛ tɛ̀ kɔɔyɛ bɛniiŋ bɛ Isɛlɛɛ bɛ giiŋgi bɛ be Babilɔŋ. Mbɛɛchɛ mfi wu bɛ tɛ̀ kɔɔyɛ bɛniiŋ bɛ Isɛlɛɛ mbɛ mbochu mfi wu bɛ tɛ̀ biɛ Krai nuuŋ ɛ bɛte bini bi bee nuuŋ yoofi ntsɔ binɛɛ.
Si biɛrɔ chi Jiso Krai tɛ̀ ka
(Luk 2:1-7)
18 Biɛrɔ chi Jiso Krai tɛ̀ ka lɛ dze yini-i: Ni wu Maariya tɛ̀ nuuŋ ɛ bɛ tɛ̀ koo fieeŋ le gii nuuŋ kwɛɛ Jɔsɛ. Fɛ be tɛ̀ mɛɛŋ le be se fɛ bugoo, bɛ dza bɛ ŋɛŋ le wu kɛmɔɔ fwe li buŋga bu Fiana yi Waaŋ li. 19 Si fi tɛ̀ kɛti lɛ, Jɔsɛ wu nyumi, si tɛ̀ nuuŋ wi wu tsaaŋ lɛ, tɛ̀ gii kɔŋgisi yɛ le chɔɔri wu kɛ, se beechɛ nuuŋ le gatɛ bee wu lɛjiŋ lɛjiŋ. 20 Si tɛ̀ gii mɛɛŋ beechi le fɛ lɛ, fi ka le nchindaa wu Taa tɛ̀ dza bɛ lɛ wuu lɛ kifiee li mfi wu tɛ̀ gii liiti, tee li wuu le, “Jɔsɛ, ŋwanɛ kini ki Mfɔŋ Daafi-i, kiiŋ ɔ ni chɛŋ ndzɔtsu Maariya si ni yih wa kɛ, kifɛ fwe chi nuuŋ bɛ chi chini chɛɛ chi wu kɛmɛ bɛ buŋga bu Fiana yi Waaŋ lɛ.” 21 Gii biɛ ŋwaŋ wu nyuŋ bɛ nyɛ bukooŋ bwee le Jiso, kifɛ gii naa soo bɛniiŋ bee li ŋgɛ wu bibifi bi bee.†Bukooŋ bu Jiso buni nuuŋ le, “Taa suuti lɔɔ.” 22 Biee bini bichu tɛ̀ ka le fi bɛ fi kɔchɛ si Taa tɛ̀ tee li kimfimɛ ki ntomfɔŋ we-e le, 23 “Yikɛ yɛɛŋ nɛ woo, ŋwaakwɛɛŋ wu kii yɛ nyuŋ kɛ wumu gii fwee, biɛ ŋwaŋ wu nyuŋ bɛ teeŋ wu le Imaniwe.” Bukooŋ buni nuuŋ le, “Nyɔ yɛ bɛ bee.” 24 Si kifiee kɛɛ laŋɛ li Jɔsɛ-ɛ lɛ, le kaaŋgi biee fɛ nɛɛ si nchindaa wu Taa bee tee li wuu lɛ. Tɛ̀ dzɔ Maariya li ni yih we, 25 se nuuŋ le, bee wu ti mɛɛŋ ki ka kɛ kintaa si kwɛɛŋ bee nyuŋ kɛ. Bee wu tɛ̀ tsiiŋ lɛ nsiiŋ gɛɛŋ bo bu Maariya tɛ̀ biɛ. Jɔsɛ se biee nyɛ bukooŋ bu ŋwaŋ wulu-u le Jiso.